མགར་ཐང་དཀར། 2019-04-10
དགུང་ལ་ཉི་ཟླ་སྐར་གསུམ།།
ས་ལ་པདྨ་འདབ་བརྒྱད།།
སེམས་པའི་ནང་སྙིང་བྲུས་ན།།
འོལ་ཚོད་ལབ་གླེང་ཡིན་འདྲ།།
དང་པོ་ཡར་ཀླུང་ཕྱོགས་ནས།།
མིག་ཟུང་རྒྱང་ལ་ཅེར་ན།།
རྒྱང་བཞུད་ཁུ་ལོ་མ་གཏོགས།།
སེམས་གཞས་འཐེན་ས་མ་བྱུང་།།
ཁུ་ལོ་ནགས་ཀླུང་འགྲིམས་དུས།།
མཐོངས་ཡངས་ནམ་མཁའི་ངོས་སུ།།
ཁུ་ལོས་གསུང་སྐད་བཏང་ཡང་།།
མཇལ་འཛོམས་སྐལ་བ་མ་བྱུང་།།
གཉིས་པ་ཨ་མདོའི་ཡུལ་དུ།།
རྩ་བཞི་ལྷོད་ལྷོད་གནང་ཡང་།།
བྲེལ་འཚུབ་གཏམ་གྱི་རླུང་བུས།།
དབང་ཀློང་དཀྲུག་དཀྲུག་གནང་སོང་།།
གཏམ་ལ་སྣུམ་ཚོན་བྱུགས་དུས།།
སེམས་པར་གས་ག་བཏང་བཞག།
གས་གར་ལྷན་པ་རྒྱག་དུས།།
རྣམ་ཤེས་སྦྲང་ཆུང་འཕུར་སོང་།།
གསུམ་པར་ཕ་ཡུལ་ཕྱོགས་ནས།།
སྣང་བའི་སྣ་གླུ་བླངས་སོང་།།
སྣང་བར་རྒྱགས་ཕྱེ་མེད་ན།།
སྣ་གླུ་ལོན་ས་མ་རེད།།
གོམ་པའི་འདེགས་འཇོག་བར་ནས།།
གོམ་ཁ་རྡོ་ལ་འཐོགས་སོང་།།
གོར་མོ་རྡོ་ཡི་རྩ་བ།།
ལག་པའི་ཁོགས་ས་མ་རེད།།
དབུས་ནས་ཨ་མདོའི་བར་དུ།།
སྣང་བར་མགུར་གླུ་བཏབ་བཞག།
མགུར་ལ་མངར་ཁ་ཆེ་བས།།
གདངས་ཀྱི་གར་སྟེགས་བཞེངས་ཐལ།།
སྣང་བ་རང་ཡན་ཞིག་ལ།།
ཚིག་གི་མདུད་པ་བརྒྱབ་སོང་།།
དུང་བ་གཉོམ་པོ་ཞིག་ལ།།
གཏམ་གྱི་ལྕགས་སྒྲོག་བརྒྱབ་སོང་།།
ཉམ་ཐག་མགོ་བོ་དུད་ཡོད།།
མཛའ་གཅིག་ལག་རྡང་ཞིག་མེད།།
ཆ་ལུགས་ཆོམ་རྐུན་བཏགས་ཡོད།།
སེམས་བརྐོས་རི་མོ་བསུབ་མེད།།
དུས་འཁོར་ཆུ་བོའི་རྒྱུན་ཡིན།།
ཐང་དཀར་བྲག་དམར་ཐེམ་ཡིན།།
སྣང་བ་བྱེ་མའི་ཐང་ཡིན།།
མགུར་གླུ་སྨྲེང་བའི་འབྲུ་ཡིན།།
རྩོམ་གསར། 10