ཉན་ཤུལ་འཇམ་དབྱངས་གྲགས་པས་བརྩམས། 2019-11-11
ཉེ་བའི་ཆར་སྨྲ་བའི་སེང་ཆེན་དུ་གྲགས་པའི་མཁས་པའི་དབང་པོ་ཉན་ཤུལ་འཇམ་དབྱངས་གྲགས་པ་མཆོག་སྐུ་ཞི་བར་གཤེགས་པས་མགོན་པོ་གང་གི་རྗེས་འཇུག་གི་གདུལ་བྱ་དང་སློབ་འབངས་ཡོངས་ལ་ཚད་མེད་ཀྱི་མྱ་ངན་དང་གདུང་བས་གཟིར་ཡོད་པ་དང་། བོད་ཡུལ་གྱི་ས་ཆ་སྟོད་སྨད་བར་གསུམ་ནས་ཁོང་ཉིད་ཞིང་གཞན་དུ་གཤེགས་པར་གདུང་སེམས་མཉམ་བསྐྱེད་དང་རྗེས་དྲན་གྱི་མྱ་ངན་རབ་དང་རིམ་པ་ཞུས་ཡོད་ལ། འདི་དག་ནི་དམ་པ་གང་ཉིད་སྐུ་འཚོ་བཞེས་སྐབས་སུ་བོད་ལ་ལུགས་གཉིས་ཐད་ཀྱི་མཛད་རྗེས་རབ་ཏུ་ཆེ་བས་སྐུ་ཞི་བར་གཤེགས་པར་གྱོང་གུན་ཤིན་ཏུ་ཆེ་ཞིང་གདུང་འབོད་ཤུགས་དྲགས་མཚོན་པའི་ཚུལ་ཞིག་ཅི་ལ་མིན། དེ་ལ་འདི་ག་རྩོམ་སྒྲིག་ཁང་གིས་ཀྱང་དམ་པ་གང་ཉིད་སྐུ་ཚེའི་འཕེན་པ་རྫོགས་ཏེ་ཞིང་གཞན་བརྗེས་པའི་ངང་ཚུལ་འདི་ནི་བོད་ཀྱི་ཆོས་རིག་གང་གི་ཐད་དུའང་གྱོང་གུན་རབ་ཏུ་ཆེ་བས་དམ་པ་གང་ཉིད་དྲན་པའི་གདུང་བ་ཆེ་ཚུལ་དུ་ཁམས་ཀྱི་གཟའ་འཇུག་ཚགས་པར་དང་ཁམས་ཀྱི་དྲ་བ། འཕྲིན་སྟེགས་བཅས་ནས་དམ་པ་གང་ལ་རྗེས་དྲན་ཆེད་བསྒྲིགས་བྱས་ཡོད་ལ། འདིས་ཀྱང་དམ་པ་མཆོག་ཉིད་ཀྱི་དགེ་བའི་མཛད་འཕྲིན་བཟང་པོའི་སྐུ་དྲིན་མཚོན་བྱེད་ཙམ་དང་ཁོང་གི་ས་ལམ་དཀར་པོར་བར་ཆད་མི་འབྱུང་བའི་རྒྱུ་རུ་གྱུར་ཅིག་གུ།
འཕྲིན་སྟེགས་འདི་རུ་ད་སྔོན་ཀློག་པ་པོ་གང་གིས་ཀྱང་མཇལ་མྱོང་མེད་པའི་དམ་པ་ཁོང་གི་སྐུ་ཚེའི་མཇུག་ཙམ་དུ་མཛད་པའི༼འཇིག་རྟེན་གྱི་འགལ་འདུ༽ཞེས་པའི་ཤོ་ལོ་ཀ་མཚན་བཟང་གི་གྲངས་ལྡན་གྱི་གསུང་རྩོམ་འདི་ཉིད་ཀློག་པ་ཡོངས་ཀྱི་སྤྱན་སྔར་ཕུལ་བ་ཡིན་ལ། འདི་ནི་དམ་པ་ཁོང་གིས་སྐུ་ཚེ་ཡི་ཆེས་མཇུག་མཐར་མཛད་པའི་སྲོལ་རྒྱུན་སྙན་ངག་དེའང་ཡིན་སྲིད་པས་འདི་ལ་བླ་མེད་ཀྱི་རིན་ཐང་དང་ངོ་མཚར་བའི་བརྗོད་དོན། ཕུན་སུམ་ཚོགས་པའི་ཚིག་སྦྱོར་བཅས་ཀུན་ནས་ཚང་ཡོད་པས་ཕྱི་རབས་སྐལ་ལྡན་གདུལ་བྱ་དག་ལ་བཞག་པའི་ཞལ་ཆེམས་དྲི་མ་དང་བྲལ་བ་དེའོ།།
