རྟོག་སྣང་སྒྱུ་མའི་གཟུགས་སུ་བྲིས་པའི།། 

ཚིག་གི་ཚོར་གཤིས་མངར་ལ་སྐྱུར་མོ།། 

སྨྱུ་གུའི་རྩེ་ནས་དལ་གྱིས་ལུད་དེ།། 

འཁོར་བའི་གྲོང་གི་མི་ལ་འབུལ་འདོད།། 

བརྩེ་བའི་འཇའ་སྐུད་དགུང་ལ་འཐེན་པ།། 

ཉི་མ་ཟླ་བའི་འགྲོ་ཕྱོགས་ཡིན་ན།། 

སེམས་ཀྱི་མིག་ཟུང་སྙིང་ལ་ཕྱོགས་པ།། 

ང་དང་ཁྱོད་ཀྱི་ཞེན་ཆགས་ཡིན་འདྲ།། 

ཕན་ཚུན་འདང་གིས་ཕྲ་རྒྱན་བཏབ་པའི།། 

ལས་དབང་གནམ་གྱི་བསྐོས་པ་དྲན་ན།། 

འཛུམ་རིས་པདྨོ་ལྷོད་ཀྱིས་བཞད་དེ།། 

སྙི་བའི་སེམས་ལ་དགའ་བ་འཕེལ་ཡོང་།། 

ཚེ་རབས་སྔོན་མ་ཁ་ཆད་བྲིས་ནས།།

དུས་རབས་གཅིག་ཏུ་དུས་ཆད་བཏམས་སམ།། 

འཁོར་བའི་གླིང་ཕྲན་ཆུང་ཆུང་ཞིག་ནས།། 

ཕྲན་ཆུང་འུ་གཉིས་འདུ་འཛོམས་བྱུང་སོང་།། 

ཁྱེད་ཞལ་འཇའ་ཡི་གུར་གུམ་དམར་པོ།། 

སྙན་ཚིག་ནང་གི་སྙིང་ལ་བསྲེས་ཏེ།། 

ཕྱི་ནང་གསང་བའི་མེ་ལོང་ངོགས་སུ།། 

ཡང་ཡང་བྲིས་ན་ཡང་ཡང་དྲན་ཡོང་།། 

སྤྲིན་དཀར་ལྷ་མོའི་དར་འཕྲུ་འོག་ནས།། 

དྲན་པའི་གཤོག་པ་རིང་དུ་བརྐྱངས་ཏེ།། 

ལས་ཀྱི་ཨ་ཡིག་བརྐོས་པའི་མི་ལ།། 

ལོ་ཟླར་བསགས་པའི་འཕྲིན་ཞིག་གཏང་འདོད།། 

རྨི་ལམ་ནང་གི་བརྡ་ལུང་སྙན་མོ།། 

བདེ་ཆེན་དགའ་མའི་གླུ་དང་འདྲ་བ།། 

མགྲིན་པའི་སྒོ་མོ་རྡུང་བ་མེད་ཀྱང་།། 

མིང་ཚིག་ཁ་རླངས་ནང་དུ་འདྲེས་སོང་།།

གཟུགས་གསར་སྨན་གྱི་འཁྲི་ཤིང་སོ་མ།། 

མིག་ཟུང་དགའ་བའི་དཔལ་དུ་བཞད་དུས།། 

དུང་སེམས་སྙིང་གི་རྫིང་བུའི་ནང་དུ།། 

སྐྱེ་བ་སྔོན་མའི་བག་ཆགས་འཚུབ་སོང་།། 

ཚོར་བའི་ནགས་ཀློང་འགྲིམ་པའི་བུ་མོས།།

ཚིག་གི་སྒྱུ་འཕྲུལ་སྤུངས་པའི་ནམ་ཟླ།། 

ཁྱོད་ལ་བསྔོས་པའི་འཚོ་བ་མིན་ཡང་།། 

ནང་སེམས་མཚོན་པའི་མཚོན་རྟགས་བྱས་ཡོད།།

ཕྱི་ཐག་ཡིད་ཀྱི་ནམ་མཁའ་བརྟན་ན།།

བར་ཐག་རི་ཆུས་བཅད་ཀྱང་མི་སྐྱོན།། 

དྲན་གདུང་སྙིམ་གང་རུམ་དུ་ཁྱེར་ནས།། 

ནམ་ཞིག་མཇལ་བའི་ལས་སྐལ་རྙེད་ཡོང་།། 

རྩོམ་པ་པོ། མཱ་ལིན་ནཱ།

རྩོམ་སྒྲིག་པ། མགར་རྒྱལ་སྲས།