ཡུན་རིང་ཉར་བའི་སེམས་ཀྱི་དུངས་གཏམ་འདི།།
བརྗོད་པར་འདོད་ཀྱང་ངག་ནས་མི་ཁྲོལ་ཀི།
བྲི་བར་འདོད་ཀྱང་ཚིག་ཉམས་མི་ཐོན་ཀི།
མ་བརྗོད་མ་བྲིས་སེམས་ནས་མི་བསོར་ཀི།
 
ཁྱོད་ཀྱི་ཞི་ཞིང་འཇམ་པའི་ངང་རྒྱུད་དང་།།
གནག་ཅིང་སྣུམ་པའི་སྐྲ་ཡི་ལན་བུ་བཞིན།།
ལྕགས་ཀྱུ་གུག་མོས་ཉ་མོ་འཛིན་པ་བཞིན།།
བདག་སེམས་ཡིད་ཀྱི་དྭངས་པ་ཅིག་ཅར་འཕྲོག།
 
ཚེ་རབས་སྔོན་མའི་ལས་ཀྱི་འཕྲོ་མའམ།།
སྐྱེ་བ་ད་ཐེངས་དུས་ཀྱི་དམ་བཅའི་སླད།།
ཁྱོད་ལ་དགའ་བའི་སེམས་པ་དམར་དམར་པོ།།
མ་གསང་མ་སྦས་སྲོང་པོར་བསྟན་ན་འདོད།།
 
ཁ་བ་ལས་དཀར་བརྩེ་བ་ལྷད་མེད་ཅིག།
མེ་ཕུང་ལས་ཚ་དུངས་པ་འགོག་མེད་ཅིག།
ཉིན་མཚན་དུས་དྲུག་ཀུན་ཏུ་ཁྱོད་ལ་འཁྲེང་།།
ཞེ་དང་བསམ་པའི་གཏིང་ནས་འགྲོག་ན་འདོད།།
 
དུས་ཀྱི་འཁོར་ལོ་མགྱོགས་ནས་མགྱོགས་སུ་ཕྱིན།།
སེམས་ཀྱི་བརྩེ་བའི་མེ་ཕུང་དྲག་ཏུ་འབར།།
དགའ་དུངས་ཚིག་གསུམ་མིད་པའི་བར་ནས་འགག།
འགྱོད་གདུང་དྲག་པོས་ལུས་སེམས་རྟག་པར་གཙེས།།
 
ཕ་ཡུལ་རེབ་གོང་གསེར་ལྗོངས་གྲོང་ཁྱེར་ནས།།
ཁྱོད་རང་སེམས་ཀྱི་གཏིང་ནས་སྒོམ་བཞིན་དུ།།
དྲན་པའི་གཞས་ཆུང་དབྱངས་ལ་བཀུག་པ་དང་།།
དུངས་བརྗོད་སྙན་ངག་འཁྱུག་པ་ཐེངས་གཅིག་མིན།།
 
ཁྱོད་ཀྱི་མཛེས་སྡུག་ད་རུང་མིག་ན་ཡག།
ཁྱོད་ཀྱི་སྐད་འཇམ་ད་དུང་རྣ་རྩར་སྙན།།
ཡོད་ཚད་སེམས་ཀྱི་གཏིང་ལ་ཟུག་དྲགས་པས།།
ཁྱོད་རང་བརྗེད་པའི་གནས་ལུགས་ངས་མ་རྙེད།།
 
ཁྱོད་ཀྱི་སྤྱོ་ཚིག་ང་ཡིས་སྙན་པར་གོ།
ཁྱོད་ཀྱི་ཁྲོ་གཉེར་ང་ཡིས་འཛུམ་དུ་མཐོང་།།
འདི་ནི་དགའ་བ་ཞིག་གི་བདེན་དཔང་དང་།།
དུངས་པ་ཞིག་གི་སྟོབས་ཤུགས་ཅི་ལ་མིན།།
 
ཁྱོད་དང་འགྲོགས་པའི་དགུན་ཟླའི་ཞོགས་ཀ་ལ།།
གྲང་བའི་ཚོར་སྣང་ཡེ་ནས་ཚོར་མ་བྱུང་།།
ནམ་ཞིག་ཁྱོད་རང་བདག་དང་བྲལ་གྱུར་ཚེ།།
དབྱར་གཞུང་ཡིན་ཡང་གྲང་ནས་ཤི་ན་ཐང་།།
 
ལྷ་རི་གནས་ཆེན་དག་ལ་མཇལ་བའི་དུས།།
དགུང་ལ་འཕྱུར་བའི་ལྷ་རྫས་བསང་དུད་དང་།།
དབྱིངས་ལ་སྤུར་བའི་རླུང་རྟ་དཀར་པོའི་ཁྲོད།།
ཁྱོད་ལ་བཏབ་པའི་སྨོན་ལམ་ཁྲི་ཕྲག་ཡོད།།
 
རུམ་ལ་བཅུག་པའི་ཤ་དུངས་རུས་དུངས་དེས།།
བཟོད་པར་དཀའ་བའི་དྲན་འཛིན་ནད་ཅིག་བསླངས།།
ལྷ་རྗེ་སྨན་པར་བསྟེན་ཀྱང་ཕན་མ་འདོད།།
སྒྲོལ་མའི་འཛུམ་མདངས་ཤིག་གིས་དག་ཡོང་སྙམ།།
 
ཁྱོད་དང་བྲལ་བའི་ཉིན་ཞག་ལོ་ཟླའི་ནང་།།
གཞས་དབྱངས་སྙན་མོ་རྣ་ལ་མི་སྙན་ཀི།
སེམས་ཀྱི་མངའ་ཐང་ཡོད་ཚད་ཁྱོད་ཀྱིས་ཟིན།།
ཅང་མེད་བུ་ལོའི་རེ་བ་མ་འགྲུབ་ཐལ།།
 
བུ་མོ་ཁྱོད་ཀྱི་ལང་ཚོ་མ་དབང་ཐལ།།
འོན་ཀྱང་མཉམ་དུ་བསྐྱལ་པའི་ལོ་ངོ་གསུམ།།
མཚར་སྡུག་ལྡན་པའི་དྲན་ཤིང་དམར་པོ་ལགས།།
སྐྱེས་པ་ད་ཐེངས་འཛོམ་སྐལ་ཕྲ་ན་ཡང་།།
 
ཚེ་རབས་རྗེས་མར་འདུ་བའི་སྨོན་ལམ་ཞིག།
བླ་མ་རྣམ་གསུམ་དབང་དུ་བཀུར་བཞིན་དུ།།
མ་ཤི་གསོལ་བ་འདེབས་སོ་སྙིང་སྡུག་མ།།