འཇིག་རྟེན་གྱི་འགལ་འདུ།
ཉན་ཤུལ་འཇམ་དབྱངས་གྲགས་པས་བརྩམས།
༡
ཐོས་པ་མེད་ན་བླང་དོར་གནད་མི་ཤེས།།
ཐོས་པ་ཤེས་འགའ་ང་རྒྱལ་ཆོམ་པོར་ཤོར།།
ཐོས་པས་རང་རྒྱུད་གྲོལ་བར་མ་གྱུར་ན།།
ཐོས་པ་རང་མགོ་གཅོག་པའི་ཐོ་བར་འགྱུར།།
༢
འབྱོར་པ་མེད་པའི་མི་ལ་ཀུན་གྱིས་བརྙས།།
འབྱོར་ལྡན་རྒྱུ་ལ་ཀུན་གྱིས་ཟ་རྔམས་སྐྱེ།།
འབྱོར་པ་ལྡན་དེས་རྒྱུ་ནོར་གསོག་པ་ལས།།
བསྲུང་བར་དགའ་བའི་གནད་འདི་མ་ཤེས་ནོངས།།
༣
གཞན་ལ་འཆད་པའི་སྨྲ་ལྕེ་རྣོ་ན་ཡང་།།
ལག་ལེན་འབྲས་བུ་ཉིན་སྐར་ལྟར་མཐོང་ཚེ།།
ཤེས་ལྡན་སུ་ཞིག་དེ་ལ་ཡིད་ཆེས་བྱེད།།
གཏམ་དེ་ནེ་ཙོའི་མ་ཎིར་མ་གྱུར་ཏམ།།
༤
བཤད་རྒྱུ་མེད་ན་ཀུན་གྱིས་དམན་སྡང་བྱེད།།
བཤད་རྒྱུ་མང་ན་ཀུན་གྱི་རྣ་བར་གཟན།།
བཤད་རྒྱུ་ཡོད་མེད་ཀུན་གྱིས་མདོ་དོན་གཏམ།།
ཆགས་སྡང་བདག་བསྟོད་གཞན་སྨོད་ཁོ་ནའོ།།
༥
ཀུན་གྱིས་རྒྱལ་ཁ་རང་ལ་ཐོབ་འདོད་ཀྱང་།།
དེ་ཡི་རྒྱུ་རྐྱེན་སྐྲུན་ཐབས་མ་མཁས་པས།།
མཐར་ཐུག་ཕམ་ཁ་རང་ལ་འཁོར་གྱུར་ཏེ།།
མི་ནོར་གཉིས་ཀ་བརླགས་པ་དག་ལ་ལྟོས།།
༦
གཙང་དང་བཙོག་ཅེས་ཀུན་ལ་གྲགས་མོད་ཀྱང་།།
ཕྱི་རོལ་རྣམ་པ་ཙམ་ལ་ངོས་འཛིན་ལས།།
དོན་གྱི་གཙང་བཙོག་ཤེས་པ་སྲིད་པ་འདིར།།
རེ་འགའ་ཙམ་ལས་མཐོང་དུ་མེད་པ་ཅི།།
༧
བཟའ་བཅའ་བཏུང་བ་དཀོན་དུས་བཀྲེས་པས་མནར།།
ཟས་རིགས་སྣ་ཚོགས་འབྱོར་དུས་ན་ཚས་མནར།།
དུས་དང་རྒྱུན་དུ་ལུས་སེམས་སྡུག་གིས་མནར།།
མནར་བའི་དུས་ཀྱིས་མི་གཏོང་རྒྱུ་རྐྱེན་ཅི།།
