འཇམ་དཔལ་ནོར་བུ། 2020-03-18
སྙིང་དབུས་མི་ཕྱེད་དད་པའི་གུར་ཁང་ན།།
ཐུགས་རྗེ་བརྩེ་བའི་གཟི་མདངས་ཕྱོགས་མེད་འཕྲོ།།
གང་མཚན་དྲན་པས་གཏི་མུག་མུན་པའི་སྤྲིན།།
ཡོངས་བྲལ་ཀུན་མཁྱེན་བླ་མར་གུས་པས་འདུད།།
སྲིད་པ་ཨ་ལོང་འདྲ་བའི་འཇིག་རྟེན་འདིར།།
ཡོད་ཚད་རྒྱུ་འབྲས་གཉིས་ལས་འདའ་བ་མེད།།
དེའི་ཕྱིར་འཕགས་པ་རྒྱུ་ལ་འཇིགས་ཤིང་།།
སོ་སྐྱེ་ཐ་ཤལ་བ་དེ་འབྲས་བུ་ལ་སྐྲག།
གནའ་ནས་ད་བར་གཅིག་ནས་གཅིག་མཐུད་དེ།།
དགའ་སྐྱོ་སྤེལ་མའི་བྱ་བ་མང་དུ་ཐོན།།
ཐམས་ཅད་སྔོན་ལས་ཡིན་ཞེས་སྨྲ་དཀའ་མོད།།
རྒྱུ་མེད་འབྲས་བུ་སྣུམ་པོ་གང་ནས་ཡོང་།།
དེས་ན་རང་ཅག་ཐུགས་རྗེ་བདག་ཉིད་ཅན།།
སྤྱན་རས་གཟིགས་མགོན་གང་གི་གདུལ་ཞིང་སྐྱེས།།
ཡོད་ཚད་གཞན་ལ་ལེ་བདའ་མ་ཡིན་པར།།
བསླུ་མེད་རྒྱུ་འབྲས་ཆོས་ལ་བསམ་མནོ་ཐོངས།།
གློ་ཚད་འཇའ་ཡལ་ཉིན་རེར་ཇེ་མཆེད་རེད།།
རྒྱ་ནག་ས་ནས་མེ་སྟག་ལྟར་འཕྲོས་པས།།
རིགས་རུས་གཅིག་པ་རྟའུའི་རུམ་དུ་ལྷུང་།།
ཁྱིམ་ཚང་གཅིག་གི་བདེ་སྐྱིད་གཏོར་བཞག་ཐལ།།
ད་ནི་ཚན་རིག་དང་མཐུན་འཕྲོད་བསྟེན་བྱོས།།
གཉིས་ནས་བླ་མ་དཀོན་མཆོག་སྙིང་གིས་གསོལ།།
གསུམ་ནས་འབྲེལ་འདྲིས་མ་མང་གཅིག་པུ་སྡོད། །
རང་དཔེ་གཞན་ལ་ལོངས་ནས་ལྷོད་མོར་གྱིས།།
སོ་སྐྱེའི་རྣམ་རྟོག་ཟད་མཐའ་མི་མངའ་བས།།
བཤད་ན་མང་དུ་འདུག་ཀྱང་དེས་འཚེངས་ཀི།
མདོར་ན་དོན་ཚན་གསུམ་པོ་སེམས་ལ་ཟུངས།།
རྒྱུ་འབྲས་བསླུ་མེད་གནས་ལ་འདང་ཞིག་རྒྱོབས།།
སྐྱབས་ཀྱི་མཐར་ཐུག་རང་ཉིད་རང་གི་མགོན།།
གོའུ་ཏ་མའི་ཞལ་གསུང་བདུད་བརྩིའི་རྒྱུན།།
མ་དོར་ཐུགས་ཀྱི་བཅུད་དུ་འཁྱིལ་ཡོད་ན།།
ཆོས་དང་སྲིད་ཀྱི་ཕུན་ཚོགས་དེ་ལས་འབྱུང་།།
རྩོམ་གསར། 10