སྐྱེས་རབས་ལས་ཀྱིས་བསགས་པའི་སྨོན་བཟང་གིས།།

དལ་འབྱོར་མི་ལུས་རིན་ཆེན་ཐོབ་པར་གྱུར།།

ལྷག་པར་དུས་ཀྱི་སྐལ་བཟང་ཤར་བ་ན།།

ཤེས་རིག་སློབ་སྐལ་བྱུང་བ་གཅེས་པར་གྱིས།།

ཟབ་གསལ་ཤེས་རིག་འབུམ་གྱི་བུམ་ནང་དུ།།

རྒྱ་ཆེན་གཞུང་ལུགས་མཚོ་མོ་ཡོངས་སུ་ལྟེམས།།

རྨད་བྱུང་སློབ་སྐལ་ཡག་པའི་སློབ་གྲོགས་ཚོས།།

ཤེས་རིག་ཧུབ་ཀྱིས་འཐུང་ན་སྐྱིད་པ་ལ།།

ཡིན་ཡང་མང་ཤོས་དུག་གི་འོབས་སུ་ཡོད།།

བརྩོན་འགྲུས་སྙིང་སྟོབས་ཡོད་ཀྱང་སྐད་ཅིག་ཙམ།།

ལ་ལ་གཉིད་དང་ལ་ལ་འདོད་ཆགས་སོགས།།

བག་མེད་འཚོ་བས་བསླུས་ན་ཤིན་ཏུ་ཕངས།།

མང་ཤོས་སེམས་ཀྱི་བྲན་གཡོག་བྱས་བྱས་ནས།།

གསོན་འདོད་རེ་བ་མེད་ཞེས་སྨྲེ་ངག་འདོན།།

ལ་ཤས་བརྩེ་དུང་ཞེས་པར་འཁྲེང་འཁྲེང་ནས།།

འཆི་མའི་སྟེངས་ཀར་བསྙིལ་བའི་ལོ་རྒྱུས་མང་།།

ཞི་ལི་དུ་འཐེན་ཞི་མོ་ཆང་འཐུང་དང་།།

ཞི་མོ་རྐྱལ་སྟོང་ཞི་ལི་མགོ་སྟོང་སོགས།།

མི་འཛོམས་དགུ་འཛོམས་མི་ལས་དགུ་ལས་ཡིས།།

དུས་ཀྱི་ཉིན་མཚན་བདའ་བ་ཕངས་བའི་གཞི།།

ལྟོ་དང་འདུན་མ་ཙམ་ལ་ཆགས་ཆགས་ནས།།

ཡོད་མེད་མཐའ་དང་མཐོ་དམན་གནས་ཀུན་ཏུ།།

ཁ་ཡག་ཁ་བཙོག་ཁ་བརྡ་མང་བྱས་པས།།

སློབ་པའི་དུས་ཀྱང་སྐད་ཅིག་སྐད་ཅིག་འདས།།

རྒྱ་བོད་མེད་པར་བརྩེ་དུང་ནང་ན་ཡོད།།

དགའ་རབས་དུང་རབས་གླེང་ནས་རང་སེམས་གསོ།།

མང་ཤོས་བརྩེ་དུང་ཞེས་པ་ཁོ་ནའི་ཕྱིར།།

ཡོད་ཚད་བློས་གཏོང་བྱེད་པའི་གླེན་རྟགས་མང་།།

ལྷ་སའི་བུ་མོར་ཨ་གསར་ཚ་པོ་ཡོད།།

ཨ་མདོའི་བུ་ཆུང་ཁ་ན་ལབ་རིང་མང་།།

སོ་སོར་སོ་སོའི་ཚོད་ན་སྣང་བ་རེ།།

སྣང་བའི་ཁྲོད་ན་དགའ་སྐྱོའི་གཏམ་རྒྱུད་མང་།།

