རྡོ་རིས། 2020-05-22
ཐང་ཆེ་ཆུང་གི་ས་མཚམས་ཉུལ་ནས།།
ལམ་དཀའ་སྡུག་གི་རི་མོ་འབྲི་བཞིན།།
གཉོམ་དུང་དུང་གི་བྱམས་པ་དྲན་ནས།།
སེམས་བསམ་པ་ཡི་འདྲིས་མདོ་དེ་རུ།།
སྟོད་སྡེ་ཆེན་དང་སྡེ་ཆུང་བརྒྱུད་མྱོང་།།
ལས་རྒྱུ་འབྲས་ཀྱི་འཁོར་ལོ་བརྗིད་པོ།།
གཞི་སྣང་སྲིད་ཀྱི་ཀ་བར་བཏགས་ནས།།
ལམ་རྟེན་འབྱུང་གི་འབྲས་བུ་འདི་དང་།།
ནུབ་བདེ་ཆེན་གྱི་ཞིང་མཆོག་དེ་ཡང་།།
ཁྱོད་འུ་གཉིས་ཀྱི་བསགས་འབྲས་ཡིན་ནོ།།
ལུས་ཁ་བ་དང་ཆར་པས་བརླན་ཀྱང་།།
ཡིད་གུར་ཁང་དུ་མེ་ཏོག་བཞད་ནས།།
གཞོན་བྱིས་པ་དང་མེ་ཏོག་ཚོམས་བུ།།
སེམས་དྭངས་གཙང་གི་རབ་ཁ་ཡོད་ན།།
སྨན་སྒྲོལ་མ་དང་བརྩེ་བ་འགྲེལ་ཆོག།
ལམ་རིང་ཐུང་གི་རྐང་ལམ་འདི་ཡང་།།
སྙིང་ཆུང་ཆུང་གི་འཕར་རྩ་མྱུར་མྱུར།།
མཚན་རྨི་ལམ་ལའང་ཞེན་ཆགས་ཡིན་ན།
བྱེའུ་འཇོལ་མོ་དང་སེམས་ཀྱི་གཡུ་ལོ།།
ལས་དཀར་ནག་གི་དྲིལ་བུ་དཀྲོལ་ཆོག།
སྔོན་བསོད་ནམས་ཀྱི་ནོར་བུ་ཡོད་ན།།
ཡུལ་མེ་ཏོག་དང་བཀྲ་ཤིས་ལུང་པར།།
སྐྱིད་ལྷན་འཛོམས་ཀྱི་དགའ་སྤྲོ་རེ་རེ།།
ལོ་ཆེ་ཆུང་གི་མཚམས་སུ་རོལ་ནས།།
སྡེ་ཆུང་ཆུང་གི་དབུས་སུ་གྱེར་ཆོག།
གཞི་བཀྲ་ཤིས་ཀྱི་གཡང་གི་ལུང་པར།།
ལས་རྟེན་འབྲེལ་གྱི་འཁྲི་ཤིང་མཆོག་ལྡན།།
ཆུང་ཚེ་འགྲོགས་ཀྱི་སྨོན་ལམ་གྲུབ་ན།།
འབྲས་ལྗོན་བཟང་གི་སྙེ་མ་བཞད་ནས།།
ཆུང་གཡུ་སྦྲང་གི་མེ་ཏོག་འཁྲུངས་ཤོག།
གཟུགས་ལང་ཚོ་དང་ཉི་མའི་འོད་ཟེེར།།
ཞོགས་སྐྱ་རེངས་ལ་གཅིག་ཏུ་ཆགས་ན།།
མཚོ་དྭངས་གསལ་གྱི་བརྩེ་བ་ཟབ་མོ།།
ཡུལ་ལུང་པ་འདིའི་དབུས་སུ་མཆེད་ན།།
གཞོན་སྣང་བ་ལ་གཤོག་པ་ལོས་ཐོགས།།
རི་མཐོན་པོ་དེར་སྨུག་སྨིན་འཁྱིལ་ནས།།
སེམས་དྭངས་གསལ་གྱི་མེ་ལོང་ངོས་སུ།།
རྡུལ་ཕྲ་རགས་ཀྱིས་མཚོན་པར་མ་ནུས།།
ལྷ་སྒྲོལ་མ་དང་རང་བཞིན་གཅིག་པའི།།
སྨན་སྒྲོལ་མ་འདི་བརྩེ་བའི་མཛོད་ཡིན།།
སྤང་མེ་ཏོག་བཞིན་བཞད་པའི་སྒྲོལ་མ།།
ཆར་བསིལ་མ་བཞིན་འབབ་པ་བདེན་ན།།
དབྱར་ཟླ་གསུམ་གྱི་སྟོད་སྨད་བར་ནས།།
ལུས་ཁྲུས་ཆབ་ཀྱིས་དངོས་གྲུབ་སྩོལ་ལ།།
ཞེ་མཐུན་སེམས་ཀྱི་ཟམ་ཆེན་བརྒལ་ཤོག།
ཡར་གཟུགས་མཛེས་ཀྱི་དབྱངས་ཅན་ལྷ་མོ།།
ཞིང་མི་འགྱུར་གྱིས་ལྷོ་ཕྱོགས་གནས་ནས།།
མར་འཁོར་བ་ན་འཁྱམས་པའི་བདག་ལ།།
དབྱངས་སྙན་དངགས་ཀྱི་ཟིལ་བུ་ཁྲོམ་ཁྲོམ།
ཡང་སྡེབ་སྦྱོར་གྱིས་སྙན་ཆ་ལེགས་ལེགས།།
རྩོམ་གསར། 10