ཀརྨ་ཚུལ་ཁྲིམས། 2019-01-25
ལྗིད་ཏིག་གེར་ཁུར་བའི་ཉིན་མོའི་ཀུ་ཅོ་དང་འུར་ཟིང་།
གཙང་ཁྲུས་ཐེངས་གཅིག་བྱས་རྗེས་མཚན་མོའི་ཁ་གཏད་དུ་འགྲེང་།
སྐར་མ་ལ་ལྟ་ནས་ལག་པས་འགྲམ་པ་སྐྱོར་དུས།
ཁུ་སིམ་ལ་བབས་པའི་སེམས་ཀྱི་ཁེར་རྐྱང་།
བསམ་གཞིག་གི་སྤྲིན་པ་རྒྱུན་མཐའ་དེད།
རྒྱང་རིང་དང་རྒྱང་རིང་གི་རྒྱང་རིང་།
འདས་སོང་དང་འདས་སོང་གི་འདས་སོང་།
ཡིད་ཀྱི་གཙང་ངོགས་ན་མེ་ཏོག་གཅིག་སྐྱེ་བའི་རིམ་པ་དང་བོར་བའི་རིམ་པ།
ཞོགས་པ་ནས་ས་སྲོད་བར་དུ་རྨས་པའི་སེམས་པ།
སྟབས་གོན་གྱི་སྤྲོ་འཛུམ་ཕྱི་ལ་ངོམ།
སྐྱོ་སུན་གྱི་དུས་ཚིགས་རུམ་དུ་བཅུག།
སོམ་ཉིམ་གྱི་གོམ་པ་ཕར་ཡོ་ཚུར་ཡོ།
བྲལ་གདུང་དང་སྐྱོ་གདུང་གི་ཁ་བ་ལེབ་མོ་བབས།
མཚན་མོའི་ལྷིང་འཇགས་ཀྱི་ཁ་གཏད་ནས་རང་ཉིད་སླར་ཡང་འཚོལ་དུས།
སྔོན་ཆད་ང་ཡི་རྩྭ་ཐང་ལ་ནག་ནོག་དང་བྲལ་བའི་མེ་ཏོག་ཡོད་པ་དྲན།
སྤྲོ་དགས་མྱོས་པའི་རྩེད་ར་དང་དུས་ཚོད་ཡོད་པ་དྲན།
དེ་དག་རེ་རེ་། དེ་དག་རེ་རེ་ནས།
དངན་པ་དང་རྙོག་འཛིང་གིས་ཕར་ལ་འདེད་ཟིན།
རྙེད་པ་དང་བོར་བ་རེ་རེས་རྒྱང་དུ་གཡུག་ཟིན།
ང་ཡང་གཡུག་ཟིན།
སོམ་ཉིམ་གྱི་ལམ་མདོ་རུ་གཡུག་ཟིན།
རྩོམ་གསར། 10