༨
མ་དྲིས་ཚེ་ན་གཏམ་གྱི་དབྱར་རྔ་སྒྲོགས།།
གལ་ལ་ཐུག་དུས་དྲི་བ་བྱས་པའི་ཚེ།།
རྐུན་པོ་གནམ་དུ་བཏགས་པའི་ངང་ཚུལ་ལས།།
ཚད་མར་ངེས་པའི་གཏམ་ལན་མེད་འདི་ཅི།།
༩
མེད་ལ་ཡོད་པར་སྨྲ་བའི་སྒྲོ་བཏགས་དང་།།
ཡོད་པ་མེད་པར་སྒྲོག་པའི་བསྐུར་འདེབས་གཉིས།།
གཏམ་གྱི་ཚད་ལས་བརྒལ་བའི་འུད་སྒྲོག་འདིས།།
གདོང་དམར་བྷོ་ཊའི་རིགས་ཀྱི་གཤིས་ཁམས་མཚོན།།
༡༠
སྐད་ཡིག་གཉིས་ནི་རིགས་ཀྱི་སྲོག་རྩ་སྟེ།།
དེ་ལ་བརྟེན་ནས་གཤིས་དང་སེམས་ཁམས་སྨིན།།
ལྡབ་ལྡིབ་གཞན་གྱི་གཡམ་རྒྱུག་བྱས་པ་འདིས།།
རིགས་ཀྱི་ཞིང་ས་གྲམ་པར་བསྒྱུར་བ་བཞིན།།
༡༡
ཁྲེལ་དང་ངོ་ཚ་ཤེས་ན་མི་ཆོས་དང་།།
རྒྱུ་འབྲས་བླང་དོར་ཤེས་ན་ལྷ་ཆོས་ཟེར།།
དེ་གཉིས་ལྡན་ན་མི་ལུས་རིན་ཆེན་ཡིན།།
བཟའ་བཏུང་དོན་གཉེར་དུད་འགྲོ་ཡིས་ཀྱང་ཤེས།།
༡༢
དུས་བཞིའི་བསིལ་དྲོད་སྙོམ་མིན་ཕྱི་ཡི་རྐྱེན།།
ཟས་གོས་རང་གི་འདུ་བའི་ནད་ཀྱི་རྐྱེན།།
གང་ལ་གང་འོས་དེ་དང་བསྟུན་མཁས་ན།།
འཚོ་བའི་འཕྲོད་བསྟེན་ལ་མཁས་སྐྱིད་ཅིང་བདེ།།
༡༣
ཨ་གསར་ངོ་དགའི་གཏམ་ལ་བདེན་པར་བཟུང་།།
བསམ་བཟང་སྐྱོན་མཚང་བརྗོད་ལ་ཁོང་ནས་འཁྲུགས།།
བླང་དོར་གོ་བ་ལྡོག་པའི་ངན་འབྲས་དེ།།
ཤེས་དུས་འགྱོད་ཀྱང་ཕྱི་རུ་ལྡོག་ཐབས་བྲལ།།
༡༤
མ་བསྐུལ་གཞན་ལ་འཆར་འགོད་བྱེད་མཁས་མང་།།
རང་གི་མདུན་གྱི་ལམ་བུ་ཕྲ་མོ་དེ།།
འཚོལ་བའི་འགག་འཕྲང་བརྒལ་བར་མི་ནུས་ན།།
འཆར་འགོད་རྣམས་ནི་བྲག་ཆའི་སྒྲ་མིན་ནམ།།
༡༥
ཁ་བཤད་ཚིག་གི་འཇའ་ཚོན་འབྲི་མཁས་ཀྱང་།།
བདེན་དོན་ལག་ལེན་འཁྱོལ་བ་ཉིན་སྐར་ཙམ།།
མ་བརྟགས་མ་དཔྱད་གྱ་ཚོམ་ཞུགས་པའི་འབྲས།།
རང་གཞན་ཕུང་ལ་སྦྱར་བའི་ལོ་རྒྱུས་མང་།།
༡༦
ཕ་མས་ཕྲུ་གུ་སྐྱོང་བ་སྤྱི་མཐུན་ལུགས།།
