གཡུ་ལྗང། 2019-01-16
འཁོར་བའི་ལ་མོ་བརྒལ་ནས།།
ཁྱེད་ཀྱི་མངའ་ཐང་འགྲིམ་ན།།
མཚོ་ཆུང་ཕྱི་ཐག་ཅན་པོའི།།
ང་ལ་ནང་སེམས་གླན་ཡོང་།།
ན་ཆུང་སྣང་བ་མིན་ན།།
སྤྲིན་པ་ང་ལ་འཁྲེང་ཡོང་།།
ནམ་མཁའ་སྨྲེང་དང་མ་སྨྲེང་།།
བརྩེ་བའི་སྔ་ཕྱི་ཙམ་རེད།།
གཞོན་པ་གཞོན་པ་ཟེར་བ།།
སྨུག་པའི་ཕྱི་ནང་ཙམ་རེད།།
མིག་གིས་ལོངས་སུ་སྤྱད་ཀྱང་།།
སེམས་ཀྱིས་རེག་ཐབས་མི་འདུག
འཇའ་ཡིས་ལག་པ་དྲུད་ནས།།
མཁའ་རུ་བསྐོར་བ་རྒྱག་ན།།
ལྷ་ཚོགས་ཡང་ཡང་ཞུས་དང་།།
སྣང་བའི་ཟློར་གར་ཙམ་རེད།།
ཟླ་བ་མིག་ལ་འཁྲུལ་ནས།།
སེམས་ཀྱི་མཚོ་རུ་ལྕེབས་ན།།
ཟླ་བ་སྐྱོ་སྐྱོ་མ་གནང་།།
མཚོ་ཡི་ཞེ་ལ་གནོད་འགྲོ།།
ལས་ཀྱི་དམ་ཚིག་བརྟན་ན།།
རི་བོའི་ཕར་ཚུར་ཙམ་རེད།།
གཙང་བོ་ཁྲེལ་གཞུང་ལྡན་ན།།
བསྐོར་བ་ཡང་ཡང་རྒྱག་ཆོག།
ང་ཡི་སྙིང་ཉེ་གང་ཞིག།
རྨི་ལམ་ནང་ནས་མཇལ་ཡང་།།
ཚེ་རབས་ཡིད་ཀྱི་སྲུང་མ།།
ཁ་བའི་འདབ་མར་བཞད་ཡོང་།།
མ་ཐུག་ལོ་དང་ཟླ་བ།།
སྤྲིན་པའི་ངོགས་ནས་མཇལ་ཡོང་།།
གྲིབ་མ་ཡར་འགྲོ་ཞིག་ལ།།
དྲན་པས་གཞས་ཤིག་བཏང་ཡོད།།
དྲན་པའི་ནགས་ཚལ་བསྒུལ་ན།།
ལྗོན་པས་མིག་ཆུ་འཐོར་འགྲོ།།
ཟླ་འོད་ཡང་ཡང་གསལ་ན།།
ཁྱེད་རང་ཞེ་ལ་འཁོར་ཡོང་།།
དུས་ཀྱི་བུ་ཡུག་འཚུབ་ནས།།
རླུང་བུ་གཡུགས་ཕྱོགས་མིན་ན།།
ང་ཡི་ཚེ་གཅིག་སྐྱ་ཡ།།
གྲང་དང་མ་གྲང་མ་འདྲི།།
རྩོམ་གསར། 10