ཀ

གཟུགས་འདིས། མིག་ཟུང་ལོང་བར་གྱུར།

སྒྲ་འདིས། རྣ་བ་འོན་པར་གྱུར།

འོན་གྲང་། གཟུགས་སྟོང་པ་དང་སྒྲ་སྟོང་པའོ།།

ཅ

ཉི་མ་དང་ཟླ་བ་གཉིས།

མཁའ་དབྱིངས་སུ་འོད་ཀྱིས་གྲུབ་སྟེ།

རེས་མོས་ཀྱིས་འཁོར་ནའང་།

མུན་པ་མཚོ་ངོགས་སུ་བསྡད་དེ་ངན་ཇུས་འཐེན།

ཏ

དུས་ཚོད་ནི་ཡུད་ཙམ་ཡང་མི་སྡོད།

ཁོ་བོས་འདས་པ་ལ་ཕྱིར་ལྡོག་བྱེད་འདོད་པས།

སྙན་ངག་ཚན་པ་ཞིག་ཏུ་སྤྲུལ།

པ

སྒོ་སམ་སྟེང་གི་དབྱངས་གསལ་གྱི་རི་མོ།

ཆང་དང་དུ་བས་དཔྱད་གླེང་གི་འགོ་བརྩམ།

བཤད་ཚོད་ལ། འཆི་རྐྱེན་དང་འབྲེལ་བའི་ལོ་རྒྱུས་ཤིག

ཙ

རྩྭ་ཐང་ནས་གན་རྐྱལ་དུ་ཉལ་ཚེ།

དབྱར་གཞུང་གི་མཛེས་པ་ཕྱེད་ཙམ་ལས་མ་ཚོར།

བསིལ་རླུང་ལས་མཆེད་པའི་རྫི་གཞས།

ཉན་གྱིན་ཉན་བྲག་ཅའི་རང་བཞིན་ལས་མ་ཐོས།

ཞ

སྨུག་པ་སྟུག་པོ་ཞིག་འཐིབས་བྱུང་།

རྩྭ་དང་རྩི་ཤིང་གང་ཡང་མ་མཐོང་ལ།

ལྷག་ཏུ་ནམ་མཁའི་ཉི་མ་མ་མཐོང་།

ར

ཕྱི་ལོགས་སུ་ཁ་བ་འབབ་དྲག་པས།

ཁྱིའི་རྐང་རྗེས་ཇེ་མང་དུ་འགྲོ་བཞིན་འདུག་ཅིང་།

བྱེའུ་ཡིས་རྒུམ་བུ་འཐུ་བར་བྲེལ།

རེད་དེ། མི་ཚོ་སྔ་བཞིན་སོས་དལ་དུ་ཉལ།

ཧ

གདོང་འབག་གྱོན་པའི་མི་ཞིག

ཕྱག་སྟོང་སྤྱན་སྟོང་དུ་སྤྲུལ་ནས།

སེམས་ཅན་ཞེས་པའི་ཐ་སྙད་སྙི་མོ་ཞིག་སྒྲོག་སྟེ།

བྱ་ཤ་དང་ཉ་ཤ་གསོལ་བཞིན་བཞུགས།

ཨ

མཚན་མོ་འདིའི་དུས་ཡུན་བརྒལ་དུས།

མུན་ནག་ལ་ཁ་གཏད་པའི་འུག་པ།

གསེར་མདོག་གི་ཚ་ཟེར་གྱིས་གང་ཞིག་ཏུ་དེད།