གྱིན་འདའ་བ། 2020-02-20
མི་སེམས་འདོད་ཧམ་གྱི་མཚོ་ཆེན།།
མི་དགོས་རླབས་རིས་དེ་རྒོད་ཅིང་།།
མི་རུང་རྒྱུ་འབྲས་ཀྱང་བརྗེད་པས།།
མི་བཟོད་ནད་རིམས་ཀྱིས་མནར་རོ།།
ནད་ཁུངས་ཕ་ཝང་ལས་མཆེད་ཅིང་།།
ནད་དུག་འཛམ་གླིང་ལ་ཁྱབ་པས།།
ནད་ཡམས་གཟུགས་མེད་ཀྱི་ལྕགས་ཀྱུས།།
ནད་པ་བདུན་ཁྲི་ལས་བརྒལ་སོང་།།
ཕ་ཝང་ནད་དུག་གི་སྡོང་བོ།།
ཕ་རོལ་འདོད་རྔམ་གྱིས་སྦོན་པས།།
ཕ་བི་ཝུའུ་ཧན་གྱི་རིམས་ནད།།
ཕ་ཡུལ་མཐོ་སྒང་ན་མཆེད་སོང་།།
སྔོན་ལས་བཅོས་ཐབས་ཤིག་དཀའ་རུང་།།
སྔོན་ནས་འཕྲལ་རྐྱེན་དེ་ཟློག་དགོས།།
སྔོན་འགོག་ཐབས་ལམ་ལ་བསྟུན་ནས།།
སྔོན་བཞིན་བདེ་ཐང་དེ་གལ་ལོ།།
ཁ་བའི་ཡུལ་གཙང་འདི་ཡིན་རུང་།།
ཁ་ཐུམ་ཚན་རིག་དང་བསྟུན་ཟེར།།
ཁ་ཁོར་དོན་ཆེན་ཞིག་མེད་ན།།
ཁ་ཁུ་སིམ་པོ་རང་སྡོད་ཟེར།།
རང་ག་མ་ཡིན་པའི་ནད་འདི།།
རང་ཡུལ་མཐོ་སྒང་ན་མཆེད་པས།།
རང་གཞན་བདེ་ཐང་གི་དོན་དུ།།
རང་ཁྱིམ་གོར་མོ་རུ་བཞུགས་མཛོད།།
གོ་ཁྲབ་སྔགས་ཚིག་དག་ཟློས་པས།།
གོ་འཕེར་གང་མཚམས་ཤིག་ལོས་ཡོད།།
གོ་རིམ་སྔོན་འགོག་དག་མེད་ན།།
གོ་འཕང་མཐོ་བ་རུང་ཅི་ཕན།།
ནད་ཀྱི་སྐྱེ་མཆེད་འདིར་མ་བྲེད།།
ནད་རིམས་གཡུལ་ས་རུ་འགྲིམ་ཞིང་།།
ནད་ཡམས་འགོག་བཅོས་ལ་འཐབ་པའི།།
ནད་གསོའི་མཁྱུད་དཔྱད་པར་བསྔགས་འོས།།
ནང་རྒྱལ་ཧྲིལ་བོ་ལ་མཆེད་ཅིང་།།
ནང་གསེས་བོད་ཡུལ་ཡང་ཟིན་ན།།
ནང་བའི་གྲུབ་ཆེན་ཚོའི་གྲུབ་རྟགས།།
ནང་དོན་ཡོད་པ་ཞིག་རན་འདུག།
ལས་ངན་ཉམ་ཆུང་གི་སྲོག་ཆགས།།
ལས་ཀྱི་ཁ་ཟས་སུ་སྦོན་ན།།
ལས་འབྲས་བསླུ་མེད་ཀྱི་བདེན་པས།།
ལས་ཀྱི་རྣམ་སྨིན་དེ་ལོས་ཡིན།།
རྩོམ་གསར། 10