ལྗང་རླུང་། 2018-12-07
སེམས་པ་ཨེན་ཙམ་འཁྱུགས་པའི་ཚེ།།
རྣམ་རྟོག་ཡིད་ཀྱི་མེ་ལོང་དབུས།།
རྫི་མའི་རྩེ་རུ་ཆགས་པ་ཡི།།
ལས་ཀྱི་སྐར་ཚོགས་གཞན་དུ་དོང་།།
མི་རྟག་སྡུག་པའི་ཆུ་བོ་ལས་ནི་སྐྱེས་པ་ཡི།།
གནའ་བོའི་སྦྲ་འདབས་ལུག་ཁྱུ་དག་ནི་འཐོར་ཤུལ་དུ།།
འདབ་ལོ་གཅིག་གིས་སྟོན་ཟླ་དབང་དུ་བསྡུས་པ་བཞིན།།
མེད་པའི་ཆོས་ལ་བདག་ཡིད་འཁོར་བ་ལས་སྐལ་ཙམ།།
རྨི་ལམ་ཞིག་ཏུ་འོང་བ་ཡི།།
ཨ་ཐང་ཆད་པའི་ཕྱེ་མ་ལེབ།།
འདོད་པའི་ཁམས་ནས་ཕྱིར་ཕྱོགས་ཚེ།།
དཀའ་ཁག་ལོ་ཟླ་རིང་གྱུར་ཀྱང་།།
བདག་ཡིད་པདྨའི་མཚོ་མོ་ལས།།
ཁྱོད་ཞལ་ཟླ་བ་གཞོན་ནུ་འཆར།།
མ་ཡེངས་ཡིད་འདི་མེ་ལོང་འདྲ།།
བསྐལ་བ་དུ་མར་བསྒོམས་པ་ཡི།།
རླུང་ལ་ཞོན་པའི་རིག་འཛིན་ཚོགས།།
སྨུག་པའི་ཀློང་ནས་ཚུར་བྱོན་ནོ།།
རྩོམ་གསར། 10