གོ་སྐབས།

ཅོ་བྱང་སྐར། 2016-09-05

རྫོང་ཨུའི་ཧྲུའུ་ཅི་ཉི་མ་ཉིན་འདི་དག་སུན་སྣང་ཞིག་གི་ངང་ལུས་འདུག
ནོར་སྲིད་ཅུས་ཀྱི་ཅུས་ཀྲང་སྐལ་ལྡན་གྱིས་ལས་འཁྱུར་ངལ་གསོ་བྱས་ཟིན་ལ་ཤ་ཡོད་སར་འབུ་འཁོར་བའི་རང་བཞིན་གྱིས་སྐལ་ལྡན་གྱི་གོ་གནས་དེ་ལ་མི་ཚང་མས་རེ་བ་དང་ཧམ་སེམས་ཟུང་འབྲེལ་གྱིས་མི་གཞན་པ་བརྒྱུད་པ་དང་རང་ཉིད་དངོས་སུ་སོང་བ། གང་ལྟར་ཆང་དང་ཐ་མག་ལ་སོགས་གོང་ཆེན་ཉོས།  ཤོག་ཐུམ་དུ་སྒོར་མོ་བཅུག་ནས་ཕུལ་བ་སོགས་ཉིན་འདི་དག་ལ་ཉི་མ་ཚང་ལ་ཡོང་བའི་མགྲོན་པོ་རྒྱུན་ཆད་མེད་ལ།  གནས་ལུགས་ཡོད་པ་དང་ཁ་གཡར་ས་རེ་བཙལ་ནས་ཁ་ཡག་དང་ངོ་འཛུམ་གྱིས་ལག་སྐྱེས་འབུལ་བཞིན་འདུག  བསམ་ཡུལ་ལས་འདས་པ་ལ་སྐབས་ལ་ལར་བུད་མེད་མཛེས་མའང་ལེགས་སྐྱེས་སུ་འབྱོར།
འེ། དེང་སྐབས་ཀྱི་ལས་བྱེད་པ་འདི་ཚོའི་སེམས་ལ་ཅི་ཞིག་དྲན་གྱིན་ཡོད་པ་ཧ་མི་གོ་བ་དང་།  ཉི་མ་ཁོང་གཞུང་ལས་ཁང་དང་ཁྱིམ་སོགས་ནས་འདུག་མ་ཐུབ་པར།  སྲིད་གཞུང་གི་སྣེ་ལེན་མགྲོན་ཁང་དུ་ཁང་བ་ཞིག་གླས་ཏེ亮剑ཞེས་པའི་ལེའུ་ཅན་གྱི་གློག་བརྙན་ཞིག་ལ་བལྟས་ཏེ་ཉི་མ་འཁྱོལ་ཐབས་ངང་ལུས་འདུག
གློག་བརྙན་ལ་ལྟ་བཞིན་ལྟ་བཞིན་གློ་བུར་དུ་ཉི་མའི་མིག་ཟུང་ཇེ་ཆེ་དང་ངོ་ལ་འཛུམ་མདངས་ཤིག་ཐོན་བྱུང་།
ཚོགས་ཐོག་ཏུ།  ཉི་མས་བཤད་རྒྱུར། སྐལ་ལྡན་གྱི་གོ་གནས་དེ་སུས་ཀྱང་ཐག་གིས་བཅད་མི་ཐུབ། གྲོང་ཁྱེར་ཨུ་ཡོན་ལྷན་ཁང་གི་ཧྲུའུ་ཅི་རྟ་རྡོའི་ཤ་ཉེ་ཞིག་ང་ཚོའི་སར་ལས་གནས་སྤར་ནས་ཡོང་རྒྱུ་དང་ཁོའི་ལས་གནས་དེ་རྟ་རྡོས་དངོས་སུ་བཀོད་སྒྲིག་བྱ་རྒྱུ་ཡིན་ལ་སྐལ་ལྡན་གྱིས་ལས་འཁྱུར་ངལ་གསོ་བྱས་ཡོད་པའང་ཁོས་ཤེས་ཡོད་ཅེས་བཤད། ཉི་མས་བཤད་མ་ཚར་གོང་སྐད་མགོ་ཅུང་དམའ་མོས་རྟ་རྡོའི་བཀོད་སྒྲིག་ལ་སུས་ཕོག་ཐུག་གཏོང་ཐུབ་གི་ངས་གཅིག་བལྟ་ཟེར།
