འཇམ་དབྱངས་ཚེ་རིང་། 2019-10-23
ཆོས་རྒྱལ་སྲོང་བཙན་སྒམ་པོའི་སྐུ་དྲིན་ལས།།
འཇམ་དབྱངས་ཐོན་མིས་བོད་ཡིག་གསར་གཏོད་མཛད།།
སཱ་ལའི་ལྗོངས་ལ་མུན་སེལ་པདྨོའི་གཉེན།།
བྱ་ལམ་ཡངས་པོའི་ཁྱོན་འགེངས་ཁྱོད་ཀྱི་དྲིན།།
དྲིན་ཆེན་ཟླ་མེད་དཔལ་ལྡན་མར་མེ་མཛད།།
བྱང་ཆུབ་འོད་དང་ཡེ་ཤེས་འོད་གཉིས་ཀྱིས།།
གངས་ཅན་ལྗོངས་སུ་དྲངས་པའི་བཀའ་དྲིན་མཐུས།།
སྐྱབས་འགྲོའི་བསླབ་བྱ་ལམ་གྱི་གཞི་མ་རུ།།
གདམས་ངག་ལེགས་པར་འབོགས་པའི་སྲོལ་རྒྱུན་གྱིས།།
བུ་སློབ་མཁས་པས་ས་སྟེང་ཡོངས་ལ་ཁྱབ།།
དཔལ་ལྡན་མར་མེ་མཛད་ཁྱོད་གངས་ལྗོངས་སུ།།
ཞབས་ཀྱིས་བཅགས་པའི་བཀའ་དྲིན་སྲིད་མཐའི་བར།།
གངས་ཅན་མཁས་པ་ཀུན་གྱི་མགྲིན་པའི་རྒྱན། །
བཀའ་གདམས་གསར་མའི་བདག་པོ་ཙོང་ཁ་བ།།
ཀླུ་འབུམ་དགེ་དང་ཤིང་བཟའ་ཨ་ཆོས་ལས།།
བལྟམས་པའི་རིགས་གསུམ་མགོན་པོའི་སྤྲུལ་པ་གང་། །
གངས་ཅན་མཁས་པའི་གཙུག་ན་ལྷམ་མེར་རྒྱལ། །
ཆོས་ཀུན་རྣམ་འབྱེད་མཁྱེན་དཔྱོད་རྣོན་པོའི་མཐུས། །
རྒྱལ་བསྟན་མཁའ་ལ་བསྒྲེངས་པའི་རྒྱལ་མཚན་གྱི།།
སྙན་པའི་གྲགས་པ་ས་གསུམ་ཁྱོན་དུ་གཡོ།།
རིག་གནས་ཆེ་བ་ལྔ་དང་ཆུང་བ་ལྔའི།།
མཚན་བཟང་ཤེས་རིག་དྲངས་པའི་ཤིང་རྟ་བ།།
བརྩེ་ཆེན་ལེགས་བཤད་འབྱུང་གནས་ས་སྐྱ་པ། །
འཇམ་དབྱངས་རྣམ་སྤྲུལ་གོང་མ་རྣམ་པ་ལྔས། །
བསྟན་འགྲོའི་ཕན་བདེའི་སྒོ་བརྒྱ་ལྷོད་ཀྱིས་ཕྱེ། །
ཁ་བའི་ལྗོངས་ལ་འོད་སྟོང་རིག་གནས་ཀྱི།།
ཆུ་གཏེར་ལེགས་འཁྱིལ་རྣམ་དཔྱོད་ཆེན་པོ་ཡི།།
ཕྱག་རྗེས་ཆེན་པོའི་བཀའ་དྲིན་བསྐྱངས་པ་འདིས།།
གངས་ཅན་ལྗོངས་ལ་སྔར་ལས་བདེ་སྐྱིད་རྒྱས།།
དགེ་བཤེས་མཁས་མང་བྱེ་བའི་བཀའ་དྲིན་གྱི།།
ས་འཛིན་ལྟོས་དང་མཉམ་པའི་གླེགས་བམ་ལ།།
སྐྱེས་རབས་གྲངས་མང་མཇལ་ཡང་རྫོགས་པའི་མཐའ།།
ནམ་ཡང་ཡོད་པའི་གོ་སྐབས་རིང་དུ་བྲལ།།
ཁྱད་པར་ཕྱི་དར་འདུལ་བའི་བསྟན་པ་ལ།།
མཁས་པ་མི་གསུམ་ལྷ་ལུང་དཔལ་རྡོར་སོགས།།
ལོ་རྒྱུས་མི་སྣ་གྲགས་ཅན་འགའ་ཞིག་ལ།།
སྙན་མོའི་ཚིག་གི་ཕྲེང་བས་བསྟོད་པར་བགྱིད།།
མཁས་དབང་དགེ་ཆོས་རིག་པའི་དཔའ་བོ་གང་།།
རྣམ་དཔྱོད་རྒོད་པོས་གོ་ལ་ཟླུམ་པོའི་སྟེང་།།
ཞིབ་འཇུག་ལས་དོན་སྐུ་ཚེ་གང་བོ་ལ།།
