བདག་ཡིད་མེ་ཏོག་པད་མའི་ཞིང་།།

ཚོར་བའི་འདབ་མ་རླུང་གིས་འགུལ།།

སྣང་བའི་གངས་ཅན་ནགས་ཚལ་དུ།།

སྙན་ངག་རྫ་ཆུ་དྭངས་གསལ་བཞུར།།

སེམས་ཉིད་འཁོར་བའི་ཉིན་སྲིབ་འདྲ།།

ཚངས་པའི་དབྱངས་ལ་ལན་ཅིག་རོལ།།

དབྱངས་ཅན་ལྷ་ཡི་གཟི་ཉམས་འཕྲོས།།

མགུར་མའི་མཛེས་སྡུག་ཉམས་སུ་ལེན།།

ཚིག་ལ་དབྱངས་ཀྱིས་ཉམས་ཤིག་དོད།།

གཡུ་དཀར་ཟླ་བས་རང་སེམས་བཏུལ།།

སེམས་སུ་འཕྲོས་པའི་གཡུ་དཀར་མ།།

མི་ཚེ་དབྱངས་ཀྱི་རྒྱུད་མངས་ཡིན།།

བདག་ཡིད་ཚོར་བའི་ཐང་ཆེན་ན།།

དབྱངས་རྟ་སྙན་མོ་དཀྲོལ་བཞིན་དུ།།

མགུར་མའི་ཆོ་འཕྲུལ་ཕྱི་ནང་དུ།།

སྨིན་དྲུག་ལྷ་མོ་བརྗོད་གཞིར་བྱས།།

རྣམ་རྟོག་པད་འདབ་ཡོམ་ཡོམ་སྒུལ།།

དྲན་པ་སེམས་ཀྱིས་ཡོལ་ངོས་སུ།།

དབྱངས་ལྡན་ལྷ་ཡི་ཞལ་གཟུགས་ཤར།།

ཡིད་ཆེས་དད་པའི་སྣང་ངོར་བསྒོམས།།

སེམས་ཉིད་ཁྲ་མོ་མ་འགག་པར།།

སྙན་ངག་ཆུ་ཕྲན་གཙང་མར་འབྲི།།

འདི་ཕྱི་གཉིས་ཀྱི་མཆོད་འོས་ལ།།

མཆོད་པ་ཙམ་ཞིག་མཚོན་པར་བྱེད།།

དབྱར་གཞུང་ཐང་ཆེན་སྔོན་མོ་རུ།།

སྙན་ངག་ཚིག་གི་སིལ་བུ་འཐོར།།

སེམས་སུ་འཛུམ་པའི་གཡུ་ཆུང་མ།།

མི་རྟག་འཁོར་བའི་བདག་མོར་འབོད།།

གཡང་གི་ར་བའི་བདག་འཛིན་མ།།

འཚོ་བའི་གཞི་རྟེན་ལེགས་སྐྱོང་བས།།

འཛུམ་པའི་ཞལ་དཀར་ཟླ་དབྱངས་མ།།

མ་བཅོས་སེམས་ལ་ལྷང་ངེ་གསལ།།

༼ དབུ་འཇིགས་མེད། ༽