ཁམས་མི་ཉག་སྨུག་རོང་ཡུལ་གྱི་གནས་མཆོག་མཁའ་འགྲོ་འབུམ་རྫོང་ཊཀྐི་འབུམ་རྫོང་ནི་སྙིང་རི་རིན་ཆེན་འབར་བའི་གཡས་ན་གནས་ཤིང་ཡུལ་སྐད་དུ་དགུ་དབུ་ཞེས་ཟེར།གནས་སྒོ་ཕྱེ་མཁན་ནི་བླ་མ་ཚེ་དབང་འགྱུར་མེད་ཡིན།
གནས་ཀྱི་ཁྱད་ཆོས་སྐོར་ལ། གནས་རྟགས་རང་བྱོན་སོགས་ནི་མཁའ་འགྲོ་འབུམ་གཏེར་ཞིག་གི་བསྟི་གནས་ཡིན་པའི་རྒྱུ་མཚན་གྱིས་ཊཀྐི་འབུམ་རྫོང་ཞེས་འབོད་པ་ཡིན།  ༼ཊཀྐི་ནི་མཁའ་འགྲོ་ཞེས་པའི་དོན་ཡིན། ༽གནས་འདུས་དང་དུས་ཆེན་སྐབས་གནས་རིར་ཡོད་པའི་ལྗོན་ཤིང་གི་ལོ་མ་རེ་རེ་ལ་མཁའ་འགྲོ་མའི་སྐུ་འདྲ་རེ་རེ་མཇལ་རྒྱུ་ཡོད་པའི་གནས་ཚུལ་ངོ་མཚར་ཅན་ཡུལ་མི་རྒན་གཞོན་རྣམས་ལ་བཤད་རྒྱུ་འདུག དེ་མིན་བོན་སྲས་སྟག་ལྷ་མེ་འབར་གྱི་ཞབས་རྗེས་དང་མ་ཅིག་སྲིད་པ་རྒྱལ་མོའི་དྲེའུ་རྗེས་དེ་མིན་གྱི་ཕྱག་རྗེས་དང་ཞབས་རྗེས་སོགས་དང་སྟག་ལྷ་མེ་འབར་གྱི་སྟག་རྗེས་རང་བྱོན་བཅས་སྣ་ཚོགས་བསམ་མི་ཁྱབ་པའི་རང་བྱོན་གྱིས་ཁྱབ་པར་གནས་སོ། ། དེ་ལས་ཀྱང་ངོ་མཚར་བ་ཞིག་ལ་སྒྲུབ་ཕུག་གསུམ་ཡོད་པ་ནི་སྐུ་གསུམ་མཁའ་འགྲོའི་བྱིན་རླབས་དང་དངོས་སྒྲུབ་འབྱུང་བའི་གསེར་གྱི་སྒྲུབ་ཕུག་དང་ཟངས་ཀྱི་སྒྲུབ་ཕུག་ཤེལ་གྱི་སྒྲུབ་ཕུག་བཅས་ཡིན་ལ།  དེ་ནི་སྟོན་པ་གཤེན་རབ་དང་གུ་རུ་པདྨ་འབྱུང་གནས་སོགས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བྱིན་གྱིས་རླབས་ཤིང་ལོ་ཆེན་བེེ་རོ་ཙ་ན་དང་ཚེ་དབང་རིག་འཛིན་སོགས་དམ་པ་དུ་མས་སྒྲུབ་གནས་མཛད་མྱོང་བའི་གནས་ཁྱད་འཕགས་ཅན་ཡིན་ནོ།  །གནས་ཀྱི་མཛད་སྒོ་བྱ་འགུལ་སྐོར་ལ། ཡུལ་སྡེ་དེར་གནས་མི་སེར་རྣམས་ཀྱིས་ལོ་རེ་བཞིན་བསང་དང་ཚོགས་མཆོད་འབུལ་བའི་ལས་འགུལ་དང་ཕྱག་སྐོར་བ་བྱེད་པའི་ལུགས་སྲོལ་བཟང་པོ་སོགས་ཡོད། གནས་དེ་ལ་སྐོར་བ་དང་ཕྱག་མཆོད་སོགས་སྒྲུབ་པའི་ཕན་ཡོན་དང་གནས་འདུས་ཀྱི་དུས་ཚོད་སོགས་གནས་ཡིག་ནང་གསལ་པོ་ཡོད་ཚོད་རེད་ཀྱང་དེང་སང་གི་མི་རྣམས་སེམས་རྒྱ་དོག་ཅིང་ཡིད་ཆེས་དང་མཉམ་འབྲེལ་གྱིས་ཕ་ཡུལ་སྤྱི་ལ་ཕན་པའི་བྱ་བ་བསྒྲུབ་རྒྱུའི་སེམས་པ་དམའ་བའི་རྐྱེན་སོགས་སྣ་ཚོགས་ཀྱི་དབང་གིས་གནས་ཡིག་གཡར་བ་དང་ལྟ་བ་བཅས་ཀྱི་གོ་སྐབས་ཐོབ་མ་སོང་བར་བརྟེན་ཤིན་ཏུ་རྒྱས་ཤིང་གསལ་བ་ཞིག་འདིར་ངོ་སྤྲོད་བྱེད་ཐབས་མ་བྱུང་བས་ཀུན་ཀྱིས་དགོངས་པ་ཡངས་མོ་གནང་བར་ཞུའོ། །