གནས་གསར་རམ་ཧེ་བདེ་མཆོག་ཅེས་པའི་གནས་རི་ངོ་མཚར་ཅན་འདི་ནི་ བདེ་མཆོག་གསང་བ་ཆེན་པོའི་གནས་ཡིན་ལ། རྒྱལ་སྲས་བསོད་ནམས་སྟོབས་རྒྱལ་ལམ་པདྨ་འཇིགས་མེད་ཆོས་ཀྱི་དབང་པོ་ནི་སློབ་དཔོན་ཧུང་ཆེན་ཀ་རའི་རྣམ་སྤྲུལ་ཡིན་ལ་སེང་གདོང་མའི་གཏེར་ལུང་དུ་རྒྱལ་གཉིས་འཕྲད་པའི་བསྟན་པའི་མེ་རོ་གསོ་ཞེས་ཆོས་བདག་རྒྱལ་གྱི་མིང་ཅན་གཉིས་འབྱུང་བར་གསུངས་པའི་ཡ་གྱལ་སྟེ་ཚད་མར་གྱུར་པའི་རིག་སྔགས་འཆང་ཆེན་པོ་མཁས་ཤིང་གྲུབ་པ་བརྙེས་པའི་སྐྱེ་བུ་དེས་གནས་སྒོ་ཕྱེས་པ་ཡིན། གནས་འདི་ཡོད་ས་ནི་སྨུག་རོང་ས་ཆའི་ཀོ་དོ་མདོའི་ཡར་ཅུང་ཙམ་སོང་བའི་རྒྱ་མེ་སུམ་མདོར་མ་སླེབས་པའི་བར་ཟར་ཟླའི་ཕ་རོལ་ཏེ་རྒྱ་མེ་རིའི་ཕྱོགས་ན་ཡོད། སྐོར་ལམ་གཅིག་ལས་མེད་ལ་དལ་མོ་སོང་ན་ཆུ་ཚོད་གསུམ་ཙམ་གྱིས་སྐོར་བ་རེ་འཁོར། གནས་རྟགས་རང་བྱོན་ནི་སྐོར་ལམ་གཡས་གཡོན་གྱི་བྲག་ལ་ཨ་སོགས་ཡི་གེ་དང་སྐྱེས་ཆེན་དམ་པའི་ཞབས་རྗེས་སོགས་ཡོད་པར་གསུངས། ཁྱད་པར་དུ་སྒྲུབ་ཕུག་ངོ་མཚར་ཅན་ཡོད་ལ་སྔོན་བྱོན་གྱི་སྐྱེས་ཆེན་དམ་པ་མང་པོ་བཞུགས་ནས་སྒྲུབ་པ་ཉམས་ལེན་གྱི་འབྲས་རྟགས་ཐོབ་པའི་ལོ་རྒྱུས་སོགས་དད་པ་དང་དང་བ་འདྲེན་པའི་གནས་ཚུལ་མང་པོ་བྱུང་འདུག  སྒྲུབ་ཕུག་ནི་གནས་ཀྱི་སྲིབ་ཕྱོགས་ན་ཡོད་པར་གསུངས། གནས་འདིར་གྲུབ་ཆུ་ཁྱད་ཆོས་ཅན་ཡང་ཡོད་པས་གྲུབ་ཆུ་འཐུང་བ་དང་ཕྱག་སྐོར་བྱས་ན་བད་ཀན་སྨུག་པོའི་ནད་དང་ཕོ་བ་ཁ་འཁོར་སོགས་གསོ་དཀའ་བའི་ནད་མང་པོར་ཕན་པ་མྱོང་གྲུབ་ཡོད། ད་དུང་གནས་འདི་ལ་ཆུང་སྲིད་སྐྱབས་ནའང་ཕན་པ་ཆེ་ཞེས་ཡུལ་མི་རྣམས་ཀྱིས་བཤད་དོ། །གནས་ཀྱི་སྐོར་ལམ་དུ་བར་དོའི་འཕྲེང་ལམ་འཕྲེང་རིང་མ་ཞེས་པའི་ཕུག་པ་རིང་པོའང་མཇལ་རྒྱུ་ཡོད་དོ། །གནས་འདི་ལ་གནས་མདུན་ནས་རིམ་པ་ལྟར་གཡས་སུ་བསྐོར་ནས་འགྲོ་དགོས། གནས་མགོར་ལ་རྩེ་ཡོད་པས་དེ་ལ་བསང་མཆོད་བྱས་ན་ལོ་རེར་ལམ་འགྲོ་ཆེ་བ་དང་ཞིང་པར་ལོ་ལེགས་ཐོབ་ཅིང་འབྲོག་པ་ལ་ཕྱུགས་ཀྱི་འཕེལ་ཁ་རྒྱས་པ།  ཚོང་ལས་མཁན་ལ་ཚོང་གི་ཁེ་ཁ་མཐོ་བ་སོགས་བསམ་དོན་ལྷུན་གྱིས་འགྲུབ་པའི་རྟགས་དང་འབྲས་བུ་ཐོབ་པ་སྔོན་བྱོན་དམ་པས་གསུངས་སོ། །