༡

ད་ལོའི་དགུན་འདི་གློ་བུར་དུ་སླེབས་བྱུང་།

རེ་སྒུག་གི་ཁྲོད་ནས་མདང་སང་ཁ་བ་འབྲིང་ཙམ་བབས་འདུག

ཁ་བའི་བབས་ཚད་མི་མཐུག་ནའང་།

ཁ་བའི་ཁྲོད་ན་འཁྱག་ཤུར་ཤུར་གྱི་གྲང་རླུང་གིས་

ཤ་གསེང་རུས་གསེང་བརྒྱུད་དེ་བཅོམ་ནས་འོང་།

ནོར་འཛིན་བུ་མོས་དངུལ་མདོག་གི་ལྭ་བ་བཀླུབས་ནས་

མཛེས་ཉམས་ངོམ་ཡང་།

ཡན་ལག་བརྒྱད་ལྡན་གྱི་གཙང་བོའི་རླབས་རྒྱུན་འཁྱག་

གིས་བཅད་པས་

དྭངས་གཙང་གི་ཆུ་མིག་དག་གིས་ཀྱང་དངངས་སྐད་ཤོར་དུས།

ང་ཡི་ལུས་ལ་སྔར་ལས་ལྷག་པའི་དྲོད་ཅིག་རྒྱས་ནས་འདུག

དེ་རིང་ང་གྲང་ངར་ལ་མི་འཇིགས་པའི་དཔའ་རྒོད་ཅིག་

ཏུ་གྱུར་འདུག

བརྗོད་མི་ཤེས་པའི་ཚོར་བ་འདིས་རྒྱང་རིང་རྒྱང་རིང་ཞིག་ལ་

མནོ་བསམ་གཏང་དགོས་བྱུང།

རེད་དེ། ང་ལ་གསེར་ལས་རིན་ཐང་ཆེ་བའི་ལག་ཤུབས་

ཤིག་ཡོད་པས་རེད།

༢

བལྟས་ན་མིག་ལ་མཛེས་ཤིང་གྱོན་ན་ལག་པ་དྲོ་བའི་ང་ཡི་

ལག་ཤུབས།

ད་ལོའི་དགུན་ཁར་ཁ་བའི་འདབ་མ་འཐོར་ནས་

རི་བོའི་གཏོས་དང་མཉམ་པ་ཞིག་བརྩིགས་ཀྱང་

ངའི་ལག་པ་ཕྱིད་པའི་དོགས་འཚེར་མི་དགོས།

ད་ལོའི་དགུན་ཁར་མཐོ་སྒང་འཁྱག་གིས་གཟིར་ཡང་

ང་ཡི་ལག་པར་འཁྱག་འདར་བྱེད་དགོས་མི་འདུག

ང་ལ་སྙིང་ཉེ་བའི་མི་ཞིག་གིས་

སྐྱེས་སུ་ཕུལ་བའི་ཀོ་བའི་ལག་ཤུབས་དྲོན་པོ་ཞིག་ཡོད་

པས་རེད།

ལག་ཤུབས་འདི་ངའི་ལུས་དང་གྲིབ་མ་བཞིན་དུ་འགྲོགས་

ནས་ཉིན་གཅིག་ལའང་ཁ་བྲལ་མ་མྱོང་།

ང་ཡི་ལག་ཤུབས།

ཁྱོད་ནི་ང་ལ་ཆེས་བློ་དཀར་བའི་སྙིང་གྲོགས་དམ་པ་ཞིག་

དང་ཀུན་ནས་མཚུངས།

༣

ང་ཡི་ལག་ཤུབས།

ཁྱོད་ནི་དགུན་གསུམ་གྱི་ཁ་བ་བུ་ཡུག་གི་ཁྲོད་ན་དྲོད་

ཀྱིས་འབར་བའི་མེ་ཕུང་ཞིག

ངའི་ཁོར་ཡུག་ལ་དྲོད་ཁོལ་སྟེར་བས། ང་ལ་གཞན་

ལས་འཕགས་པའི་བདེ་སྐྱིད་ཅིག་གིས་ཁེངས་ནས་ཡོད།

ཁྱོད་ནི་གྲང་ངར་གྱི་ནད་ཡམས་སེལ་བའི་དཀར་པོ་ཆིག་

ཐུབ་ཀྱི་སྨན་མཆོག་ཅིག

ངའི་བཟོད་མི་ཐུབ་པའི་འཁྱག་ནད་ཀྱི་སྡུག་བསྔལ་མཐའ་

དག་རྒྱང་དུ་བསྐྲད་པས།

དགུན་ཟླ་རིང་མོ་འདིར་ང་ལ་ཡིག་རིས་ཀྱིས་མཚོན་ཐབས་

བྲལ་བའི་དགའ་སྤྲོ་ཞིག་གིས་བརྟས་ནས་ཡོད།

ང་ཡི་ལག་ཤུབས།

ཁྱོད་མེད་ན་ངས་གྲང་ངར་བཟོད་མི་ཐུབ་ལ།

ང་མེད་ན་ཁྱོད་རང་སྤྱིར་བཏང་གི་ལག་ཤུབས་ཤིག་ལས།

རིན་ཐང་གཞལ་མེད་ཀྱི་དངོས་རྫས་རྩ་ཆེན་ཞིག་ཏུ་སུས་

ཀྱང་མི་བསྒོམས་སོ།།

༤

ང་ཡི་ལག་ཤུབས།

ངའི་ལུས་ལ་འབྱར་བའི་ལག་ཤུབས།

ང་དང་དགུན་ཁའི་གཏམ་རྒྱུད་ལ་འཐིམ་པའི་ལག་ཤུབས།

ཞོགས་པའི་ལུས་སྦྱོང་དང་ལྷན་དུ་ཁྱོད་ཡོད།

ཉིན་མོའི་དཔེ་ཁྲིད་དང་མཉམ་དུ་ཁྱོད་ཡོད།

མཚན་མོའི་རྨི་ལམ་གྱི་ཞིང་དུ་ཁྱོད་ཡོད།

ཉིན་མཚན་དུས་དྲུག་ཏུ་ང་དང་བར་ཐག་ཆེས་ཉེ་བའི་

ལག་ཤུབས།

ང་ནི་ཁྱོད་ལ་དགའ་ཞིང་ཁྱོད་ལ་དུང་།

ངས་ཁྱོད་ལ་སྙན་ངག་འབྲི་བཞིན་ད་ལོའི་དགུན་དེ་འདི་

ལྟར་སྐྱེལ་ལོ།།