གློག་འགྱུ། 2018-11-09
༡
མོན་ཡུལ་ཨོ་རྒྱན་གླིང་དུ།།
མཚན་དཔེའི་ལང་ཚོ་རྫོགས་ཤིང་།།
ཉི་བདུན་འཆར་དང་ལྷན་དུ།།
བལྟམས་པས་ངོ་མཚར་ཆེ་སོང་།།
སྐྱེས་སྟོབས་ཤེས་རབ་རྣོན་པོས།།
གཞུང་ཆེན་དཀའ་གནད་བཀྲོལ་སོང་།
སྔོན་གོམས་བག་ཆགས་བཙན་པོས།།
ངལ་མེད་སྒྲ་རྩིས་མཁས་སོང་།།
བརྗིད་ལྡན་ནོར་བུ་གླིང་ཁར།།
དབང་ལུང་ཆོས་འཁོར་བསྐོར་ནས།།
སྐལ་ལྡན་ཁྲི་མ་འབུམ་ལ།།
བྱིན་རླབས་ཆར་ལྟར་བསྙིལ་སོང་།།
ལྷ་སའི་སྐྱིད་ཆུ་བརྒལ་ཏེ།།
ལི་ཐང་ཡུལ་དུ་ཕེབས་སོང་།།
དཀའ་སྡུག་ཁྲི་སྟོང་མང་པོ།།
ངལ་མེད་ཕྲག་ལ་བཞེས་སོང་།།
དགུན་ཟླ་མ་ཚེས་གོང་ནས།།
ལྷ་སར་ཁ་བ་བབས་བྱུང་།།
ས་མཐར་བདས་པའི་སྟོན་ལོ།།
ལྷ་མོས་ལམ་སྣ་དྲངས་སོང་།།
ངན་ངོན་ཟས་ལ་བརྟེན་ཏེ།།
དཀར་རྒྱ་དགོན་དུ་འབྱོར་སོང་།།
བཻ་རོའི་སྒྲུབ་ཕུག་ནང་དུ།།
ཟླ་གཅིག་བསྙེན་སྒྲུབ་རྫོགས་སོང་།།
འཁོར་བའི་སྐྱོ་ཤས་བསམས་ཏེ།།
ཏིང་འཛིན་ཟས་ལ་རོལ་སོང་།།
བདག་འཛིན་ཆུ་ལ་བསྐུར་ནས།།
སྟོང་ཉིད་གླུ་རུ་བླངས་སོང་།།
རང་ཉོན་དྲི་མ་འདག་རུང་།།
འགའ་ཡི་སྲིད་རྩ་གཅོད་ཕྱིར།།
སྙན་འགྱུར་མགུར་གླུ་ལེན་ཞོར།།
དྲང་ངེས་གནས་ལུགས་བསྟན་སོང་།།
འགྲུལ་བཞུད་ལམ་ཁ་བཙན་པོ།།
འཇམ་མཉེན་རྡོག་པས་འཇལ་སོང་།།
རིགས་ཞེན་ཁྲག་བྲིས་རི་མོ།།
གངས་རིའི་ངོས་སུ་གསལ་འདུག།
༢
དབུས་ཀྱི་ཉི་མ་ལྷ་ས།།
མཚོ་སྤྲིན་བར་ན་ཆགས་ཡོད།།
རིག་འཛིན་ཚངས་དབྱངས་རྒྱ་མཚོས།།
བརྩེ་བའི་གཏེར་བུམ་སྦས་ཡོད།།
མཆོད་ཆང་བཞེས་པའི་ཁྲོད་དུ།།
སྙིང་གཏམ་བཤད་རོགས་སུ་ཡོད།།
ཡིད་ཀྱི་མེ་ལོང་ངོས་ལ།།
སུ་ཡི་མཛེས་སྡུག་མངོན་ཡོད།།
མ་བཅོས་ཞལ་གྱི་འཛུམ་མདངས།།
གང་གི་ཕྱོགས་ལ་གཏད་ཡོད།།
མཛའ་བརྩེའི་ཁྲོད་ཀྱི་མགུར་གླུས།།
སུ་དང་ཡིད་སེམས་མདུད་ཡོད།།
གཡུ་ཐོག་ཟམ་པའི་འོག་ནས།།
དྲན་པའི་སྙན་ངག་བྲིས་སོང་།།
ཞེ་མཐུན་ཡིད་ཀྱི་མཛའ་མོ།།
མཚོ་མོའི་ངོས་ནས་འཕྲད་སོང་།།
ཡིད་འོང་ལྡུམ་རའི་ནང་ལ།།
མེ་ཏོག་འཚང་ཁ་ཤིག་ཤིག།
ཁྱེད་ཐུགས་བབ་པའི་མེ་ཏོག།
མ་སྐྱེས་ཨ་མ་ཡིན་འདུག།
སྙན་ཚིག་དུམ་བུ་རེ་རེས།།
མཁས་ཀུན་སྐྱེངས་ཚུལ་བལྟས་ན།།
མཚོ་བྱུང་ལྷ་མོའི་པི་ཝང་།།
ཁྱེད་ལ་གཡར་པ་ཨེ་རེད།།
འཆལ་པོ་ཏང་བཟང་དབང་པོའི།།
གསང་གཏམ་ཕྱི་ལ་ཁྱབ་འདུག།
སྐུ་ཚེ་རྫོགས་པ་ཡིན་མོད།།
མགུར་གླུ་རྫོགས་དོགས་མི་འདུག།
ཁྱེད་དང་བྱམས་པའི་གསང་གཏམ།།
གླེང་ས་ལྕང་གླིང་ནང་རེད།།
གཟུགས་མེད་རླུང་བུས་ཐོས་པ།།
ཆོལ་གསུམ་ཡོངས་ལ་ཁྱབ་འདུག།
ཚེ་སྔོན་ལས་ཀྱིས་བསྙལ་བའི།།
རྒུན་ཆང་ཧུབ་ཅིག་བཞེས་པས།།
བཟི་གཏམ་ཚིག་གི་ཕྲེང་བ།།
བྱམས་པའི་སྐེ་ལ་བསྐོན་སོང་།།
ཆང་དེ་ལས་ཀྱི་བརྩེ་ཆང་།།
ཆང་མ་ཡིད་བཞིན་མཁའ་འགྲོ།།
ཡིད་སེམས་དབང་མེད་ཤོར་བ།།
ཐུགས་ཁག་ཁྱེད་ལ་མི་འདུག།
མཛད་རྣམ་གསེར་ཡིག་འཁྱུག་མ།།
གངས་རིའི་ངོས་སུ་གསལ་འདུག།
དེང་དུས་མཁས་མང་ཚོགས་ཀྱིས།།
བསྟོད་པའི་ཐལ་མོ་སྦྱར་སོང་།།
རྩོམ་གསར། 10