ཆ་འཇོག་མེད་པའི་འཇིག་རྟེན་སྣང་བ་རུ།།

སེམས་བྱུང་རྟ་ཕོ་རི་ལ་ཤོར་ཅིང་འཆོར།།

མིག་ཆུའི་རྟ་སྦངས་ཅི་དགར་ལུད་པ་ནི།།

གཡེར་བག་རྨིག་པས་དུམ་བུར་དཀྲུམས་བྱས་ཏེ།།

གསེར་ཀྱི་སྒ་ཆུང་དེ་ཡང་ཞར་ལ་བོར།།

སྣང་བའི་ཤུགས་ཀྱིས་སྲབ་མདའ་བཅད་དེ་ཤོར།།

ཡངས་྆འི་ཐང་ཆེན་བསྐོར་ནས་རི་ལུང་ཉུལ།།

ཟིལ་བ་ཁྲོམ་ཁྲོམ་རྩི་ཤིང་ཐིགས་པ་ལྡག།

ཡིད་ཀྱི་དང་ག་ཕྱེས་ཤིང་འགྲམ་ཆུ་ལྡང་།།

རྩྭ་ལྡུམ་མེ་ཏོག་དག་གི་དྲི་ངད་ཚོར།།

དེ་ཡི་རྡོག་ཁས་སྐོམ་པ་མ་སོད་པར།།

ལམ་སང་རྣ་བ་བསྒྲེངས་ནས་ཆུ་མགོ་བསྙོགས།།

ཐོབ་པའི་དབུགས་དབྱུང་རྡུལ་དང་རླངས་པར་འདྲེས།།

སྤོ་ཐོ་ཉག་ག་མིག་བར་འཕྲེད་ཀྱིས་བཅད།།

ཆུ་ཕྲན་ཆུ་ཆེན་དག་ཀྱང་ལ་མོར་འབོགས།།

གངས་ཀྱི་རི་བོ་སྙིང་གི་དབྲག་ལ་བསྙལ།།

ཉི་ཟླ་གཉིས་ཀ་ལས་ཀྱི་ཐོད་པར་བསྐོས།།

འཚེར་སྐད་སིང་ངེ་ཨ་སྔོན་དགུང་ལ་མཆེད།།

ཨ་སྔོན་དབྱིངས་ཀྱི་ཕོ་ཆུང་ནེའུ་ལྡངས་གང་།།

ཚེ་རབས་ལས་ཀྱིས་ལྷན་དུ་མ་འཛོམས་ཀྱང་།།

ད་རབས་ལས་ཀྱིས་ཚེ་ལ་ལེགས་ཚོགས་བཙལ།།

ཡིད་ཀྱི་རྟ་ཕོ་ཞོགས་ཤིང་སེམས་ལ་བརྣགས།།

ནམ་མཁར་མཆོང་བ་འདྲ་ལ་འཕུར་བ་འདྲ།།

སེམས་བྱུང་ཅང་ཤེས་གྱི་ལིང་གཤོག་ཐོགས་ཤིག།