འབྱོར་ལྡན་ལྷ་ཡུལ་ས་ལ་ལྷུང་འདྲའི་སྒེག་ལྡན་བུ་མོའི་ལང་ཚོ་སྨིན། །
     ཡན་ལག་བརྒྱད་ལྡན་སྟག་ཆུ་སྔོན་མོའི་བདུད་རྩིའི་ཟེགས་མ་དགུང་དུ་གཏོར། །
     སྔོ་ལྗང་མཐའ་ཡས་སྤང་ན་རྟ་ནོར་ལུག་གསུམ་སྐར་མའི་ཚོགས་བཞིན་བཀྲ། །
     འབྲོག་ཐང་ཕྱུག་མོ་རྩྭ་ཐང་ཡངས་པོ་དྲན་འཛིན་པདྨའི་གདན་ལ་བཞུགས། །
     བྱམས་ལྡན་ཨ་མའི་བཞོ་དབྱངས་གྲེ་འགྱུར་ལྷས་ར་ཀུན་ཏུ་སྙན་པའི་དབྱངས། །
     འབྲི་དང་མཛོ་མོའི་ངུར་སྒྲས་རྒྱ་རྫོང་ནགས་ཀྱི་ཁུ་བྱུག་སྔོན་མོར་འགྲན། །
     གཡང་དཀར་ལུག་ཁྱུས་སྔོ་ལྗང་སྤང་ལ་ཁྲ་ཚོམ་མེ་ཏོག་ཀུན་ནས་བརྒྱན། །
     ཞོགས་པའི་སྐྱ་རེངས་ཤར་རིའི་ཕག་ནས་མ་བོས་མགྲོན་ལ་དལ་གྱིས་ཕེབས། །
     ཁྲི་གདུགས་ཉི་མའི་གཟི་འོད་མི་རྟག་འཇིག་རྟེན་ཁྱིམ་ལ་འཕྲོས་པའི་ཚེ། །
     ཕ་དང་ཨ་ཁུས་སེམས་དུལ་རྣམ་དཀར་དགེ་བའི་ལས་ལ་ནན་གྱིས་འབུངས། །
     བུ་དང་ཚ་བོ་རིག་འབྱུང་མ་ཡུམ་སློབ་རར་ཡངས་པོར་གོམ་སྟབས་བསྒྱུར། །
     སྨན་ཆུང་བོད་པའི་བུ་མོ་ཕ་གུའི་ཆུ་ཕྲན་འགྲམ་ན་ལྷུག་ལྷུག་དགོད། །
     ཡངས་པའི་ཐང་ན་མེ་ཏོག་ཁྲ་ཆིལ་དགུ་ཆིལ་མཛེས་པའི་གར་ལ་རྩེན། །
     དམའ་མོའི་གཞོང་ན་འབའ་འབའ་ལུ་གུ་རྩེད་འཇོའི་གནས་ལ་ཀུན་ནས་གཡེང་། །
     གཡུ་མདོག་སྤང་ན་སྦྲ་ནག་གྲུ་བཞིས་བརྩེ་བའི་ཕྱག་བརྒྱ་ཡངས་པོར་བརྐྱངས། །
     ཤར་རིའི་རི་གསུམ་རྩེ་ན་ཨ་ཕོ་ལུག་རྫི་མཐོན་པོའི་སྒང་ན་འགྱིང་། །