ཞོགས་སྐྱ་རེངས་དང་པོའི་འཛུམ་ཞལ་དང་ལྷན་དུ། །

གོས་ཚ་རུའི་རྒྱན་ཆ་གང་ཡག་དེ་འགྲན་བཞིན། །

ཟས་དཀར་དམར་སྡེར་ཁའི་རི་རབ་ཀྱི་ཀློང་ནས། །

ལོ་གསར་བའི་བཀྲ་ཤིས་ཉིན་བཟང་དེ་བསུའོ། །

བསང་དཀར་པོའི་ལྷ་དུད་སྤྲིན་དཀར་ལ་འདྲེས་ཤིང་། །

དུང་སྙན་མོའི་དབྱངས་རྟས་འབྲོག་ཐང་དེ་དཀྲོགས་ནས། །

ཞོགས་ཉི་ཟེར་འཛུམ་པའི་སྤྲོ་དགའ་ཡི་ཀློང་དུ། །

བོད་ཆོས་ལྡན་ཚང་གི་ལོ་སར་དེ་བསུ་འོ། །

ཆེ་རྒན་པ་མགུ་བའི་སྣང་བ་དེ་སྤྲོ་སྤྲོ། །

ཆུང་བྱིས་པ་དགའ་བའི་འཛུམ་མདངས་དེ་ལྷུག་ལྷུག།

ཁྱིམ་བཟའ་མི་འཛོམས་པའི་དགོད་སྒྲ་དེ་ལྷང་ལྷང་། །

ནང་ཕུ་ནུ་སླེབས་པའི་ཁམས་འདྲི་དེ་སྙན་སྙན། །

རྗེ་མེས་པོའི་རིན་བྲལ་སྲོལ་རྒྱུན་དེ་བརྗེད་ནས། །

སྔོན་མེད་པའི་ཁུག་དམར་ལོ་སར་དུ་མི་སྦྱིན། །

སེམས་བསམ་པའི་སྨོན་ལམ་ཁམས་བདེ་དང་ལྷན་དུ། །

ལོ་གསར་པའི་གོ་རེ་སྡེར་ཁ་དེ་མཛེས་པ། །

ཚེས་གཅིག་གཉིས་གསུམ་སོགས་དགའ་སྤྲོ་ཡིས་རོལ་ཅིང་། །

དགའ་ཤ་ཉེ་སྤུན་མཆེད་ལྷན་འཛོམས་ཀྱི་ཁྲོད་ནས། །

གླུ་གར་དང་ཁ་མཚར་ཀུ་རེ་ལ་མགུ་བ། །

ངེད་བོད་པ་ཚང་གི་རྟེན་འབྲེལ་གྱི་མཚོན་རྟགས། །

ཚེས་བཞི་ལྔ་དྲུག་སོགས་ཉིན་བཟང་གི་དུས་སུ། །

ཐག་ཉེ་རིང་ཐམས་ཅད་གཞི་མགྲོན་དུ་འཛོམས་དེ། །

བུ་བུ་མོའི་གཉེན་སྟོན་མཛའ་མཐུན་གྱི་ལྷ་དར། །

གླུ་སྙན་མོའི་དབྱངས་རྟས་བསུ་བ་འདི་སྤྲོ་བ། །

སྒོ་ཕྱི་ནང་གཡང་ཟོག་ལྷས་ར་ལ་བསྐྱིལ་ཅིང་། །

དར་དཀར་དམར་བལ་སོགས་ལྷན་ཅིག་ཏུ་བསྡེབས་ནས། །

ཞེ་དཀར་པོའི་སྨོན་སེམས་ལྷ་བསང་དང་བསྡོངས་ཏེ། །

ཟོག་འགའ་རེ་ཚེ་ཐར་གཏོང་སྲོལ་འདི་མཛེས་པ། །

བོད་ཆོལ་གསུམ་ལྷ་ཡི་ཞིང་མཆོག་ཏུ་གྲགས་ཤིང་། །

ལས་འཚེ་མེད་ཞི་བའི་བདེ་བ་ལ་སྙེག་པ། །

ལོ་གསར་པའི་རོལ་སྟངས་འདི་ལྟར་དུ་མཐོང་ངོ་། །