གངས་ཟེགས། 2021-09-07
གྲོང་ཁྱེར་ནམ་མཁའི་དབྱིངས་སུ། །
ཉི་མ་ཟླ་བ་བོར་ཡང་། །
དྲན་གདུང་ཡིད་ཀྱི་དབུས་ནས། །
བྱམས་པ་བོར་བ་མི་འདུག །
བསྒོམས་པ་བླ་མའི་ཞལ་རས། །
ཤར་ཀྱང་མ་ཤར་ཆོག་པ། །
མ་བསྒོམ་བྱམས་པའི་ཞལ་རས། །
ཤར་ན་དེ་ཡིས་ཆོག་སོང་། །
དྲན་དང་མ་དྲན་མི་བཤད། །
ཐ་སྙད་བཙལ་རྒྱུ་མི་འདུག །
སེམས་དང་བསམ་པའི་བར་ན། །
གཟུགས་མེད་རི་མོར་ཕབ་ཡོད། །
རྒྱང་བཞུད་ཉི་ཟླ་གཉིས་ལ། །
འཕྲིན་པ་བསྐུར་དགོས་མི་འདུག །
ཕ་ཡུལ་ནམ་མཁའི་ཁམས་ལ། །
སྙན་ངག་ཟླ་བ་ཤར་ཡོད། །
རྗེན་རྗེན་སྙིང་གཏམ་དངོས་མ། །
དཀར་དཀར་ཤོག་ངོར་ཕབ་ཡོད། །
བརྩེ་བརྩེ་སེམས་ཀྱི་ལྷ་མོ། །
དམར་དམར་ཁྲག་ལ་འདྲེས་སོང་། །
འུ་གཉིས་དང་པོ་འཕྲད་དུས། །
ནམ་ཟླ་དགུན་ཁ་ཞིག་རེད། །
བརྩེ་སེམས་མེ་ཏོག་བཞད་ས། །
དབྱར་གྱི་སྤང་གཞུང་སྟེང་རེད། །
སྙིང་གཏམ་ཆུ་མོ་བཞུར་ས། །
ཙོང་ལ་རིང་མོའི་འགྲམ་ཡིན། །
དུང་སེམས་དར་དཀར་མདུད་ས། །
ཉི་མ་ལྷ་སའི་ཞིང་ཡིན། །
དྲན་འཛིན་པིར་གྱི་རྩེ་མོས། །
གསེར་མདོག་རྨི་ལམ་བྲིས་ཡོད། །
རྨི་ལམ་ནང་གི་བྱམས་པ། །
ཤ་འཇམ་ལུས་ལ་འདྲེས་སོང་། །
རྩོམ་གསར། 10