ཕྱི་རོལ་རྒྱལ་ཁམས་དར་ནས་དར་དུ་ཕྱིན།།

ད་ལྟའི་མི་ལ་ལས་རྒྱུ་ཇེ་མང་ཡིན།།

མགོ་སྐྲ་སེར་པོ་ཁ་ངོར་སྐགས་དང་ཚོན།།

བསམ་ཞིང་བསམ་ན་སྙིང་བོ་མེད་པའི་གཞི།།

ལ་ལའི་མགོ་བོ་གཟེངས་སུ་བཏེགས་ནས་འགྲོ།

ལ་ལའི་མགོ་བོ་འཕྲེད་ཀྱིས་གཡུག་ནས་འགྲོ།

འགྲོ་བའི་དུས་ཀྱང་ལྟད་མོ་མང་བ་གན།།

རིག་པའི་གནས་ལ་དོན་གཉེར་མེད་པའི་རྟགས།།

བུ་མོ་མང་པོ་ཁ་འཁྲུག་བཤད་པར་དགའ།།

བླ་བཙག་ལབ་བརྡོལ་མང་བས་གཞན་ལ་གནོད།།

ཞི་ལི་ཕལ་ཆེར་ཁ་ཡག་བཤད་ལ་དགའ།།

འདི་འགྲིག་དེ་འགྲིག་མེད་པའི་གཞན་ལ་གནོད།།

དྲྭ་ཁང་ཆང་ཁང་ནང་མ་ལྟེགས་སྒང་ཁང་།།

ཉིན་མཚན་མགོ་གཏིང་སློག་ནས་འཛུལ་ས་ཡིན།།

ལ་ཤས་ཁ་པར་ནང་ནས་རོལ་རྩེད་དང་།།

མཛའ་གྲོགས་སོགས་ལ་ཆགས་པ་གློའུ་རྟགས་ཡིན།།

སློབ་གྲྭའི་ར་སྐོར་ནང་ན་ལྟད་མོ་མང་།།

གཅིག་གིས་གཅིག་ལ་ལག་འཇུ་བྱེད་པ་འམ།།

མགོ་བོ་བྲང་ལ་བསྙེས་ནས་ཤབ་ཤུབ་ངང་།།

སྣང་བའི་ཁམས་ལ་ཆགས་པ་རྨོངས་རྟགས་ཡིན།།

ལ་ལའི་སྐྱོ་བའི་ཀི་རིང་འདེབས་པ་དང་།།

ལ་ལའི་ངུ་བའི་འཁུན་སྒྲ་འབྱིན་པ་སོགས།།

རང་རང་ཚོད་ན་སྡུག་གི་ལན་ཆགས་རེ།།

བསམ་ཞིང་བསམ་ན་སྙིང་བོ་དོག་ཙམ་མེད།།

འགའ་རེ་ཞི་མོའི་རྗེས་ལ་རེམ་པ་དང་།།

འགའ་རེས་ཞི་ལའི་སྐད་འཕྲིན་འདྲི་བ་སོགས།།

ཆགས་པས་སྨྱོས་བའི་གཏམ་རྒྱུད་མང་བ་འདི།།

ད་ལྟའི་སློབ་ཆེན་ཡོངས་ཀྱི་སྤྱི་སྲོལ་ཡིན།།

མཚན་མོ་མགྲོན་ཁང་ནང་དུ་འགྲོ་བ་དང་།།

ཁང་བ་གླས་ནས་ཞག་སྡོད་བྱས་པ་དང་།།

གཅིག་གིས་གཅིག་ལ་དུས་བཅད་བྱས་པ་སོགས།།

མདོར་ན་ཐམས་ཅད་འདོད་ཆགས་རྐྱང་རྐྱང་ཡིན།།

བུ་མོ་བུ་ལ་བལྟས་ནས་དགོད་པ་དང་།།

བུ་ཡང་བུ་མོར་ཆགས་ནས་དགའ་བ་སོགས།།

