རྡོ་རྗེ་ལྷ། 2019-12-25
འཛམ་གླིང་གི་མུན་པ་གཏོར་བའི་འོད་ཆེན་གྱི་རྟ་བདུན་དབང་བོ།།
མི་རིགས་ཀྱི་སྡུག་བསྔལ་སེལ་བའི་རླབས་ཆེན་གྱི་བཤེས་གཉེན་དམ་པ།།
གསར་སྐྱེས་ཀྱི་གཞོན་ནུ་མང་པོའི་བྱམས་ལྡན་གྱི་ཕ་མ་གཉིས་པ།།
ཤེས་རིག་གི་ས་གཏེར་ལྟ་བུའི་མཁས་མཆོག་གི་དགེ་རྒན་དམ་པ།།
མཐུན་སྒྲིལ་གྱི་སློབ་གསོའི་སྲོག་ཤིང་མཁྱེན་ལྡན་གྱི་སློབ་དཔོན་དམ་པ།།
གཞན་ཕན་གྱི་བསམ་བློ་མ་བོར་སྙིང་དབུས་ཀྱི་སྒྲོན་མེ་རྐང་གཅིག།
ཟླ་མེད་ཀྱི་གངས་རིའི་བུ་ཕྲུག་སྐྱོང་མཁན་གྱི་གངས་སེང་དཀར་མོ།།
འགྱུར་མེད་ཀྱི་ལྷག་བསམ་དྲོན་མོ་གངས་ཅན་གྱི་ལྗོངས་ལ་བཏབ་སོང་།།
གཏིང་ཟབ་ཀྱི་རྒྱ་མཚོར་འགྲན་པའི་ཤེས་ལྡན་གྱི་བཤེས་གཉེན་དམ་པ།།
དབྱར་སྐྱེས་ཀྱི་རྔ་སྒྲ་ལྟ་བུའི་སྐད་ངག་གི་ང་རོའི་གདངས་ནས།།
དགོས་འདོད་ཀྱི་ཤེས་བྱའི་བདུད་རྩི་ཕངས་མེད་ངང་ང་ཚོར་བསྩལ་བའི།།
ལྷག་བསམ་ལ་བཀའ་དྲིན་མཚོན་པའི་བསྟོད་པ་ཞིག་སྨྱུག་རྩེར་འཁྱིལ་ཡོད།།
རྩོམ་གསར། 10