སོན་རྩེ་ལས་བྱུང་བའི་ཀོ་བཟོའི་ཐོན་རྫས་སྣ་ཚོགས།

    དེང་རབས་ཀྱི་འཚོ་བའི་ནང་ཀོ་བའི་མཁོ་ཆས་ཀྱི་བེད་སྤྱོད་རིམ་བཞིན་ཇེ་ཉུང་དུ་འགྲོ་ཡི་ཡོད་སྟབས་ཀོ་ཆས་འཚེམ་བཟོ་བྱེད་མཁན་ཚོར་ཤུགས་རྐྱེན་ངེས་ཅན་ཐེབས་ཡོད་རུང་། བློ་རིག་བཀྲ་བའི་ལག་ཤེས་པ་ཚོས་མཛེས་ཤིང་སྟབས་བདེ་བའི་བཟོ་རྩལ་ཐོན་རྫས་བཟོ་རྒྱུར་ཁ་ཕྱོགས་པས།ཀོ་ཆས་ཀྱི་འཚོ་བའི་སྤྱོད་གོར་ཉམས་རྒུད་བྱུང་རུང་སྒྱུ་རྩལ་ཐོན་རྫས་ཀྱི་ཁྲོམ་རར་གསོན་ཤུགས་ཀྱི་དཔལ་འབར་བཞིན་ཡོད།

      ཨ་མྱེས་ཚེ་རིང་དོན་འགྲུབ་ཕ་བུ་གཉིས་ཀྱིས་བཟོས་པའི་ཀོ་བཟོའི་ཐོན་རྫས་ནི་གཙོ་བོ་བོད་ཀྱི་དངུལ་ཁུག་དང་། སྐེད་རགས། ཚྭ་ཁུག རྩམ་ཁུག ཀོ་ཁུག བསང་ཁུག རྟ་སྒ། ཀོ་རྔ་དང་ཀོ་གོས་སོགས་ཡོད་པ་དང་། ཁོང་གིས་བཟོས་པའི་ཀོ་ཆས་ཐོན་རྫས་ལ་ས་གནས་རང་གི་ཐུན་མོང་མ་ཡིན་པའི་རིག་གནས་ཀྱི་ཁྱད་ཆོས་ལྡན་ཡོད་དེ། དཔེར་ན་རྒྱལ་ཐང་ཡུལ་དུ་གཉེན་རྟགས་རྒྱག་སྐབས་ཀོ་ཡི་བཟོས་པའི་སྒལ་ཏ་འདི་ནི་མེད་དུ་མི་རུང་བ་ཞིག་ཡིན་ཏེ། སྒལ་ཏ་འདིའི་ནང་ཇ་དང་ཁ་བཏགས་སོགས་འཁྱེར་ནས་གཉེན་སློང་གི་འགྲོ་བ་རེད། ར་ཀོ་ལས་བཟོས་པའི་སྤུ་རིང་བོ་ཅན་གྱི་ཀོ་ལྭ་དཀར་པོ་ནི་འཇང་རིགས་ཀྱིས་གཉེན་སྟོན་བྱེད་སྐབས་དང་ཡང་ན་འཇང་གི་བྲོ་འཁྲབ་པའི་སྐབས་སུ་གོན་པའི་སྲོལ་རྒྱུན་གྱི་གྱོན་ཆས་ཞིག་ཡིན་པ་རེད། གཡག་ཀོ་ལས་བཟོས་པའི་སྐེད་རགས་འདི་ནི་རྒྱལ་ཐང་གི་བུད་མེད་རྣམས་ཀྱིས་ཐག་འཐག་སྐབས་བཀོལ་སྤྱོད་བྱེད་བཞིན་ཡོད་པས། ཀོ་བཟོའི་ཐོན་རྫས་རེ་རེ་ནི་རིག་གནས་ཀྱི་མངོན་ཚུལ་རེ་རེ་ཡིན་པ་རེད། གཞན་དུས་རབས་ཀྱི་འགྱུར་ཁུག་དང་ཁྲོམ་རའི་དགོས་མཁོ་དང་བསྟུན་ནས། འཛད་སྤྱོད་པའི་དགོས་མཁོ་ལྟར་ཀོ་ལས་བཟོས་པའི་ཡུལ་སྐོར་ཐོན་རྫས་འདི་དག་ལའང་ཡུལ་སྐོར་བ་དང་འཛད་སྤྱོད་པའི་དགའ་བསུ་ཐོབ་པ་མ་ཟད། ཁོང་ཚང་གི་ཐོན་རྫས་འདི་དག་བདེ་ཆེན་གྱི་རྫོང་སོ་སོ་དང་།ས་དམ་དང་ལན་ཕིང་སོགས་སུའང་བྲིན་ཁ་རྒྱུག་བཞིན་ཡོད་པ་རེད།