བུ་ཚས་ཕ་མར་བརྩེ་བ་བོད་ཀྱི་གཤིས།།
ད་ལྟ་དེ་ལས་ལྡོག་པ་མང་བ་འདི།།
སྙིགས་མའི་རང་མདངས་ངོམས་པ་མ་ཡིན་ནམ།།
༡༧
གཞན་སྐྱོན་བལྟ་བྱེད་མིག་ལྡན་ཀུན་ལ་ཡོད།།
རང་སྐྱོན་འཚོལ་ལ་གསལ་བའི་མེ་ལོང་དགོས།།
སྐྱོན་ཡོན་བླང་དོར་གནད་རྩ་མ་རྟོགས་པར།།
ཁ་ཚོན་མི་གཅོད་སྨྲ་བ་ཉུང་ན་མཛེས།།
༡༨
ཡ་རབས་རྗེས་འབྲངས་གངས་རི་བཞིན་དུ་བརྩེགས།།
མ་རབས་རྗེས་ཉུལ་ཆུ་བོ་ཐུར་དུ་འཁྲིད།།
དེས་ན་རང་ཉིད་ལེགས་པར་འདོད་རྣམས་ཀྱིས།།
རྣམ་ཀུན་མ་རབས་སྤྱོད་པར་དོགས་ཟོན་དགོས།།
༡༩
ཕ་ཡུལ་ཕ་སྐད་དག་ལ་དགའ་ཞེན་བྲལ།།
རང་ཟས་མི་ཟ་གཞན་ཟས་ལ་རེ་བ།།
དེ་འདྲའི་རིགས་ཀྱིས་ཁ་ནས་མ་སྨྲས་ཀྱང་།།
ཕ་མ་དག་ལའང་བརྩེ་གདུང་མེད་པ་མཚོན།།
༢༠
ཀླད་རྙིང་མཁྲེགས་བཟུང་གླེན་པ་ཨུ་ཚུགས་དང་།།
སྙིང་མེད་མགོ་སྟོང་གཞན་རྗེས་གཡམ་རྒྱུག་ཅན།།
ཕན་ཚུན་ཕྱོགས་སུ་མི་ལྷུང་དབུ་མའི་ལམ།།
འཚོལ་བའི་ཐབས་ཚུལ་ཤེས་ན་མཁས་པ་ཡིན།།
༢༡
སྤྱི་དོན་མི་སེམས་རང་དོན་ཁོ་ནར་བརྩོན།།
མཐོ་གང་མ་གཏོགས་འདོམ་གང་མི་མཐོང་བ།།
རྫིང་བུ་མི་སྐེམ་ཐབས་ལ་མི་འབད་པར།།
ཉ་མོ་མི་འཆིའི་ཐབས་ལམ་འཚོལ་བ་འདྲ།།
༢༢
གཏན་གྱི་བདེ་བ་སྒྲུབ་པའི་ཐབས་ལམ་མཆོག །
འཚོལ་བར་འདོད་རྣམས་ཤེས་རིག་སྦྱང་གལ་ཆེ།།
ཤེས་རིག་མེད་པར་བདེ་བ་བསྒྲུབ་འདོད་རྣམས།།
རྩིག་རྨང་མེད་པར་མཁར་ལས་བྱེད་དང་མཚུངས།།
༢༣
རང་དོན་སྒྲུབ་པ་སེམས་ཅན་སྤྱི་ཡི་གཤིས།།
གཞན་དོན་སྒྲུབ་པ་བྱང་ཆུབ་སེམས་དཔའི་ལས།།
གཞན་དོན་འགྲུབ་ན་རང་དོན་ཞོར་འབྱུང་དུས།།
འགྲུབ་པར་ངེས་པའི་གནས་ལུགས་ཤེས་གལ་ཆེ།།
༢༤
རང་གི་ནུས་ཤུགས་གཡག་ལྟར་ངར་བར་རློམ།།
གཞན་ལ་ཤིག་ལྟར་མཐོང་ཆུང་བྱེད་པ་དག །
རང་ནུས་མ་ཚང་གཞན་ལ་རྒོལ་བ་དེས།།
