སད་མི། 2021-01-27
༡
བར་སྣང་གི་སྤྲིན་པ་འཚུབ་དུས་ཤིག་ལ།
ཆུ་ཐིགས་རྡོག་པོ་འགའ་ལས་མངར་སྐྱུར་མེད་པའི་
ཁམ་བུ་ཞིག་སྐྱེས།
དེ་དང་སྡོང་པོ་གཅིག་ལས་སྐྱེས་པའི་ཁམ་བུ་དག་ཁ་
དོག་ཡེ་ནས་མི་མཚུངས།
ཁམ་བུ་རེ་རེར་མིང་རེ་ཡོད་ཅིང་མིང་དེ་དག་ཁ་དོག་
ལ་བལྟོས་ནས་བཏགས་ཡོད།
འོན་ཀྱང་། ཁམ་བུ་ལྗང་ཁུ་ཞིག་ལ་ཁམ་བུ་ནག་པོ་
ཞེས་འབོད།
ཁམ་བུ་ལྗང་ཁུ་ཡིས་ནག་ཉེས་བསགས་པ་ཡིན་ནམ།
ཁམ་བུ་ནག་པོ་ཞེས་འབོད་དོན་ག་རེ་ཡིན་ནམ།
ཤག་ཤག་ཏུ་རྒྱུ་བའི་རླུང་གིས་སྡོང་པོ་བསྒུལ་ཞིང་།
སྡོང་པོ་འགུལ་ཐེངས་རེ་རེར་ལོ་འདབ་ས་རུ་ཟགས་
ཤིང་གྲུག
ཁམ་ལྗང་ནི་འཇིགས་སྣང་ཁྲོད་ནས་ནར་སོན་ནས་
ཡུན་རིང་འགོར་ནའང་།
ད་དུང་ཁམ་ནག་ཅེས་འབོད་ཅིང་བསམ་ངན་གྱི་
ཀུ་རེ་འདོན་པར་བྱེད།
ཉེ་ཆེ་བ་དེ་དག་གིས་ལྷག་ཏུ་བསམ་ངན་གྱི་ཀུ་རེ་
འདོན་པར་བྱེད།
ཁམ་ལྗང་ནི་ཁམ་ལྗང་ཡིན་པར་ཤེས་མཁན་མང་པོ་
མེད་ཅིང་འགའ་ཞིག་ཡོད།
སྡོང་པོ་ནི་དེའི་གྲལ་ཡིན་ཡང་སྡོང་པོས་ཁམ་ལྗང་
ཟེར་ནས་ནམ་ཡང་འབོད་མྱོང་མེད།
སྡོང་པོ་ནི་རྩ་བ་གཉིས་ལས་གྲུབ་ཅིང་རྩེ་མོའི་ལོ་ཏོག་
རྒྱས་ཆེ་ཤོས་དེ་ཡིན།
ལོ་ཏོག་ཆེ་རུ་ཆེ་རུ་ཕྱིན་པས་སྡོང་པོ་གཞན་གྱིས་སྡང་
མིག་གི་ཟུར་མདའ་འཕེན་ཡོང་།
དབྱར་ཚེས་ཀྱིན་ཚེས་ཀྱིན་ལོ་ཏོག་མང་དུ་བཀད་པས་
སྡང་སེམས་ཀྱང་མང་དུ་ཕྱིན།
ཞེ་སྡང་གིས་བརྟོལ་མི་ཐུབ་པ་དེ་སྙིང་རྗེ་ཡིན་ན།
ཁམ་ལྗང་ནི་སྙིང་རྗེ་ཞིག་དང་འདྲ་བར་སྡོང་རྩེར་
འགྱིངས་ནས་ཡོད།
ངག་མི་སྨྲ་བ་དང་རྣམ་རྟོག་དག་ཀུན་ནས་བསྡམས་
ཏེ་འགྱིངས་བར་བྱས།
དེ་ནི་རི་རབ་ལྟར་བརྗིད་ཅིང་མཚོ་མོ་ལྟར་གཏིང་ཟབ་
མོ་ཞིག་ཡིན་ཨང་།
ཀྱེ། མི་ཚོགས་ཀྱིས་མཐོང་བཞིན་ཡོད་དམ།
སྤྲིན་དཀར་དང་བྱ་ཁྱུ་ཡིས་བང་སྣང་དུ་ལྡིང་སྐོར་
བྱེད་ཀྱིན་ཨེ་འདུག
ཡེ་ཤེས་ཀྱི་ལྷ་ཚོགས་ཕོ་མོ་ཀུན་གྱིས་སྒྱུ་འཕྲུལ་གྱི་གླུ་གར་
ལ་རྩེད་བཞིན་ཨེ་འདུག
བྱིན་རླབས་ཀྱི་བླ་བྲེ་ཕུབ་ཅིང་གནས་ལུགས་ཀྱི་བདེན་