ཚང་མས་རྟ་རྡོ་དང་ཁོའི་ཤ་ཉེ་གཉིས་ཀྱི་འབྲེལ་བ་དེ་འདྲ་མི་ལེགས་པ་ཤེས་ཡོད་མོད་འོན་ཀྱང་ད་ཐེངས…………།  མི་ལ་ལས་ཁོ་གཉིས་འབྲེལ་བ་ཇི་འདྲ་མི་བཟང་རུང་རུས་པ་ཆག་སོང་རུང་རྩ་རྒྱུས་ཀྱིས་སྦྲེལ་ཡོད་སྙམ།
ཉིན་འགའི་རྗེས་སུ་རྫོང་ཨུ་ནས་བརྡ་སྦྱོར་འབྱོར་ལ་རྟ་རྡོའི་ཤ་ཉེ་ཡིས་ནོར་སྲིད་ཅུས་ཀྱི་ཅུས་ཀྲང་གི་འགན་འཁུར་ཡོད་པ་ཐག་གིས་བཅད་ཟིན།
ཐེངས་ཤིག  ཉི་མ་ཆང་གིས་བཟི་ཡོད་ལ་མི་འགས་ཁོ་དང་མཉམ་དུ་ཁ་བརྡ་བྱས།  ནོར་སྲིད་ཅུས་ཀྱི་ཅུས་ཀྲང་དེ་དོན་ངོ་མ་ཧྲུའུ་ཅི་རྟ་རྡོའི་བཀའ་ཡིན་ནམ།  ཉི་མས་གསལ་ལ་མི་གསལ་བའི་སྒོ་ནས། ཕཱེ། མི་འདི་འདྲ་མང་པོ་ཞིག་གོ་སྐབས་འདིའི་ཆེད་ལ་ཉིན་མཚན་དུས་དྲུག་ལ་ཕྱོགས་བཞི་མཚམས་བརྒྱད་ལ་རྒྱུག རྒྱུ་ཤུགས་དང་མི་ཤུགས་སོགས་ཇི་འདྲ་མང་པོ་ཞིག་མ་བཏང་མེད་དམ། གཞན་པའི་ལེགས་སྐྱེས་སྒོར་མོ་དང་དངོས་པོ་སོགས་བླངས་ཟིན་ལ། ཁ་ངོ་ཡང་བྱིན་ཟིན། འོན་ཀྱང་ཚང་མའི་དམིགས་ཡུལ་ནོར་སྲིད་ཅུས་ཀྱི་ཅུས་ཀྲང་གི་གོ་གནས་རེད། ནོར་སྲིད་ཅུས་ཅུས་ཀྲང་གི་གོ་གནས་གཅིག་མ་གཏོགས་མེད་པས་སུ་ཞིག་ལའང་ཕོག་ཐུག་བཏང་ན་མི་འགྲིག  དེ་བས་ཧྲུའུ་ཅི་རྟ་རྡོའི་ཤ་ཉེ་ལ་སྦྱིན་ན་སུས་ཀྱང་ཁ་གྲག་མི་ཐུབ་ལ།  ཧྲུའུ་ཅི་ཡང་དགའ་བར་མ་ཟད་རྗེས་ཕྱོགས་ཐུགས་ཀྱིས་ལྟ་སྐྱོང་ཡང་ཡོད་པས་མདའ་གཅིག་གིས་ཤྭ་བ་གཉིས་གསོད་པ་མ་རེད་དམ་སྙམ།  མགོ་བོ་ཕྱིར་དགྱེས་ནས་ཅུང་ཙམ་བསྡད་རྗེས་འདྲེ་ཕྲུག་དེ་ལ་ཁེ་ཕན་ཆེན་པོ་ཞིག་ཐོབ་སོང་མོད། བསམ་པ་བཟང་པོ་ཞིག་ཡོད་དེ། ད་ལོའི་ལོ་སར་སྐབས་ངེད་ཚང་ལ་ཆེད་དུ་ལོ་སར་གྱི་ལེགས་སྐྱེས་བསྐྱལ་ནས་ཡོང་ཐལ་བསམས།

གོ་སྐབས།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10