འོ་སེ། 2020-07-03
གཉིད་ལས་མ་སད་གོང་།
ཐ་སྙད་ཀྱི་གཤོག་པ་ཐོགས་ཏེ།
དགུ་ཚིགས་ཀྱི་ཁྱིམ་རྒྱུད་དུ་འཕུར་ན་བསམས།
སྐར་མ་རེ་རེར་མེ་ཏོག་དཀར་དམར་གྱི་ས་བོན་བཏབ་སྟེ།
མ་འོངས་པའི་ཁྱོད་ལ་མཛེས་སྡུག་གི་སྐྱེད་ཚལ་ཞིག་བསྐྲུན་ན་འདོད།
གཉིས་ལས་མ་སད་གོང་།
ཐ་སྙད་ཀྱིས་བཟི་བའི་བྱེའུ་ཞིག
ངའི་ཁང་ཁྱིམ་དུ་ལྡིང་སྐོར་གྱིས་འཕུར་བཞིན་འདུག
ངའི་ཁང་ཁྱིམ་འདི་ཧ་ཅང་དོག་ནའང་།
བྱེའུ་དེ་དག་ལ་མཚོན་ན་རི་རབ་དང་གཙང་བོ་བརྒལ་བའི་སྣང་བ་འདུག
གཉིད་ལས་མ་སད་གོང་།
ཉམས་ཆུང་བའི་རི་བོང་དེའི་བུ་ཕྲུག་ཚོ་ཤིན་ཏུ་སྙིང་རེ་རྗེ།
བྱ་གླག་དེས་སྡེར་མོ་ཁྲག་གིས་སྦག་བཞིན་ནུབ་ཕྱོགས་སུ་འཕུར་སོང་།
གཉིད་ལས་སད་རྗེས།
མྱ་ངམ་ཐང་དེ་ནས།
སྐམ་ཤིང་རིད་པའི་སྡོང་མགོར་འཛེགས་ཏེ།
ཕྱོགས་ཕྱོགས་སུ་རྒྱང་བལྟས་བྱས་ཀྱང་།
དྲག་རླུང་གིས་གསེད་པའི་བྱེ་རྡུལ་ཞིག་ལས་ཅི་ཡང་མཐོང་མ་སོང་།
དེ་ནས་སླར་ཡང་རྨི་ལམ་གྱི་དག་ཞིང་ཞིག་ལ་རེ་སྒུག་བྱས།
རྩོམ་གསར། 10