ནུབ་ཁའི་རྩྭ་ཐང་གི་ཕ་མཐའ་དེ་ནས
རྡུལ་འཚུབ་དང་ཉི་ཟེར་ལ་འགྲོགས་ཤིང
དངངས་འཚུབ་ཀྱིས་འདུར་བའི་རྐྱང་རྒོད་ཀྱི་ཚོགས
ངའི་མིག་མདུན་དུ་ཐོལ་གྱིས་མངོན་བྱུང

ནམ་ཡང་རྒྱབ་ལ་སྒ་ཆས་སྤྲས་མ་མྱོང་བའི་རྐྱང་རྒོད
འདམ་རྫབ་དང་དྲག་ཆར་ཁྲོད་མགྲིན་པ་ཤུགས་ཀྱིས་འདེགས་ཤིང
སུས་ཀྱང་བཏུལ་མ་མྱོང་བའི་ཁྱོད་ཀྱི་མིག་མདངས་ན
ཞི་དུལ་གྱི་འོད་ནི་ཇི་འདྲའི་ཞན་ཨང

འབྲོང་སྟག་འཐབ་པའི་རྩྭ་ཐང་དེ་རུ
ཁྱོད་ནི་འཁྲུག་རྩོད་ཅིག་གི་ཤུལ་དུ་ལུས་པའི
རྒྱལ་ཕམ་ཞིག་གི་བདེན་དཔང་ཨེ་ཡིན

ལོ་རྒྱུས་དེའི་ཕྱིར་དྲན་རེ་ཞིག་ཞོག་དང
ཁྱོད་ད་དུང་ཡང་རང་ཉིད་ཀྱི་བདེན་ཁའི་ཆེད་དུ་འདུར་དགོས་ཨང
སྤྱང་ཚོགས་དང་རྔོན་པ་ནི་ཅི

ཆུ་རྒྱུན་དྭངས་མོ་ལྷོད་ཀྱིས་འབབ་པའི་འགྲམ་དུ
ཁྱོད་ལ་ཕྱི་མིག་ཅེར་དུས
གནམ་ས་ཐིག་གིས་བཅད་པའི རྒྱང་རིང་གི
ནུབ་ཁའི་མཚམས་སྤྲིན་གྱི་མཐའ་རུ
ལྷགས་རླུང་གིས་ཁྱོད་ཀྱི་རྔོག་ལོ་དལ་གྱིས་ཤད

མཚན་མོའི་སྐབས་རེར
ཁྱོད་ཀྱང སྦྲ་ནག་པོའི་མེ་འོད་དང
འདྲིས་ཆེ་བའི་མི་སྐད་དང་བཅར་འོང་སྲིད་ལ
ངས་ཀྱང ཅང་ཤེས་ཀྱི་ལས་དབང་ཁྱོད་ལ་བཤད་ཆོག