མི་རབས་ནས་མི་རབས་རྒྱུན་འཛིན་བྱེད་པའི་ཀོ་བཟོ་ལག་རྩལ།

    སེམས་ཀྱི་ཉི་ཟླ་གྲོང་ཁྱེར་གྱི་ཀོ་བཟོ་ལག་རྩལ་ནི་ཁྱིམ་རྒྱུད་ཀྱི་རྣམ་པའི་ཐོག་ནས་རྒྱུན་འཛིན་བྱེད་ཀྱི་ཡོད། ཡང་ཐང་གྲོང་རྡལ་མཐུན་སྒྲིལ་གྲོང་ཚོ་ཤིང་ཁུར་གྲོང་མི་ཚོ་ཆུང་གི་ཨ་མྱེས་ཚེ་རིང་དོན་འགྲུབ་ཚང་ཡང་གཅིག་འདྲ་གཅིག་ཏེ། ཁོང་ཚང་གིས་མི་རབས་ལྔའི་རིང་ལ་ཀོ་ཆས་ལག་རྩལ་འདི་རྒྱུན་འཛིན་བྱས་ཡོད། ཨ་མྱེས་ཚེ་རིང་དོན་འགྲུབ་ནི་མི་རབས་གསུམ་པ་ཡིན། ཁོང་གི་བུ་ནུ་བོ་ཡང་ཆུང་དུས་ནས་རང་གི་ཨ་ཕ་ལ་རོགས་ལས་བྱས་པ་དང་། 2015ལོ་ནས་དངོས་སུ་ཀོ་བཟོ་བཟོ་རྩལ་འདི་སྦྱང་ནས་ད་ལྟ་ལག་རྩལ་བྱང་ཆུབ་པ་ལྡན་ཡོད། བུ་ནུ་བོ་དང་ཚ་མོའི་མག་པ་གྲགས་པ་བློ་བཟང་ནི་ཀོ་བཟོ་ལག་རྩལ་གྱི་རྒྱུན་འཛིན་མཁན་མི་རབས་བཞི་བ་དང་ལྔ་བ་ཡིན་པ་རེད།

