གཟབ་ཉན་པ། 2019-10-11
སྨྲེང་སེམས་ཆུ་མོ་ཤང་ཤང་བཞུར་བ་དང་།།
དྲན་པའི་ཤེའུ་ཆུང་རི་ལ་ཤོར་བ་སྟེ།།
སེམས་ཀྱི་རི་བོར་སྨུག་ཞག་འཁྱིལ་བ་སོགས།།
ཁེར་རྐྱང་ཏིང་འཛིན་ཀློང་གི་མིག་ཆུ་ཡིན།།
ཞེན་ཆགས་སྟོང་ཕྲག་ཁྲི་ཡི་བཟི་ཁ་ནས།།
སྙིང་ཆུང་འདར་བའི་སྒྲ་དབྱངས་འབྱིན་པ་དང་།།
དབུ་མནའི་དམ་ཚིག་སྙིང་ལ་བརྐོས་པ་སོགས།།
ཁེར་རྐྱང་ཏིང་འཛིན་ཀློང་གི་མིག་ཆུ་ཡིན།།
བརྩེ་འཕྲིན་བྱེའུ་གྲེ་འགྱུར་བསྐུར་བ་སྟེ།།
བར་ཆད་རླུང་གིས་གནམ་ལ་སྤུར་བ་དང་།།
རྒྱང་རིང་སྙིང་ཉེའི་སྙན་དུ་མ་འཕྲོད་པ།།
ཁེར་རྐྱང་ཏིང་འཛིན་ཀློང་གི་མིག་ཆུ་ཡིན།།
བརྩེ་བའི་དར་ཐག་རིང་མོ་མ་ལྷོད་པར།།
ཞེ་འདང་ལྟེམས་མེར་འཁྱིལ་བའི་ཁྱོད་ཕྱོགས་སུ།།
སྐྱོ་བའི་ལག་ཟུང་ཐོད་ལ་ཀེར་བ་སོགས།།
ཁེར་རྐྱང་ཏིང་འཛིན་ཀློང་གི་མིག་ཆུ་ཡིན།།
སྐྱོ་སྡུག་དྲན་པས་གཟིར་ནས་སྦྲིད་པ་དང་།།
ཉི་ཤུའི་ལང་ཚོའི་མེ་ཏོག་རྙིད་པ་སྟེ།།
ཁྱར་འཁྱོར་གོམ་པའི་འདེགས་འགྱོགས་ལྷོད་པ་སོགས།།
ཁེར་རྐྱང་ཏིང་འཛིན་ཀློང་གི་མིག་ཆུ་ཡིན།།
ལས་འཕྲོ་རི་མོ་ཁ་དཀར་གཏིང་ནག་འདིས།།
ཡིད་མཐུན་གང་ཞིག་སྙིང་ལ་བཏབ་པ་དང་།།
བརྩེ་བའི་མུ་ཏིག་ཚེ་ལ་བསྟར་བ་སོགས།།
ཁེར་རྐྱང་ཏིང་འཛིན་ཀློང་གི་མིག་ཆུ་ཡིན།།
དྲན་གདུང་རྨ་ཁས་གང་བའི་མྱ་ཐང་ནས།།
སྐྱོ་སྡུག་བྱེ་བ་ཕྲག་བརྒྱའི་བཞེངས་བཀོད་དེ།།
མི་ཁའི་རླུང་བུ་གཡུགས་ལ་མི་འཇིགས་པར།།
ཁེར་རྐྱང་ཏིང་འཛིན་ཀློང་ནས་སྙན་ངག་བྲི།།
རྩོམ་གསར། 10