སྲོད་ཀྱི་དྲན་གཞིག་དམར་པོ་རྒྱང་ལ་བསྲིངས། །

དྲན་པའི་ཟླ་བ་ལྟ་མོ་རྒྱང་དུ་བཞུད། །

སྙིང་འཕྲིན་འཆར་ཡན་སེམས་ཀྱི་འགྱུ་བག་ལ། །

དྲན་གདུང་མིག་ཆུའི་རླབས་ཀྱི་ན་ཟུག་བཏབས། །

མཚན་མོ་སྒོ་ཁྱིའི་གཅོང་སྐད་རེ་ཟུང་ཐོས། །

ཟླ་འོད་མག་མོག་སྤྲིན་པའི་གསེབ་ན་ངུ། །

ཁོ་བོ་ཁེར་རྐྱང་ཁང་མིག་དོག་པའི་ནང་། །

འདས་པའི་ལོ་ཟླ་དག་ལ་རྗེས་དྲན་བྱེད། །

དྲན་པའི་ཀློང་ནས་བཀུག་པའི་ཚོར་འགྱུ་དང་། །

ཁྲུང་ཁྲུང་ལྷོ་ལ་བསྟར་བའི་སྡུག་ཡུས་འདིས། །

སྨྲེང་སྐྱོ་སེམས་ཀྱི་འདབ་ལོ་རེ་རེ་ཡང་། །

ཉིན་མཚན་རྟག་ཏུ་གྱེས་གདུང་མཚོ་ཁར་ཟགས། །

མཚམས་སྤྲིན་ལྡོག་འོད་བཞུར་བའི་གཙང་འགྲམ་དུ། །

ཁྱོད་ཀྱི་ཞབས་རྗེས་ལེབ་མོ་འཚོལ་བར་འདུར། །

ལམ་རྐེད་ཕ་བོང་གྲུ་བཞིའི་སྟེགས་བུ་རུ། །

ལག་ཟུང་ཐོད་ལ་ཀེར་ཏེ་རྒྱང་ལ་ཅེར། །

འཇིག་རྟེན་དགའ་སྐྱོ་སྒྱུ་འཕྲུལ་རླུང་གི་གར། །

ཞེན་ཆགས་ལུས་འདི་རླུང་ཁའི་སྡོང་ལོ་བཞིན། །

ཉམ་ཆུང་ལུས་ཀྱི་ཐོ་ཡོར་འཇིག་རག་བར། །

སྙིང་གི་ཡོད་ཚད་ཁྱོད་ལ་བསྟིམ་ཡང་ཆོག །

ཡིན་ཡང་མི་ཚེའི་དར་ལྕོག་རླུང་གིས་ཟད། །

བཟློག་མེད་ལོ་ཟླ་གཙང་པོའི་ཟོལ་གྱིས་བཞུར། །

དགའ་སྐྱོ་རེས་ཀྱི་འགྱུར་བ་སྟོན་གྱི་སྤྲིན། །

ཀྱེ་མ་འཁོར་བའི་ལམ་ཐག་འདི་ལྟར་རིང་། །

སྙིང་གི་བྱམས་པར་མ་འཕྲད་ལོ་གསུམ་འགོར། །

དུངས་པའི་ཡིག་ལན་མ་ཐོན་ཟླ་ཤས་སོང་། །

ཨ་ཙི་ཁོ་མོའི་ལས་འཕྲོ་རྫོགས་མིན་ནམ། །

དམར་ཆུང་སེམས་འདིའི་ལྡིང་ཚད་སྔར་ལས་མགྱོ གས། །

མིག་ཆུ་ཁྱོར་གང་བཏེགས་ཏེ་དགུང་ལ་བལྟས། །

དགུ་ཚིགས་སྐྱོ་དབྱངས་ལྷོ་མཐའི་སྤྲིན་ལ་འདྲེས། །

གློག་སྒྲོན་མོག་པོའི་འོག་ན་ཁུ་སིམ་ངང་། །

སྙན་ངག་ཐན་ཐུན་གདུང་བའི་སེམས་ཀྱིས་སྐྱོར། །