མི་ཉག་སྨུག་རོང་གི་ས་ཆའི་གནས་མཆོག་རྡོ་རྗེ་ཕག་མོ་རི་ཞེས་པ་འདི་ནི་འར་བ་གཏེར་སྟོན་མི་འགྱུར་ཐེག་མཆོག་རྡོ་རྗེས་གནས་སྒོ་ཕྱེས་ཞིང་བྱིན་གྱིས་བརླབས་པའི་གནས་ཁྱད་པར་བ་ཞིག་སྟེ་ཡུལ་མི་རྣམས་ཀྱིས་དཀྱིལ་མེར་ཆ་གནས་ཞེས་འབོད་བཞིན་ཡོད། གནས་སྒོ་ཕྱེས་ནས་ད་བར་ལོ་བརྒྱ་ཕྲག་གཅིག་ལྷག་འདས་ཟིན།གནས་མདུན་ན་དཀྱིལ་མེར་ཆོས་འཁོར་རྣམ་རྒྱལ་བྱང་ཆུབ་གླིང་ཞེས་པའི་ལྷ་ཁང་རྙིང་པ་ཞིག་ཡོད། དེང་སང་ཡང་དེའི་ནང་ན་རྣམ་པར་བཀྲ་ཞིང་ལོ་རྒྱུས་མཚོན་པའི་ལྡེབས་རིས་རིན་ཐང་ཅན་མང་པོ་བྲིས་འདུག་པའི་ནང་ཤིན་ཏུ་གསལ་བའི་འར་བ་གཏེར་སྟོན་སྐུ་འཁོར་བཅས་ཀྱི་རི་མོ་དང་སྨུག་རོང་ཡུལ་གྱི་གནས་རི་དང་གཞི་བདག་སོགས་ཀྱི་ལྡེབས་རིས་སྣ་ཚོགས་བཞུགས་ཡོད་པ་མཇལ་ཐུབ། ལོ་རེ་བཞིན་ཟླ་བ་བརྒྱད་པའི་ཚེས་བརྒྱད་ལ་གནས་འདུས་ཉིན་གཅིག་དང་། ཟླ་བ་ལྔ་པའི་ཚེས་བརྒྱད་ལ་ཉིན་གཅིག་བཅས་ལོ་གཅིག་ལ་གནས་འདུས་ཐེངས་གཉིས་ཡོད། གནས་འདི་ལ་ཕྱག་སྐོར་སོགས་བྱས་ན་སྤྱིར་དགེ་བ་འགྱུར་ཐེངས་ཆེ་ལ།དེ་ལས་ཀྱང་གནས་འདུས་སོགས་དུས་ཆེན་ལ་ཕྱག་སྐོར་བྱས་ན་འབུམ་འགྱུར་གྱི་དགེ་བ་ཡོད་པར་མ་ཟད་ཚེ་འདིར་ཁ་དགེ་བཀྲ་ཤིས་འབྱུང་ཞིང་རྐྱེན་ངན་བར་ཆད་ཟློག་པ་དང་།  བྱིས་པ་ཆུང་སྲིད་ཅན་བསྐྱབ་ན་ནད་ཅན་ཕན་པ་ཆེ་བས་དེར་ཡོད་ཀྱི་མི་སེར་ཚང་མས་བྱིས་པ་སྐྱབས་རྒྱུའི་སྲོལ་ད་བར་ཆགས་ཡོད་པ་དང་། ཁྱིམ་ཚང་བུ་རྒྱུད་མེད་མཁན་ཡིན་ནའང་དེར་སྐྱབས་ན་བུ་ཚ་འབྱུང་ཞིང་བྱིས་གསོ་སླ་ཞིང་བར་ཆད་མེད་པར་བདེ་ལེགས་ངང་འཚར་ལོང་འབྱུང་བས་མ་ཚད་རིག་པ་བཀྲ་ཞིང་མཁས་པར་འགྱུར་བར་བྱིན་རླབས་མངོན་སུམ་འབྱུང་བ་སོགས་བསླུ་བ་མེད་པའི་བྱིན་རླབས་ཡོད་པར་གསུངས་སོ། །