ངལ་བ་རིང་དུ་དོར་ནས་རང་རིགས་ལ།།
རང་གི་ནུས་པས་སྲི་ཞུ་བསྒྲུབས་པ་འདི།།
གངས་ཅན་སྐལ་ལྡན་ཚོགས་ཀྱི་ཡི་རང་གནས།།
རྗེ་བཙུན་འཇིགས་མེད་དམ་ཆོས་རྒྱ་མཚོ་ཡི། །
གསུང་སྐྱེས་མཁས་དབང་ཞབས་དྲུང་རིན་པོ་ཆེ།།
ངག་དབང་དབྱངས་ལྡན་རིག་པའི་འདོད་འཇོ་གང་།།
རྣམ་དཔྱོད་མེ་ལྟར་འབར་བ་ལས་བྱུང་བའི།།
ལུང་རྟོགས་ཡོན་ཏན་ཆུ་གཏེར་ཀློང་ཡངས་པོར།།
སྦྱངས་པའི་ལས་འཕྲོ་སྐལ་ལྡན་སྐར་ཚོགས་འདྲ།།
བགྲང་བྱ་མང་པོ་འདས་པའི་ད་ལྟ་ལའང་།།
མི་རིགས་མང་པོས་རང་རིགས་རིག་གནས་ལ།།
ངལ་བ་བརྟེན་ནས་སྦྱངས་པའི་འབྲས་བུ་ཡིས།།
བོད་པའི་རིག་གནས་ར་བ་སྔོན་ལས་ཆེ།།
སཱ་ལའི་ལྗོངས་ཀྱི་ས་ཁམས་རིག་གནས་དང་།།
རི་བྲག་ཆུ་སོགས་ཐུན་མོང་རིག་གནས་ལ།།
ཞིབ་འཇུག་ལས་ཀའི་དུས་ཚོད་འདའ་བར་བསྟོད།།
སྐལ་བ་བཟང་པོ་ལྡན་རྣམས་ཚད་ལྡན་བཤེས། །
བསྟེན་ལས་རིག་གནས་ཁྲིད་རྒྱུན་གཙང་མ་དེ།།
གཞོན་སྐྱེས་སྐལ་བཟང་ཚོགས་ལ་སྤོབས་པའི་ཉམས།།
ཞི་ཞིང་དུལ་བའི་མཚན་ཉིད་བཅུ་ཚང་བའི།།
བཤེས་གཉེན་ཚོགས་ལ་ཁ་མིག་ཡར་ལྟ་ཡི།།
རིག་གནས་ཁྲིད་རྒྱུན་སྤོབས་པས་གདེངས་མཐོ་པའི།།
མི་འཇིགས་སྤོབས་པ་ལྟར་དུ་ཁྲིད་བྱས་ནས།།
རང་རིགས་རིག་གནས་འཕེལ་ཞིང་རྒྱས་པ་ལ།།
འབད་འབུངས་སྲི་ཞུ་ལེགས་པོ་བྱེད་ཐུབ་ན།།
ཕ་མ་གྲོགས་པོ་ཡོངས་ཀྱི་རེ་བ་བསྐང་།།
དོན་གཉིས་མཐའ་འཁྱོངས་བྱེད་པའི་ལས་ལེགས་ལ།།
ཀུན་གྱི་རྗེས་སུ་ཡི་རང་བྱེད་པའི་གནས།།
སུམ་རྩེན་འདྲ་བའི་རྒྱལ་ས་པེ་ཅིང་དུ།།
བོད་པའི་རིག་གནས་སློབ་པའི་རྫོང་བཙན་པོ།།
ད་ལྟ་ཡིན་ཡང་རང་རིགས་རིག་གནས་ལ།།
སློབ་པའི་དམ་བཅའ་ནམ་ཡང་འགྱུར་དུ་མེད།།
མི་རིགས་གཞན་གྱི་སྔོན་ཐོན་རིག་གནས་ཀྱི།།
ལེགས་པའི་ཡོན་ཏན་ཚུར་ལ་ལེན་ཐུབ་ན།།
ལེགས་ཐོག་ལེགས་བརྩེགས་ནམ་ཡང་རང་གི་རྒྱན།།
མང་དུ་ཐོས་པའི་ཡོན་ཏན་ལ་བསྟེན་ནས།།
བསམ་བློ་ཡང་ཡང་བཏང་པས་རང་རྒྱུད་ལ།།
སྒོམ་པའི་ཡོན་ཏན་འབྱོར་བས་རང་ནུས་ཀྱི།།
རིག་གནས་སློབ་པའི་སྤོབས་པ་མི་དམན་ལ།།
སྙན་ཚིག་སྡེབ་ལེགས་རིག་པ་ལ་བརྟེན་ནས།།
དུས་རབས་ཉེར་གཅིག་བོད་པའི་རིག་གཞུང་ལ།།
ཡང་ཡང་འཇུག་པའི་སྨོན་ཚིག་ངག་ནས་ཐལ། །
རྩོམ་གསར། 10