པ་སྟོན་གྱིན་འདུག་གམ།
ཡང་ན། རླུང་འཚུབ་ཀྱི་ཐལ་རྡུལ་ལས་གང་ཡང་མེད་
པ་འདྲའམ།
རྒོད་པོ་དང་འདྲ་བར་རླུང་གིས་བར་སྣང་དུ་སྐྱོད་
བཞིན་འདུག
ཉ་མོ་དང་འདྲ་བར་རྦ་རླབས་ཀྱི་ཁྲོད་དུ་འཁྱིལ་ནས་འདུག
༢
ཉིན་ཞག་ཕྲུགས་གཅིག་གི་དུས་ཚོད་ནང་དུ།
སྡོང་པོ་གཞན་ནི་ཏིལ་འབྲུ་ཙམ་ལས་ཆེན་པོར་མ་སོང་།
ཁམ་ལྗང་ནི་དེ་ལས་ལྡོག་སྟེ་ལང་ཚོའི་མཛེས་སྡུག་གིས་
ས་གཞི་ཡོངས་སུ་བཀབ།
མིའི་སེམས་ཁམས་སུ་མངར་སྐྱུར་གྱི་བྲོ་བ་གཞི་ནས་
སྨིན་ཞིང་།
ཁམ་ལྗང་གི་རིན་ཐང་གཞི་ནས་ཕྱི་རོལ་དུ་མངོན་
པར་བྱས་པས།
མངར་སྐྱུར་གྱི་བྲོ་བ་མེད་ལས་ཡོད་པར་གྱུར་པ་དང་།
ཁམ་ནག་ཏུ་འབོད་པ་ལས་ཁམ་ལྗང་དུ་འབོད་པའི་
ཐ་སྙད་ཀྱང་མངོན་པར་བྱས།
ཁྱོད་རང་མྱ་ངན་གྱི་ཐང་ཆེན་ལྟ་བུའི་ར་སྐོར་དེ་ནས་
ལོ་ཤས་བསྡད་པར་བྱས།
ཁྱོད་རང་འཇིགས་སྐུལ་རིང་ལུགས་པའི་གཡུལ་ས་ལྟ་བུ་
དེ་ནས་ལོ་ཤས་བསྡད་པར་བྱས།
ཁྱོད་རང་དྲང་བདེན་འཆད་མི་ཆོག་པའི་བཙོན་ཁང་ལྟ་
བུ་དེ་ནས་ལོ་ཤས་བསྡད་པས་བྱས།
ཁམ་ལྗང་། སྡོང་པོས་ཀྱང་ཁྱོད་ལ་རང་མིང་ནས་སྐད་
ཆ་མ་བཤད་པའང་དོན་འདི་དག་ཡིན་པ་འདྲ།
ཁམ་ལྗང་། དེ་ལྟར་མི་ལོ་དུ་མའི་རིང་དུ་ཁེར་རྐྱང་
གི་དཀའ་བ་སྤྱད་པར་བྱས།
རྒྱང་རིང་ནས་བཞུར་ཡོང་བའི་རླུང་འཚུབ་དག་གིས་
ཁྱོད་རང་འཁུར་བར་བརྩམས།
ནམ་མཁའ་ནས་བབས་ཡོང་བའི་ཆར་ཆུ་དག་གིས་
ཁྱོད་རང་བསྐྲུ་བར་བརྩམས།
ཁྱིམ་མཚེས་ཀྱི་ལྗོན་ཤིང་དག་གིས་ཁྱོད་ལ་སིལ་ཏོག་
གི་མཆོད་པ་ཕུལ་བར་བརྩམས།
ཁྱོད་རང་རླུང་འཚུབ་ཀྱིས་གཡོ་མི་ཐུབ་ཅིང་ཆར་ཆུ་
ཡིས་བངས་མ་ནུས།
སིལ་ཏོག་གི་མཛེས་སྡུག་གིས་ཀྱང་བསླུ་བྲིད་མ་ནུས།
ཁྱོད་ནི་འཇའ་ཚོན་དང་འདྲ་ཡང་འཇའ་ཚོན་
བཞིན་དེངས་བར་མ་བྱས།
གནམ་གཤིས་ལ་ལྟོས་པ་མེད་པར་ཁྱོད་རང་དྲོད་
འཇམ་གྱིས་གནས་ཡོད།
འུར་ཟིང་ལ་ལྟོས་པ་མེད་པར་ཁྱོད་རང་ལྷིང་འཇགས་
ཀྱིས་གནས་ཡོད།
ཁྱོད་ཀྱི་མཁྲིས་སུ་གནས་འཆའ་བ་དག་གིས་ཁྱོད་རང་
