ཐག་པའི་མཐིལ་དུ་རྡོ་བླུགས་ནས་རྒྱང་ཐག་རིང་པོར་འཕེན་པ་ལ་ཟེར།ཐག་པ་རིང་ཚད་སྤྱི་ཁྲེ་གང་དང་ཕྱེད་ཀ་ཙམ་ཡོད་པ་ལ་ཐག་པའི་དཀྱིལ་དུ་རྡོ་བླུགས་ས་འུར་མཐིལ་ཞེས་པ་ཅུང་ཞེང་ཆེ་བ་ཞིག་ཡོད།ཐག་སྣེ་གཅིག་ལ་འུར་ལྕེ་ཞེས་པ་ཐག་པ་ཕྲ་མོ་ཞིག་བསྒར་ཡོད་པས་འུར་རྡོ་འཕེན་སྐབས་འུར་ལྕེས་སྐད་སྒྲ་ཐོན་པ་དང་།ད་དུང་རྔ་དམར་གྱི་རྒྱན་ཡང་སྤྲས།འུར་རྡོ་ལེགས་པ་ནི་སྐུད་པ་དཀར་དམར་ལྷས་པའི་མིག་རིས་དགུ་ཡོད་པར་འུར་རྡོ་ཆུ་མིག་དགུ་སྒྲིལ་ཟེར།འུར་རྡོ་ནི་བོད་རིགས་ཞིང་འབྲོག་མང་ཚོགས་དང་།ལྷག་པར་འབྲོག་ཁུལ་དུ་ཕྱུགས་རྫི་བར་མེད་དུ་མི་རུང་བའི་སྟབས་བདེ་ལ་གོ་ཆོད་པའི་ལག་ཆ་བཟང་པོ་ཞིག་ཡིན།ཞིང་པས་ཞིང་སྲུང་དང་ནགས་སྲུང་།ཕྱུགས་རྫི་བ་རྣམས་ཀྱིས་ཕྱུགས་ཁྱུ་འདེད་འགུག ཕྱུགས་རིགས་ལ་གནོད་པའི་གཅན་གཟན་འགོག་པ་སོགས་བྱེད་ཐུབ་པ་མ་ཟད།ད་དུང་དགྲ་འཐབ་ཀྱི་ཐོག་མཚོན་ཆའི་གོ་ཡང་ཆོད་ཐུབ།དེ་སྔ་བོད་རབ་བྱུང་བཅོ་ལྔ་པའི་ཤིང་འབྲུག་1904ལོར་དབྱིན་ཇི་བཙན་རྒྱལ་རིང་རིང་ལུགས་པས་བོད་ལ་བཙན་འཛུལ་བྱེད་སྐབས་བོད་རིགས་མི་དམངས་ཀྱིས་དཔའ་ངར་ཆེན་པོས་བཙན་འཛུལ་པར་འགོག་རྒོལ་བྱེད་སྐབས་འུར་རྡོ་བེད་སྤྱོད་བཏང་ཡོད་ལ་ནུས་པ་ཡང་ཆེན་པོ་ཐོན་ཡོད་པར་གྲགས།བོད་རིགས་དམངས་ཁྲོད་ཀྱི་གཞས་ཚིག་ནང་དུ།འཇམ་པོའི་བལ་ལས་བཟོས་པའི།།འུར་རྡོ་ཆུ་མིག་དགུ་སྒྲིལ།།མུ་མིག་གཞུང་ནས་བརྒྱབ་པས།།དབྱིན་ཇིའི་སྣ་ལ་ཐེབས་སོང་།།ཞེས་གཞས་གཏོང་སྲོལ་ཡོད་འདུག །