བྱ་བ་མང་མང་ཡོད་པ་མང་ཆེ་བ།།

དམིགས་ཡུལ་ཅི་ཡང་མེད་པའི་རིགས་དེ་ཡིན།།

རིགས་གཅིག་བསླབ་གཞིའི་དཔེ་ཆ་རྐྱང་རྐྱང་དང་།།

མཐར་ཕྱིན་ལག་རྟགས་ཙམ་ལ་རེ་བ་ཡོད།།

དེ་དག་ཕལ་ཆེར་བསམ་བློ་སྟོང་བའི་ཕྱིར།།

རླབས་ཆེན་ལས་དོན་སྒྲུབ་པའི་སྤོབས་པ་ཞུམ།།

འགའ་ཞིག་བསླབ་ཕྱིའི་དཔེ་ཆ་ཁོ་ན་དང་།།

རང་མོས་སྙན་ངག་ཙམ་ལ་ཞེན་རྩིས་ཆེ།།

སྐྱབས་ཆེན་སེང་རྡོར་ལ་སོགས་རྩེ་གཅིག་ཏུ།།

ལྷ་ལ་སྒོམ་པ་གཞུང་ལུགས་མེད་པའི་རྟགས།།

ལ་ལ་ནང་ཆོས་ལ་སོགས་གཞུང་ཆེན་དང་།།

བསམ་བློ་སྒལ་ཚིགས་སོགས་ལ་ཤིན་ཏུ་དགའ།།

ཡིན་ཡང་བཤད་ཡམས་འགའ་ལ་ཡིད་ཆེས་ནས།།

རང་གི་ཁ་ཕྱོགས་བོར་བ་ཤིན་ཏུ་མང་།།

ལ་ལའི་དགའ་ཕྱོགས་གཅིག་པོ་སྲོག་ཏུ་འཛིན།།

དཔེ་ཀློག་སོགས་ཡང་འགན་ཁུར་ཙམ་དུ་ལྟ།།

དེ་དག་ཕལ་ཆེར་མིག་རྒྱང་ཐུང་བའི་ཕྱིར།།

མི་ཚེ་རིན་ཐང་ཟེར་བ་ལ་མགོའི་ལུག།

ལ་ལའི་ཡར་མར་གང་ཡང་མི་སྒྲུབ་པ།།

དཔེ་ཆ་དཔེ་ཀློག་ལ་ཡང་མི་དགའ་བ།།

ནམ་རྒྱུན་ཟས་དང་གཉིད་ལ་གཞོལ་ཆེ་བས།།

ཕག་དང་གཉིས་སུ་མེད་ཅེས་ཁོ་བོས་སྨྲ།།

མདོར་ན་གོན་པ་སུ་ཡག་འགྲན་པ་དང་།།

གསར་བུ་གསར་མོ་སུ་ལ་དགའ་བ་དང་།།

རང་གི་མདུན་ལ་ཆགས་ནས་མ་འོངས་པ།།

རྩ་ནས་བོར་བ་ཐམས་ཅད་འདི་འདྲ་ཡིན།།

ཤུལ་ན་ཡོད་པ་མི་འགའ་ཁོ་ན་ཡིན།།

དེ་དག་རྣམ་དཔྱོད་ཆེ་ལ་བརྩོན་འགྲུས་ལྡན།།

བླང་དོར་འབྱེད་ཤེས་དཀའ་ངལ་བློ་ཡིས་གྲོལ།།

རང་དོན་འཁྱོངས་ལ་གཞན་དོན་ཁུར་དུ་འདེགས།།

དེའི་ཕྱིར་འདོད་དང་འདུན་མར་ཆགས་པ་དང་།།

གཏི་མུག་གཉིད་དང་ང་རྒྱལ་ཕྲག་དོག་སོགས།།

ཚུལ་མིན་བྱ་སྤྱོད་དག་ལ་ཆགས་པ་ཡིས།།

ལག་པ་བྲང་ཁར་ཞོག་ལ་འདང་རྒྱོབས་ཤིག།