གངས་ཆར། 2018-08-08
ཟླ་འོད་ཀྱི་དཀར་ཆ་མེད་པའི་མཚན་མོར།
བཟའ་ཟླའི་སྙིང་གཏམ་དྲོན་མོ་མེད་ལ།
སྙིང་ནོར་གྱི་འཛུམ་མདངས་དང་ངུ་སྒྲ་ཡང་མེད།
དེ་བས་ངལ་དུབ་ཀྱིས་མནར་བའི་ལུས་པོ།
རྨི་ལམ་གྱི་ཞིང་དུ་མགྲོན་པོར་འབོད་མཁན་ཡང་མ་བྱུང་།
མཚན་མོའི་ཁེར་ལབ།
འཇིག་རྟེན་གྱི་ཆེས་མུན་པ་ནག་ས་ནས།
འོད་ཟེར་གྱི་ལམ་དཀར་པོ་བསྙེགས་པའི་འདུན་པ་ཁེར་ལབ་ཅིག
ཁེར་རྐྱང་གི་མཚན་མོར་ཁེར་ལབ་མང་།
མེ་ཏོག་ལྟར་བཞད་པའི་ཁེར་ལབ་མང་།
ཁ་བ་བཞིན་འབབ་པའི་ཁེར་ལབ་མང་།
མེ་ཏོག་ལ་ཤོར་བའི་དྭངས་གཙང་སེམས་ཁམས་ཀྱི་ཁེར་ལབ།
ཁ་བ་ལ་ཞེན་ཞིང་རྦབ་ཆུ་ལྟར་འབབ་པའི་ཁེར་ལབ་མང་།
མཚན་མོའི་ཁེར་ལབ།
ཁེར་རྐྱང་གི་ཆེས་འཇམ་སའི་མཚན་མོ་ནས།
སྦི་རག་གི་སྐྱུར་དྲི་མེད་ལ། བཅོས་མའི་འཛུམ་མདངས་ཀྱང་མེད།
ར་བཟི་ཡི་སྙིང་གཏམ་དང་འཁྲུག་རྩོད་མེད་ལ།
སྦི་རག་དང་འདྲེས་པའི་བཅོས་མའི་བརྩེ་བ་ཡང་མེད།
དེ་བས། ངོ་ཚ་མེད་པའི་འདོད་ཆགས་ཀྱི་ཧམ་སེམས་ཀྱང་མེད།
ཁེར་རྐྱང་གི་མཚན་མོ།
ཁེར་ལབ་མང་བའི་མཚན་མོ།
མཐོན་པོ་གནམ་ལ་བརྩེ་བ་བཅངས་མྱོང་ལ།
དམའ་པོ་ས་གཞིར་ཡང་སྙིང་གཏམ་དྲོན་མོ་བཤད་མྱོང་།
ཁེར་རྐྱང་གི་མཚན་མོ།
སྨག་རུམ་སེམས་སུ་སྒོམ་བཞིན།
ཁེར་ལབ་གྲོགས་སུ་བྱས་ཏེ།
མུན་པའི་ཁྲོད་ཀྱི་དབྱངས་གསལ་ལ་འོ་ཞིག་བྱས།
རྩོམ་གསར། 10