སྙན་འཇེབས་ངག་གི་བྱིན་རླབས་སྩོལ་བའི་ལྷ། ། 

ལྷ་མཆོག་དབྱངས་ཀྱི་རྒྱལ་མོ་དབྱངས་ཅན་ཀྱེ། ། 

ཀྱེ༵་ཧོ་འགྲོ་བའི་དོན་ལ་བརྩེ་བས་དགོངས། ། 

དགོངས་རྒྱུད་ལྷ་མོའི་དངོས་གྲུབ་བདག་ལ་སྩོལ། ། 

རབ་དཀར་ཞལ་རས་མཛེས་པའི་མེ་ཏོག་འཛུམ། ། 

འཛུམ་ཆུང་ཨུཏྤལ་གསར་པའི་གཟི་བྱིན་ཆགས། ། 

ཆགས་ལྡན་སྐྱེ་བོའི་ཚོགས་ཀུན་ཁྱེད་ལ་དད། ། 

དད་ཅན་སྐྱེ་བོའི་ཚོགས་གྲལ་ད་ཚུར་ཕེབས། ། 

ཉ་གང་སྟོན་ཟླའི་འོད་དཀར་འཚེར་བ་བཞིན། ། 

བཞིན་གྱི་དཀྱིལ་འཁོར་མཛེས་པའི་དབྱངས་ལྷ་མོ། ། 

མོ་རབས་མཆོག་དམན་ཀུན་གྱི་དྭངས་རྩེ་ཁྱེད། ། 

ཁྱེད་ཉིད་དུས་ཀུན་བདག་ཡིད་མགོན་དུ་ཚེས། ། 

རྣམ་རྟོག་དབྱར་སྤྲིན་འཁྲིགས་པའི་གུར་ཁྱིམ་ན། ། 

ན་ཆུང་མཛེས་མའི་ཚོགས་གྲལ་མང་དུ་འདུ༵ས། ། 

འདུས་པ་བརྒྱ་ཕྲག་མང་པོའི་དབུས་དཀྱིལ་ན། ། 

ན་ཆུང་སྟོང་གིས་ཟླ་མེད་ཚངས་སྲས་བསྔགས། ། 

 སྙན་འགྱུར་ཁུ་བྱུག་གདངས་བཞིན་སྙན་པའི་སྒྲ། ། 

སྒྲ་འཛིན་རྣ་བའི་བུ་གས་གསན་པར་སྤྲོ། ། 

སྤྲོ་འཛུམ་སྣང་བ་དགྱེས་པའི་ཞལ་འཛུམ་མདངས། ། 

མདངས་ལྡན་བུ་མོའི་ཡང་རྩེ་བསྔགས་པར་སྤྲོ། ། 

 ༼ ན་རོ་མཁའ་ལྡིང་། ༽