འཛམ་གླིང་ཡང་རྩེ་གངས་ལྗོངས་དག་ཞིང་གི་གླིང་དུ།།
སྔོན་བྱོན་མེས་པོ་སྟོང་གི་བློ་གྲོས་ཀྱི་རྩལ་ལས།།
རིག་པའི་བང་མཛོད་གངས་རིའི་མུ་ཁྱུད་ཀྱི་མཛེས་པ།།
རང་ཅག་གངས་ཅན་གཞོན་ནུའི་ལས་སྐལ་དུ་འཁྲུངས་སོ།།
ཕྱོགས་བཞིར་གངས་ཀྱིས་བསྐོར་བའི་མཛེས་སྡུག་གི་ཡུལ་ན།།
རྟ་ནོར་ལུག་གསུམ་ནམ་མཁའི་སྐར་ཚོགས་ཀྱི་ཟླ་བོ།།
རི་ཆུ་ནགས་གསུམ་སུམ་རྩེན་གཞལ་ཡས་དང་འདྲ་བས།།
ང་ཚོ་སྒང་པ་རྣམས་ཀྱི་ཕ་ས་འདི་སྐྱིད་པ།།
དུས་ཀྱི་འཁོར་ལོ་མཚན་མོའི་སྐར་མདའ་དང་འདྲ་བར།།
དུས་རབས་ཉེར་གཅིག་ལུས་ཀྱི་ཉེ་འགྲམ་དུ་སླེབས་བྱུང་།།
མདོ་དབུས་ཁམས་གསུམ་འདུས་པའི་ལ་ལུང་གི་ཡུལ་གྲུར།།
རྒན་རྒོན་མང་པོ་ཆོས་འདོན་སྐོར་བ་ལ་བྲེལ་ཡང་།།
ན་གཞོན་རེ་འགའ་མི་རྟག་ཤོ་རྒྱག་ལ་གོམས་འདུག།
སྤྱང་པོ་རེ་འགའ་དབྱར་རྩྭའི་ཚོང་དོན་ལ་རྔམ་ཡང་།།
མདོ་མེད་རེ་འགའ་ཨ་རག་བདུད་རྩི་ལ་ཞེན་འདུག།
མཁས་ཅན་རེ་འགའ་རྔམ་རྫིག་ང་རྒྱལ་གྱིས་བཟིར་ནས།།
ལྟོ་བ་རུལ་ནག་དོན་མེད་ཚིག་སྟོང་གིས་བཀང་འདུག།
འདི་ཉིད་ཆོས་ལ་འཇུག་པའི་བླ་བཙུན་དང་བན་སྔགས།།
རེ་ཞིག་མི་འདོད་གྲུབ་མཐའ་རྩོད་གླེང་ལ་བྲེལ་འདུག།
དགའ་སྐྱོ་ཟུང་གི་སེམས་པ་ཁྱེད་ཅག་ལ་གཏོད་དུས།།
བདེན་རྫུན་བླང་དོར་གནས་ལ་མགོ་བོ་ཡང་ཉོག་སོང་།།
འཕེལ་རྒྱས་གནད་ཀྱི་རྩ་བ་སློབ་གསོ་ལ་ཐུག་པས།།
མི་ཆོས་གཙོ་རུ་འཛིན་པ་དུས་རབས་ཀྱི་འགྲོ་ལུགས།།
སྤྱི་ཚོགས་དཔལ་འབྱོར་རྟ་ཕོའི་གོམ་འགྲོས་ལས་མགྱོགས་པས།།
ཕྱི་ནང་རིག་གནས་འཐུ་བ་གཞོན་རབས་པའི་འོས་འགན།།
སྙིགས་དོར་བཅུད་ལེན་རིག་གནས་ཇེ་རྒྱས་སུ་བཏང་ན།།
ལྟ་རྒྱ་ཐོས་རྒྱ་བསྐྱེད་པར་ཐེ་ཚོམ་ནི་ཅི་ཡོད།།
ང་རྒྱལ་ཞེ་སྡང་ཕྲག་དོག་ཏིག་མུག་གི་དུག་གིས།།
རང་རྒྱུད་ཡོངས་སུ་བརླན་པའི་སྣང་བརྙན་འདི་སྐྱོ་བ།།
རང་རིགས་སྐད་ཡིག་བརྩེ་བའི་ཕ་མ་ལྟར་བསྐྱངས་ནས།།
དབྱིན་ཡིག་རྩིས་འཁོར་ཕྱི་ནང་ཤེས་བྱ་ལ་བརྩོན་འོས།།
བློ་ཐུང་ཆོག་ཤེས་རྨོངས་པའི་གོས་རྙིང་དེ་ཕུད་ནས།།
བརྩོན་འགྲུས་རྟ་ལ་བཅིབས་ཏེ་རིག་ལམ་ལ་ཞུགས་ན།།
རང་གཞན་གཉིས་དང་སྤྱི་ཡི་དོན་བྱ་ལ་ཕན་པས།།
སྐྱེ་བོ་འདི་འདྲ་ཆར་རྗེས་མྱུ་གུ་བཞིན་བརྡོལ་ན།།
རང་སེམས་དྲི་མ་མེད་པའི་རྫིང་བུ་ཡི་འགྲམ་དུ།།
རྣམ་དག་དགའ་སྤྲོའི་མེ་ཏོག་ངེས་པར་དུ་འཁྲུངས་ངེས།