ལྷ་ཆེན་པོ་ཡིན་པར་བཤད།
ངས་ནི་ཁྱོད་རང་ཏིང་འཛིན་ལ་བཅིབས་པའི་ལྗོན་
ཤིང་ཡིན་པར་བཤད།
ངས་ནི་ཁྱོད་རང་ཤིང་སྡོང་སྐམ་པོ་ཞིག་ཡིན་པའང་བཤད།
དགུན་ཐ་མའི་ཁ་བ་བསླེབས་ཚར་ནའང་ཁྱོད་རང་
སྔར་བཞིན་གནས།
ཕྱོགས་བཞིར་རྒྱུ་བའི་བྱ་ཚོགས་ཀྱིས་སྐོར་བ་བརྒྱབ།
བདག་གིས་ཀྱང་རྟག་ཏུ་གཡས་སྐོར་གཡོན་སྐོར་བརྒྱབ།
ཙག་རླུང་གིས་རྨས་མ་བཟོས་པའི་འགྲོ་བ་དག་གིས་
ལྷག་ཏུ་སྐོར་བ་བརྒྱབ།
འགྲམ་ངོགས་ཀྱི་སྡོང་པོ་དག་ཀྱང་ཚུར་ཚུར་སྒུར་བོར་བྱས།
༣
སྔོ་བསང་གི་དུད་སྤྲིན་ཞིག་གིས་བར་སྣང་ཡོངས་
སུ་བཏུམས།
མི་ཚོགས་ཀྱིས་སུ་ཞིག་ལ་ཐལ་མོ་སྦྱར་བའམ་ཙོག་
པུར་བསྡད་དེ་ལུས།
མིག་མཐའ་ནས་མཆི་མ་རྒྱུ་ཞིང་སེམས་ནང་ནས་སྐྱོ་
གདུང་གི་རླུང་འཚུབ་རྒྱུ།
ཁྱོད་རང་གཅིག་པུར་སྟོང་བའི་ཁམས་སུ་བཞུགས་
ཤིང་འོད་ཟེར་འཕྲོས།
གྲིབ་སྨག་མེད་པར་བཞུགས་ཤིང་ཐོག་རེག་གི་མདུད་
པ་ཡོངས་སུ་གྲོལ།
སྡོང་པོ་ཡི་ལོ་འདབ་རེ་རེ་ག་ལེར་ས་གཞིའི་ངོས་སུ་གྲུག
ང་རང་མིག་ཆུ་ཡིས་བརྣངས་ནས་ཡུན་རིང་ལ་སྒོ་
ཁར་ལུས།
གློ་བུར་དུ། སུ་ཞིག་གིས་བྲང་གཞུང་དུ་ཁུར་
ཚུར་བསྣུན་པ་ལྟར།
རྡོ་སྒྲ་ཐྲིག་ཐྲིག་གིས་བར་སྣང་དུ་སྐོར་ལྡིང་བྱས།
འཇིག་རྟེན་ནི་སྟོང་ཁམས་ཆེན་པོ་ཞིག་ཡིན་ན།
མི་ཚེ་ཡང་འཛིན་པ་མེད་པའི་སྟོང་ཁམས་ཆེན་པོ་
ཞིག་ཡིན་ངེས།
ཁྱོད་ནི་འཛིན་པ་མེད་པའི་སྟོང་ཁམས་ཆེན་པོ་སྟེ།
སྐྱེ་བས་འཛིན་པ་མེད་པ་དང་འཆི་བས་ཀྱང་འཛིན་
པ་མེད་དོ།།
དྭངས་གཙང་གི་ཕ་རོལ་ནས་འོད་ལམ་ལམ་དུ་འཚེར་
བའི་སྐར་མ་དེ་ཉིད།
ལས་ཉོན་གྱིས་མནར་བའི་ང་ཚོའི་ཆེད་དུ་འཚེར་བ་
འདྲ་ཞིང་།
བདེན་དོན་ལ་ཅེར་བའི་མིག་ཟུང་དང་མྱང་འདས་ལ་
མོས་པའི་བྱིས་པ་དག་ལའང་འཚེར་བ་འདྲ།
ང་ནི་བྱིས་པ་ཞིག་ཁྱོན་ནས་མིན་པར་བསམས་ཤིང་
ཨུ་ཚུགས་ཀྱིས་འགྲེངས་བར་བྱས་ཀྱང་།
སངས་རྒྱས་ཀྱི་སྣང་ངོར་ང་རང་བྱིས་པ་ཞིག་ཡིན་
པ་གླེགས་བམ་ལས་ཀྱང་བཤད།
རྩོམ་གསར། 10