གུ་དཔལ་ཤིས། 2020-01-15
རི་ལུང་གིས་བར་ཐག་ཆོད་པ་མ་རེད།
བར་ཐག་ནི་ཚོར་མེད་ངང་ཁུ་སིམ་དུ་ལུས་པ་དེ་རེད།
ཁ་ཡག་གིས་བར་ཐག་སྟུང་བར་མི་སྲིད།
བསླུ་བྲིད་ཀྱིས་བར་ཐག་སྡོམ་པར་མི་སྲིད།
བར་ཐག་ནི་གདོང་སྤྲད་ནས་འདུག་དགོས་པ་ཞིག་གཞི་ནས་མ་རེད།
ཞེ་དྲོད་མར་ཁུ་འདྲ་བོ་བློ་ཉེ་ལས་བར་ཐག་མ་རེད།
ཡོད་མི་སྲིད།
སྐྱེད་ཚལ་དུ་བཞད་པའི་རྒྱ་སེ།
འཛུམ་ལྷུག་ལྷུག་གི་འདབ་མ་ཇི་ལྟར་གྲོལ་བར་བརྩམས་རུང་།
སྐམ་ཟིན་པའི་ཞེ་འདང་གི་རྒྱ་སེ།
རྨོ་འདེབས་ཀྱི་ཐབས་རྩལ་ཇི་ལྟར་བཀོལ་རུང་།
སླར་ཡང་བཞད་པའི་དུས་ཚིགས་ཤིག་ཡོད་མི་སྲིད།
རྟ་ཕོ་འཚོལ་བ།
རྟ་ཕོ་ཁྱོད་གང་དུ་འདྲོགས་སོང་།
མཐའ་ཀླས་པའི་རྩྭ་ཐང་འདི་ནས།
ངས་ས་ཕྱོགས་གང་ཞིག་དུ་འཚོལ་དགོས་སམ།
འབྲོང་ཁྱུ་གཤར་བའི་རྫ་ལམ།
ཁྱོད་སྙེག་པའི་རྐང་རྗེས་ཡོད་དམ།
ཡུལ་གྱར་དུ་ཕྱིན་པའི་ཉག་ཁ་དེར་སོང་ན།
ཁྱོད་སོང་བའི་རྒྱབ་གཟུགས་དྲན་སྣང་དུ་མངོན་
ཐུབ་བམ།
འཚོ་བ།
བལྟས་ཚོད་དུ་འཇམ་ཐིང་ཐིང་གི་འཚོ་བ་འདི།
ཅི་འདྲའི་ལྷོད་ཤ་ཆགས་པ་ཞིག་ཏུ་སེམས་ནའང་།
གཉིད་སོས་དལ་ཙམ་ཡང་ཁུག་ཁོམ་མི་འདུག
ཞོགས་སྲོད་ཀྱི་མཚམས་སྤྲིན་ལྟ་བུའི་མི་ཚེ།
སྐད་ཅིག་མའི་ཡུན་གྱི་འཆར་སྣང་རྒོད་ཀྱང་།
ཞེ་རྩ་རློན་བྱེད་ཀྱི་གཙང་བོ་མི་འདུག
སྨྲེང་།
སྲོད་དབྱངས་འཇགས་ཤུལ་དུ་སྙན་འཇེབས་མ་ཚོར།
གྲིབ་མ་བོར་ཉིན་ནས་རང་ཉིད་མ་རྙེད།
ངལ་དུབ་ཀྱི་དཔྱིད་གླུ་འཐེན་རུང་།
ལྷོད་ལ་འབབ་ཐབས་མ་བྱུང་།
ཁྲག་འདྲེས་པའི་གཙང་བོ།
སྐྱོ་སྐྱོ་ངང་བཞུར་དོན་ཅི་ཞིག་ཡིན།
རྩོམ་གསར། 10