སློབ་མ་ཚང་མར་རང་ལ་ཆ་རྒྱུས་ཡོད་པའི་སློབ་གྲོགས་རེ་ཡོད་ལ།  བདག་ལའང་བག་ཆགས་ཟབ་མོ་རེ་བཞག་མྱོང་བའི་སློབ་གྲོགས་ཤིག་ཡོད།  ཁོ་མོའི་ཕྲ་ཞིང་རིང་བའི་སྐུ་གཟུགས་དང་།  སྒོར་ཞིང་དཀར་བའི་ངོ་གདོང་།  སྤྱང་གྲུང་ལྡན་པའི་རྣམ་འགྱུར་སོགས་ནི་རྡོ་བརྐོས་ཀྱི་རི་མོ་བཞིན་ངའི་སེམས་ནས་ནམ་ཡང་བརྗེད་ཐབས་མེད།
གནམ་ངོ་ཧ་ཅང་དྲོ་བའི་ཉིན་གུང་ཞིག་ལ།  ང་དང་སློབ་གྲོགས་གཉིས་རྩྭ་ཐང་དུ་འགྲོ་སྐབས།  ལམ་དུ་ས་འཇུབ་འབུ་ནག་ཅིག་སྐམ་ནས་ཤི་གྲབས་བྱེད་བཞིན་ཡོད།  ངའི་གྲོགས་མོ་ཡིས་དེ་མཐོང་མ་ཐག་ཧ་ཅང་བྲེལ་འཚབ་ཀྱིས་ངང་ནས་ང་ལ།  ངེད་གཉིས་ཀྱིས་འབུ་དེའི་སྲོག་སྐྱོབ་དགོས་ཞེས་ཟེར་ཞོར་དུ་ས་ལ་བུ་ག་ཆུང་ཆུང་ཞིག་བརྐོས་ནས་ཧ་ཅང་ལག་འཇམ་དང་ཡིད་གཟབ་ཀྱིས་སྒོ་ནས་འབུ་དེ་སུ་རུ་ཐུར་མ་ཞིག་གིས་ཡར་བླངས་ནས་ས་ཡི་བུ་གའི་ནང་ལ་བཞག་ཅིང་ཐོག་ཏུ་ས་ནག་རློན་པ་ཅུང་ཙམ་ཞིག་གིས་བཀབ།  ངས་ཁོ་མོའི་ལས་སྟངས་ལ་བལྟས་པ་ན་ཁྲེལ་དགོད་ཤོར་བཞིན་ཁོ་མོ་ལ་དེ་འདྲའི་འབུ་ནག་བཙོག་པ་ཞིག་སྐྱོབ་མཁན་ཡོད་དམ།  སྐལ་མེད་སར་སྐེ་མ་སྲིངས་ཞེས་བཤད་པ་ན།  ཁོ་མོ་ཁོང་ཁྲོ་སྤུ་ཙམ་ཡང་མི་ལངས་པར་སེམས་ལྷོད་ལྷོད་ཀྱིས་ང་ལ་སློབ་གྲོགས་ལགས།  དེར་བལྟས་ན་ཧ་ཅང་བཙོག་པ་ཞིག་འདུག་ཀྱང་།  སྲོག་ལྡན་ཅི་འདྲ་ཞིག་ཡིན་རུང་དེ་རྣམས་ལ་དཀའ་ངལ་དང་སྡུག་བསྔལ་གྱིས་མནར་དུས་རོགས་རམ་བྱེད་དགོས།  དེ་ལྟར་བྱས་ན།  རང་ལ་དཀའ་ངལ་བྱུང་དུས་གཞན་གྱིས་རོགས་རམ་བྱེད་མཁན་བྱུང་བ་ལྟ་བུའི་དགའ་སྤྲོ་ཡོད་ཅེས་གཟབ་ནན་ངང་བཤད་བྱུང་།
ངས་ཁོ་མོའི་སྐད་ཆ་ལ་འདང་རྒྱག་གིན་རྒྱག་གིན་བདེན་པ་རེད།  རྒྱུ་མཚན་འདུག་སྙམ་བཞིན་ང་རང་ཉིད་ཀྱི་བསམ་སྟངས་དང་ལས་སྟངས་ལ་འགྱོ ད་ཅིང་ངོ་ཚ་ནས།  ཕལ་ཆེར་སློབ་གྲོགས་ཀྱི་མདུན་དུ་འགྲོ་མི་ཕོད་པའི་སྣང་བ་ཞིག་སྐྱེས་བྱུང་ལ།  སྐད་ཆའང་བཤད་རྒྱུ་མེད་པ་ཞིག་ཏུ་གྱུར་སོང་།  ཡིན་ན་ཡང་གྲོགས་མོས་ངའི་རྣམ་པ་དེ་མཐོང་ནས་འཛུམ་དམུལ་དམུལ་གྱིས་ཀུ་རེ་དང་བཅས་སེམས་སྡུག་མ་བྱེད།  ནོར་འཁྲུལ་ཡོ་བསྲང་བྱེད་ཐུབ་ན་སློབ་མ་བཟང་པོ་ཡིན་ཞེས་དགེ་རྒན་གྱིས་བཤད་པ་མ་ཡིན་ནམ་ཞེས་ང་ལ་སེམས་གསོ་བྱས།ངས་ཁོ་མོའི་འཛད་མེད་ཀྱི་བརྩེ་སེམས་དང་།  བླ་མེད་ཀྱི་གཤིས་རྒྱུད་ལ་སློབ་སྦྱོང་བྱེད་ན་བཟང་འདུག་སྙམ།