ངའི་འཇིག་རྟེན་འདིར་ཆེས་གུས་པར་འོས་པའི་ཕ་མ་ལགས། བུ་ཆུང་ངས་ད་བར་དུ་ཁྱོད་ལ་དྲིན་ལན་འཇལ་མེད། དྲིན་ལན་གཟོ་དགོས་པའང་སེམས་ལ་དྲན་མ་མྱོང་། ད་ལྟ་འདང་རེ་བརྒྱབ་ན། ཁྱེད་གཉིས་ཀྱིས་ང་ལ་ཅི་ཞིག་མཁོ་བ་ནམ་མཁའི་སྐར་མ་ཡིན་ཡང་སྟེར་ཐབས་བྱས་པ་རེད། གླེན་ཕྲུན་ངས་ད་གཟོད་དྲིན་ལན་ཞེས་པ་ནི་ཁ་ནས་བཤད་པ་ཙམ་གྱིས་མི་ཆོག་པ་ཤེས་སོང་།

བུ་ཆུང་ངའི་སྲོག་གི་ཀ་བ་ཆེན་པོ་ལགས། ཁྱེད་ཀྱིས་སྒོ་ང་ཡིན་དུས་གཅུར་དུ་མ་བཅུག། བྱེའུ་ཕྲུག་ཡིན་དུས་གསོད་དུ་མ་བཅུག་པར་གཉོར་སྐྱོང་གང་ལེགས་བྱས་ཀྱང་། བུ་ཆུང་ངས་ཁྱེད་ལ་སླ་མོ་དཀའ་བར་འགྱུར་བྱེད་ཀྱི་དོན་དག་གང་མང་བསྒྲུབས་ནས་ཡོང་། ངས་སྐབས་རེར་ང་ནི་ཁྱེད་ཀྱི་གཅེས་ཕྲུག་མ་རེད་ཀྱང་བསམས་མྱོང་། བསམ་བློ་ཞིབ་ཏུ་བཏང་ན། ཁྱེད་རང་སྟོད་རྒྱ་གར་ནས་སྨད་རྒྱ་ནག་ཏུ་སོང་ཡང་། དམའ་བ་རླངས་འཁོར་ནས་མཐོ་བ་གནམ་གྲུར་བསྡད་ཀྱང་། ཕྱི་རྒྱ་མཚོ་ནས་ནང་སྐམ་ས་རུ་ཐོན་ཡང་ཁྱེད་ཀྱི་སེམས་ན་ནམ་ཡང་ང་རང་མ་གཏོགས་མི་འདུག།

ང་རང་ཆུང་དུས་སུ་ཕ་མ་གཉིས་ཀྱིས་ཁྲིད་ནས་མཆོད་མཇལ་དུ་འགྲོ་དུས། མི་ནི་གྲོག་ཚང་བརྡོལ་བ་བཞིན་ཧ་ཅང་མང་། འོན་ཀྱང་ཕ་མས་ངའི་ལག་པ་ནས་བཟུང་སྟེ་ལྷོད་ཙམ་ཡང་མི་བྱེད། ང་རང་པྲ་ཆལ་ཡིན་པས་དོན་མེད་ཀྱི་བྱ་བའི་སྟེང་ནས་ཀྱང་ཕ་མར་སེམས་ཁུར་གང་མང་བཟོས་སོང་། ད་ལྟ་བསམས་ན་འདི་ནི་ཡིད་སེམས་ལ་འདང་རྒྱག་ཡོང་བའི་དོན་དག་ཅིག་མ་རེད་དམ།

ལྟད་མོ་ཡག་པོ་ཡོད་ན་ང་ལ་བལྟ་རུ་བཅུག། གོན་པ་ཡག་པོ་ཡོད་ན་ང་ལ་གོན་དུ་བཅུག། ཟ་མ་ཞིམ་པོ་ཡོད་ན་ང་ལ་བཟའ་རུ་བཅུག། བྱ་བ་དེ་དག་དྲན་ན་ང་རང་ཡིད་སེམས་སྐྱོ་བྱུང་། ཆུང་དུས་ནས་ཕ་མའི་དྲིན་ལན་གཟོ་བར་བསམ་བློ་གཏོང་དགོས། ང་ཚོ་རང་ཉིད་རྒས་པའི་དུས་སུ་ཕ་མའི་དྲིན་ལན་འཇལ་འདོད་ཀྱང་ཕ་མ་བཞུགས་མིན་ཅི་ཆ། གལ་ཏེ་ཕ་མ་བཞུགས་ཀྱང་ཁྱོད་ཀྱིས་ཕུལ་བའི་ཟ་མ་དག་ཕ་མས་མཆོད་རྒྱུ་ཡང་དཀའ་མོ་རེད། དེ་བས། ཆུང་བྱིས་པའི་དུས་ནས་ཕ་མའི་དྲིན་ལན་ཇི་ལྟར་འཇལ་བར་བསམ་བློ་གཏང་དགོས། ང་ཚོར་ཕ་མར་ཞབས་ཞུ་བསྒྲུབ་པའི་ནུས་པ་ཆེན་པོ་མེད་རུང་། ང་ཚོས་ཕ་མ་དགའ་བའི་གཏམ་སྙན་བཤད་ན་ཆོག། ང་ཚོ་བོད་ལ་དྲིན་ཕ་མ་དགའ་ན་དྲིན་ལན་ཡིན་ཟེར་བའི་གཏམ་དཔེ་ཡང་ཡོད་པ་མ་ཡིན་ནམ།

རང་ཉིད་ཆུང་དུས་ནས་སློབ་གྲྭར་སྐྱེལ་མཁན་གྱི་ཕ་མ་དེ་ནར་སོན་དུས་རྒན་གསོ་ཁང་དུ་སྐྱེལ་མཁན་ནི་ཆེས་གདུག་རྩུབ་ཅན་གྱི་མི་དག་ཡིན་པས། ང་ཚོས་དེ་ལྟར་རྒྱུ་འབྲས་མེད་པའི་བྱ་བ་མི་བསྒྲུབ་པ་ནི་གལ་ཆེན་ནང་གི་དོན་ཆེན་དང་དོན་ཆེན་ནང་གི་འགངས་ཆེན་ཞིག་རེད།