    2017ལོའི་ཟླ8པར།ཀོ་ཆས་བཟོ་རྩལ་དེ་བདེ་ཆེན་ཁུལ་གྱི་མངོན་མིན་རིག་གནས་ཤུལ་བཞག་ཁག་ལྔ་པའི་སྲུང་སྐྱོང་མིང་གཞུང་ནང་བཅུག་པ་དང་། 2018ལོར་ཨ་མྱེས་ཚེ་རིང་དོན་འགྲུབ་ལ་ཁུལ་རིམ་པའི་ཀོ་ཆས་བཟོ་རྩལ་རྣམ་གྲངས་ཀྱི་མཚོན་བྱེད་རང་བཞིན་གྱི་རྒྱུན་འཛིན་པའི་མིང་བསྩལ་བ་རེད།2019ལོར་ནུ་བོས་ཕ་བུ་གཉིས་ཀྱིས་བཟོས་པའི་ཀོ་ཆས་ཐོན་རྫས་དེ་ཧྲང་ཧའེ་མངོན་མིན་རིག་གནས་ཤུལ་བཞག་གི་འགྲེམ་སྟོན་དུ་ཞུགས་པ་རེད།2021ལོར་སེམས་ཀྱི་ཉི་ཟླ་གྲོང་ཁྱེར་རིམ་པའི་མངོན་མིན་རིག་གནས་ཤུལ་བཞག་རྒྱུན་འཛིན་པའི་མིང་བསྩལ་ལ།ད་ལྟ་ཁུལ་རིམ་པའི་མངོན་མིན་རིག་གནས་ཤུལ་བཞག་རྒྱུན་འཛིན་མཁན་དུ་གྱུར་ཡོད་པས།ཀོ་བཟོ་ལག་རྩལ་འདི་མི་རབས་ནས་མི་རབས་ལ་འཛིན་སྐྱོང་སྤེལ་གསུམ་ཐད་རང་ནུས་ཅི་ཡོད་འདོན་བཞིན་ཡོད།

ཀོ་རྔ།

    ཨ་མྱེས་ཚེ་རིང་དོན་འགྲུབ་ཀྱིས་གུང་ཁྲན་ཏང་གི་སྲིད་ཇུས་བཟང་པོའི་འོག་ང་ཚོའི་མི་རིགས་རིག་གནས་ལ་ཐུགས་ཁུར་དང་རྒྱབ་སྐྱོར་ལེགས་པོ་བྱས་ཡོད། ལག་རྩལ་འདི་ནི་ང་ཚོའི་མི་རིགས་ཀྱི་ཐུན་མོང་མ་ཡིན་པའི་རིག་གནས་ཡིན་པས། ང་ཚོས་མི་རབས་ནས་མི་རབས་ལ་རྒྱུན་འཛིན་བྱེད་རྒྱུ་དེ་ཤིན་ཏུ་གལ་ཆེ། དེ་བས་དེང་རབས་ཀྱི་ན་གཞོན་རྣམས་ཀྱིས་ཀོ་བཟོ་ལག་རྩལ་འདི་བཟོ་སྡུག་དཀའ་བ་དང་། ལས་ཚེགས་ལྗིད་པ་སོགས་མི་བསམ་པར་རྒྱུན་འཛིན་ཡག་པོ་བྱེད་དགོས་ཞེས་པའི་རེ་བ་བཏོན། བུ་ནུ་བོས་ཀྱང་ང་རང་ངེད་ཚང་གི་མི་རབས་བཞི་བའི་ཀོ་བཟོའི་སྒྱུ་རྩལ་པ་ཡིན།ངས་ཀྱང་རང་གི་ཕ་རྒན་བཞིན་ཀོ་བཟོ་ལག་རྩལ་འདི་འཛིན་སྐྱོང་སྤེལ་གསུམ་བྱེད་རྒྱུ་ཐད་ནུས་ཤུགས་ཡོད་དགུ་འབུལ་བཞིན་ཡོད། ལག་རྩལ་འདི་ལ་དགའ་ཞེན་ཡོད་པའི་སྐྱེ་བུ་གང་ཞིག་ཡིན་རུང་ང་རང་གིས་རིན་མེད་ཀྱི་སྒོ་ནས་ལག་རྩལ་འདི་འཁྲིད་ན་ཆོག   ང་རང་བདེ་ཆེན་ཁུལ་གྱི་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་ཞིག་ཡིན་པའི་ཆ་ནས་འདི་ནི་ང་རང་གི་ཕྲག་ཏུ་བབ་པའི་འོས་འགན་ཡིན་ཞེས་བཤད་བྱུང་།

འཇང་ལ་དང་ཀོ་བཟོའི་ཐོན་རྫས་སྣ་ཚོགས།