ཡོད་ཚད་གཉིད་དུ་ཤོར་བའི་མཚན་མོ
             མུན་ནག་གི་དུས་རབས་ནི
             ངའི་འཐབ་འཛིང་གི་དུས་རབས་ཡིན
            
             གཉིད་དུ་ཤོར་བའི་ཁང་ཁྱིམ
             གཉིད་དུ་ཤོར་བའི་ས་གཞི
             གཉིད་དུ་ཤོར་བའི་ཁྱིམ་བདག
             སྒོ་ཁྱི་ངའི་ལས་འགན་ཅི་འདྲའི་ལྕི་ཨང
            
རྐུན་ཇག་གི་འཇབ་རྒོལ་དང
             རང་བྱུང་གི་གནོད་འཚེ
             ད་དུང་ཁྱིམ་བདག་གི་བཀའ་དྲིན་ཡོད་ཚད
             མུན་ནག་གི་འཇིག་རྟེན་དུ་དལ་བུར་འཕྱོ་དུས
             ང་གཉིད་ཐབས་བྲལ
             ད་ནི་ངའི་རིག་པ་ལྕགས་སྐུད་ལྟར་སྒྲིམ་པའི་དུས་ལ་བབ
             
འོན་ཀྱང་ང་གཅིག་པུ་སད་མི་འདོད
             རང་གཅིག་པུ་སད་ཚེ
             ང་ཅི་འདྲའི་ཁེར་རྐྱང་དང་འཇིགས་སྐྲག་ཆེ་ཨང
            
 ང་ཁོར་ཡུག་དང་མཉམ་དུ་སད་འདོད
ང་རང་ཁྱིམ་དང་མཉམ་དུ་སད་འདོད
             ལྟོས་དང
             སྟག་འབྲོང་སྔ་མོ་ནས་སད་དེ་ལ་རྒྱ་རྩོད
             འཕར་སྤྱང་སྔ་མོ་ནས་སད་དེ་རྒྱལ་ཕམ་འབྱེད
             ཝ་ཚོགས་སྔ་མོ་ནས་སད་དེ་གོ་སྐབས་སྒུག
             མཆེ་སྡེར་རྣོན་པོའི་ཚོགས་འདིར་ཅི་འདྲའི་གཟི་བརྗིད་ལྡན་ཨང
             
ཐང་དཀར་སྔ་མོ་ནས་སད་དེ་ནམ་འཕང་གཅོད
             རྨ་བྱ་སྔ་མོ་ནས་སད་དེ་མཛེས་སྡུག་ངོམ
             ཅོ་ཀ་སྔ་མོ་ནས་སད་དེ་གྲེ་འགྱུར་སྒྲོག
             མཁའ་འགྲོ་དཀར་མོའི་ཁྱུ་འདིར་ཅི་འདྲའི་གཡེར་བག་ལྡན་ཨང
            
ཡིན་ན་ཡང  འུ་ཚང་གི་མགོ་ཁང་ཁྱིམ་ད་དུང་མ་སད
            མདོ་ས་ཞིང་ད་དུང་མ་སད
            བར་ཁྱིམ་བདག་ཀྱང་ད་དུང་མ་སད
           
འོད་སྣང་མེད   བགྲོད་ལམ་མེད  བསམ་བློ་མེད
            ངལ་རྩོལ་མེད་ལ་སྨྲ་བའང་མེད་པའི་མཚན་མོ
            ཡོད་ཚད་གཉིད་དུ་ཤོར་བའི་དུས་སྐབས་ནི
            ཅི་འདྲའི་འཇིགས་སྐྲག་གི་དུས་སྐབས་ཤིག་ཨང
            
ཡིན་ཡང་ང་སྔར་བཞིན་གཉིད་ཐབས་བྲལ
            མུན་པ་འདི་ཡལ་རག་བར་དུ
            མཚན་ནམ་འདི་གསལ་རག་བར་དུ               
            ང་རང་ཁྱིམ་གྱི་སྒོ་སྲུང་ལ་ཉན་དགོས་ཤིང
            མཇུག་མཐའི་སྐྱ་རེངས་ཀྱི་དུས་ན
            ལྷང་ལྷང་ངག་གི་འབོད་སྐད་ཅིག་གིས
            རང་ཁྱིམ་གྲུ་བཞི་འདི་གཉིད་ལས་དཀྲོགས་དགོས་ཨང་།