མ་རབས་བརྟུལ་ཞུགས་འཛིན་པའི་གཤིས་བཙོག་སྤྱོད་ངན་ལུས་སྐྱོན་བཅོས། །
མ་སྙན་ལྡོག་པར་སྨྲ་བའི་གཏམ་བརྗོད་ངག་གི་ཉེས་པ་བསྒྱུར། །
མ་དག་ལོག་པར་བལྟ་བའི་འཁྲུལ་བ་སེལ་ཏེ་ཡིད་རྨོངས་བཅོམ། །
མ་ལུས་ལུས་ངག་ཡིད་གསུམ་ཉེས་སྤངས་དགེ་སྒྲུབ་དགེན་གྱི་དྲིན། །
 
དྲི་མེད་གངས་མདངས་འཛིན་པའི་དམར་པོའི་སེམས་ནས་བྱམས་ཀྱིས་བསྐྱངས། །
རྣམ་དཔྱོད་རྩལ་རྫོགས་ཐུགས་ཀྱིས་རྙེད་དཀའི་ཤེས་རིག་ནོར་མཆོག་སྩོལ། །
ཀུན་ནས་དགེ་བར་སྐུལ་བའི་འཁྲུལ་མེད་གདམས་པའི་སློབ་གསོ་གནང་། །
མགོན་ཉིད་སློབ་དཔོན་མཆོག་གི་སྐུ་དྲིན་དྲན་པས་གུས་པས་བསྟོད། །
 
འཆད་པ་དབྱར་སྐྱེས་ལྔ་ཡི་ལྡིར་ལྡིར་སྒྲ་ཡིས་ལྷིང་འཇགས་བཅོམ།།
རྩོད་པ་ཀློག་དམར་འཁྱུག་པའི་ཆེམ་ཆེམ་འོད་ཀྱིས་རྨོངས་མུན་འཇོམས། །
རྩོམ་པ་ཆད་མེད་རྒྱུན་འཇོའི་ཤག་ཤག་ཆར་གྱིས་ར་རི་བཀྲུས། །
མཁས་གསུམ་འཛོམས་པའི་བཤེས་གཉེན་ཤེས་རིག་འོད་ཀྱིས་རྨོངས་བློ་སེལ། །
 
རང་དོར་གཞན་དག་གཅེས་པའི་ལྷག་པའི་བསམ་པ་རབ་ཡངས་ཤིང་། །
རང་དོན་རྒྱབ་ཏུ་གཡུག་ཅིང་གཞན་དོན་ཕྲག་ཏུ་ཁུར་ཞིང་ཐེགས། །
གཞན་ལས་རང་ཉིད་བརྗེད་པ་ཐུགས་ཀྱི་རྒྱུད་ན་མངའ་བ་མཆོག །
སྐུ་ཚེ་གང་པོར་ཡོད་ཚད་གཞན་གྱི་དོན་དུ་འབུལ་ཤིང་བསྐྱངས། །
 
ཉིན་མཚན་དུས་དྲུག་ཀུན་ཏུ་བློ་གསལ་དོན་དུ་ལུས་མ་ཁོམ། །
ཡུལ་དུས་གང་དུ་ཡིན་ཡང་གདུལ་བྱའི་སླད་དུ་སེམས་མ་བདེ། །
རྟག་ཏུ་སློབ་གཉེར་བ་ཡི་ལས་དོན་ཆེད་དུ་འདུ་ཞིང་རྒྱུགས། །
གཏན་དུ་སློབ་བུའི་ཚོགས་ནི་སྐད་ཅིག་ཙམ་ཡང་བརྗེད་མ་སྤོབས། །
 
རླབས་པོ་ཆེ་ཡི་མཛད་འཕྲིན་བསྐལ་བའི་མཐའ་ཡང་ཉམས་མིན་ལ། །
བུ་སློབ་སྐྱོང་བའི་སྐུ་དྲིན་མི་ཚེ་རྫོགས་བར་གཞལ་དཀའ་ན ང་། །
རང་སེམས་སྨྱུག་རྩེར་རྩེན་ཞིང་ཤོག་ངོས་སྣང་བའི་ཡིག་འབྲུ་འགའ། །
གཏན་དུ་མཆོག་གི་དྲིན་དེ་བརྗེད་མེད་སེམས་པའི་རོལ་མོ་འཁྲོལ། །