སེམས་སྡུག་ནི་སྔར་ནས་ཡོད་མ་མྱོང
གོམ་བགྲོད་རེ་རེ་ནི་རང་དབང་གི་གླུ་དབྱངས་རེ་རེ་ཡིན
ངལ་དུབ་ནི་ནམ་ཡང་ཚོར་མྱོང་མེད་ལ
དབུགས་ཐེངས་རེ་རེ་ནི་སྟོབས་ཤུགས་ཀྱི་གཟུགས་བཪྙན་རེ་རེ་ཡིན
ང་རང་དབེན་འཇམ་གྱི་གཉིད་ལས་སད་ཚེ
ཁུ་སིམ་མེར་གཏན་ནས་སྡོད་མི་ཐུབ
ང་རང་རི་ཀླུང་གི་ཕང་དུ་སླེབས་ཚེ
སོས་དལ་དུ་གནས་རྒྱུ་ཤིན་ཏུ་དཀའ
མི་ཚོས་སྣང་མེད་དུ་གཏོང་བའི་ལུང་སྟོང་དུ
ང་དང་སྤེན་རྩྭའི་ཉམས་འགྱུར་ལས་བུས་པའི་ཤུ་སྒྲ་དེ
གྲོགས་མེད་ཁེར་རྐྱང་པའི་སྐྱོ་གླུ་ཞིག་ཡིན་ལ
ང་དང་རིལ་མ་རྐང་མེད་ཀྱིས་འཁྲབ་པའི་བྲོ་གར་དེ
ས་གཞི་ཡི་འཁོར་མཚམས་མ་ཆད་པའི་མཚོན་རྟགས་ཤིག་ཀྱང་ཡིན
བཞུད་ཁའི་ཉི་འོད་དང་ཁྲ་ཆུང་གི་འུར་རྡོས
དཀར་ནག་གི་ཕྱུགས་རིགས་དག་རྩྭ་ཐང་ནས་བསྡུས་ཏེ
ལྷས་ར་གྲུ་བཞི་རུ་བརྫངས་ཀྱང—
བདག་གིས་ཞོགས་པའི་སྐྱ་རེངས་ལ་འབོད་བརྡ་གཏོང་གིན་ཡོད
མཐའ་ཡས་ཆུ་གཏེར་གྱི་འཇིག་རྟེན་ས་འོག་ཏུ་ནུབ
རླུང་རྟེན་དར་གྲུ་ཡི་གྲིབ་མ་ཆ་མེད་དུ་ཡལ
གྲངས་འདས་ཀྱི་མཚོ་དང་མཚེའུས
ང་དང་ལྷན་ཅིག་ཏུ
མེས་པོ་རྒྱ་མཚོ་ལ་དྲན་གསོ་བྱེད

གཡག་གྲུ་ཡི་དྲིལ་བུ་ཡང་ཡང་དུ་བསྐྱོད་ནས
སིང་སིང་གི་སྐད་སྒྲ་རྒྱང་རིང་དུ་བསྐྱལ
ཞིང་ཐང་གི་སྙེ་ཕྲེང་ལ་ཀུ་རེ་རྩེས་ནས
ནས་འབྲུ་ཡི་དྲི་ཞིམ་གང་ས་རུ་བཀྲམ

བྱང་འབྲོང་རྭ་རྩེད་ཀྱི་དྲིས་ལན་བར་ན
ཐང་རྒོད་བྱེ་རླུང་གི་འཐབ་མོའི་དཀྱིལ་ན
ངའི་དམུ་རྒོད་ཀྱི་རང་གཤིས་གསལ་བོར་མངོན
ངས་དབེན་འཇམ་གྱི་ཁུགས་ཀྱོག་དབྲལ་ཞིང
ངས་ནགས་ཚལ་གྱི་ཡུལ་ཁམས་འགོམས

རི་མགོ་འདི་ནས་ཕ་གི་ལ་མཆོངས་ཏེ
ཡུལ་ལུང་འདི་ནས་ཕ་གི་ལ་འཕུར་ཏེ
ངར་ཤུགས་ཀྱི་འུར་སྒྲ་དང་བཅས
གནས་བཟང་མཐོ་སྒང་གི་རི་ཀླུང་ཀུན་ཏུ
ལོ་ཟླ་ཡི་གཟུགས་བཪྙན་སྣ་ཚོགས་བརྐོས
འོ ང་ནི་རླུང་བུ་ཡིན
མཐོ་སྒང་དུ་བཅའ་བའི་རྒྱུན་མཐོང་གི་རླུང་བུ་ཞིག་ཡིན།