སྒོ་ང་བྲག་ལ་བརྡབ་པ་མ་ཡིན་ནམ།།
༢༥
ད་ལོ་བསྟོད་པའི་མེ་ཏོག་དགུང་དུ་འཐོར།།
སང་ཕོད་སྨད་པའི་ཁ་ལུད་ཆུ་ལ་འཕེན།།
རིམ་གྱིས་འགྱུར་བ་སྲིད་འདིའི་ཚུལ་ཡིན་མོད།།
འདི་འདྲའི་འགྱུར་སླ་བོད་འདིར་ཅི་ལས་བྱུང་།།
༢༦
སྐད་རིག་མང་པོ་སྦྱངས་པ་ལེགས་མོད་ཀྱང་།།
རང་སྐད་རྨང་གཞི་བརྟན་པོའི་སྟེང་དུ་གསོག །
གཞན་སྐད་ཤེས་དུས་རང་སྐད་བོར་བ་དེས།།
རིགས་ཀྱི་མྱུ་གུ་སད་ཀྱིས་བཅོམ་མིན་ནམ།།
༢༧
དབུལ་པོས་འབད་ཀྱང་ཟམ་ནོར་སོག་དུས་མེད།།
ཕྱུག་པོས་ཅི་ཙམ་བསགས་ཀྱང་ཆོག་ཤེས་མེད།།
མཐའ་མ་འདི་སྒྲུབ་སྙམ་པའི་གཏད་སོ་མེད།།
མེད་པ་གསུམ་གྱིས་མནར་འདི་ཅི་ཡིས་ནོངས།།
༢༨
ཁ་ནས་ཆོས་སྒྲོག་མིག་ནི་ནམ་མཁར་བགྲད།།
དོན་གྱི་ལག་ལེན་མི་དགེ་བཅུ་ལ་འབད།།
དེ་འདྲའི་མི་ཡི་ཤ་ཚུགས་ཅན་མཐོང་ཚེ།།
བསྟན་དགྲ་ཟེར་བ་དེ་མིན་གཞན་དུ་ཉུང་།།
༢༩
གདོད་མའི་འཚོ་བར་རོལ་བའི་རྒན་པོ་དང་།།
དེང་རབས་འཚོ་བ་སྤྱོད་པའི་གཞོན་སྐྱེས་དག །
ལུས་ཀྱི་ན་ཚ་གཞོན་སྐྱེས་རྣམས་མང་ན།།
འདི་ཡི་རྒྱུ་རྐྱེན་ཅི་ལ་ཐུག་ཅེས་འདྲི།།
༣༠
མདོར་ན་འཇིག་རྟེན་འདི་ན་འགལ་འདུ་ལས།།
བདེན་པར་གྲུབ་པའི་དོན་ཞིག་མ་མཐོང་བས།།
དམ་པའི་གསུངས་ལྟར་བདག་མེད་དོན་རྟོགས་ན།།
འགལ་འདུའི་ར་བ་དེ་ལས་ཐར་རམ་སྙམ།།
༣༡
ཤེས་རབ་མེད་ན་དུད་འགྲོ་དག་དང་མཚུངས།།
ཡོད་ཀྱང་ཤེས་རབ་འཆལ་ན་དེ་ལས་ལོད།།
དེས་ན་ཟབ་གསལ་མྱུར་ཚེའི་ཤེས་རབ་མཆོག །
ཚེ་རབས་ཀུན་ཏུ་མི་འབྲལ་གྲོགས་སུ་སྨོན།།
༣༢
འཇིག་རྟེན་འགལ་འདུ་ཅན་གྱི་འཚོ་བ་དེ།།
མི་ལོ་དོན་ལྔར་མྱོང་བའི་སྣང་ཚུལ་འགའ།།
རབ་རྒྱན་མེ་བྱའི་ཟླ་བ་དང་པོ༼༢༠༡༧ ༽རུ།།
ཉན་ཤུལ་འཇམ་དབྱངས་གྲགས་པ་ཞེས་བྱས་བྲིས།།
རྩོམ་གསར། 10