ཚངས་པ་བརྒྱ་བྱིན་དང་བཅས་པའི།།

སུམ་རྩེན་མཐོ་རིས་ཀྱི་ལྷ་ཚོགས།།

འཆི་མེད་གཡང་ཆགས་ཀྱི་རི་ནས།།

ཆིབས་ཀྱི་ཁ་ལོ་དེ་བསྒྱུར་མཛོད།།

སྒོས་སུ་འཚོ་བྱུང་གི་བུ་མོ།།

པི་ཝང་འཁྲོལ་ཆ་དེ་བཞག་ནས།།

གནམ་ཟམ་རྨུ་ཐག་ལ་འཁྲིལ་ཏེ།།

སྙན་ངག་སྤྲང་ལམ་དུ་ཕེབས་མཛོད།།

ངེས་མེད་གང་ས་རུ་འཕྱན་པའི།།

ཨ་མའི་སེམས་ཁྲལ་གྱི་སྒྱེ་མོ།།

ཐལ་རླུང་གཡུལ་ས་རུ་མ་འདུག།

འཚོ་བའི་རྡུལ་བརྩེགས་ཀྱིས་སྦག་ཡོང་།།

མུན་ནག་འཇིག་རྟེན་གྱི་སྟེགས་བུར།།

ཟླ་བའི་འོད་གུར་དེ་འཚོལ་དགོས།།

འཚོ་བའི་བྲོ་གར་གྱི་གསེང་ནས།།

རི་བོང་སྟངས་སྟབས་དེ་འཚོལ་དགོས།།

ལས་དབང་ཤི་རྨས་ཀྱི་རུ་དཔུང་།།

ཇི་ལྟར་གཉན་འཇིགས་དེ་ཆེ་ཡང་།།

སྙིང་སྟོབས་ངར་ཤུགས་ཀྱི་དར་ཆ།།

ནམ་མཁར་ལྷབ་ལྷུབ་ཏུ་གཡོ་དགོས།།

བདེ་སྣང་མིག་མདུན་གྱི་ཀོ་གྲུས།།

འགྲུལ་པའི་བློ་སེམས་དེ་བཀུག་ཀྱང་།།

བཞུད་ལམ་རྐང་ཐང་གིས་བཅད་དེ།།

དགོས་འདོད་ཀུན་འབྱུང་དེ་ལེན་དགོས།།

ཕར་དགག་ཚུར་དགག་གི་ཁྲོམ་རར།།

རྨོངས་པའི་ཁྱི་རྒན་ལ་བཞོན་ཏེ།།

དོན་མེད་མུ་ཅོར་གྱིས་བཀང་ན།།

བདེན་པའི་ཞི་མི་དེ་སྐྲག་འགྲོ།།

མཐིང་སྨུག་སྦྲ་ནག་གི་འདབས་ནས།།

འབྲོག་མོའི་བཞིན་རས་ལ་འོ་བྱོས།།

བ་གམ་གྲོང་ཁྱེར་གྱི་གསེང་ནས།།

རྒྱ་མོའི་བརླ་ཤ་ལ་ལྟོས་འཚལ།།

འཆར་ཡན་ཚོར་སྣང་གི་བ་མོ།།

མུ་མེད་རྩྭ་ཐང་ལ་མ་འཚོ།།

འཚོ་གནས་རིང་ལུགས་ཀྱི་ཕར་སྤྱང་།།

གཡང་དཀར་ཁྱུ་ཚོགས་སུ་གཏོང་དགོས།།

ཕྱི་བཟོ་ནམ་མཁའ་ཡི་སྟེགས་བུར།།

མདོ་མེད་འབྲུག་སྐད་རེ་མ་རྒྱག།།

ལྷིང་འཇགས་ལག་ལེན་གྱི་གཡུལ་སར།།

དགྲ་བོའི་མགོ་ལག་དེ་གཅད་དགོས།།

བསམ་མེད་འགྱིང་རི་ཡི་རྦབ་རྡོ།།

གཤོག་པས་འགོག་ཐབས་ཤིག་མེད་པས།།

སེམས་ཆུང་བློ་གྲོས་ཀྱི་གསེར་སྦྲང་།།

སྔ་ཙམ་གཡོལ་ཐབས་རེ་བྱེད་དགོས།།

སྔོ་ལྗང་སྤྱི་ཚོགས་ཀྱི་རྐང་འཐུང་།།

ཆགས་འཇིག་སྒོ་ར་ན་སྐྱེས་པས།།

སྙོམ་ལས་འབུ་ལྷམ་ལ་མ་གཡེང་།།

གཡུ་ལོ་འདབ་སྟོང་དེ་དགྲོལ་དགོས།།

ཐབས་ཤེས་ཁྱུང་ཆེན་གྱི་གཤོག་རླབས།།

ཟང་ཟིང་ནམ་མཁའ་རུ་འགྱུར་ཞིང་།།

མྱི་ཁའི་སྤྲིན་ཕུང་དེ་གཏོར་ནས།།

རང་དབང་སྟོང་ཆ་དེ་འཚོལ་དགོས།།