རིན་སྤུངས་བསྟན་ཆོས། 2018-03-19
མི་ཚེ་འདི་ནི་རིང་མིན་ཐུང་མིན་འདུག །
འཚོ་བ་ཟེར་བ་མངར་མིན་སྐྱུར་མིན་རེད། །
སྐྱེ་རྒ་ན་འཆིའི་དུས་ཀྱི་འཕོ་འགྱུར་ཁྲོད། །
གྲོགས་ཀྱི་མཆོག་ནི་སེམས་ཀྱི་བརྟེན་སའོ། །
འཚོ་བའི་ལམ་འཕྲང་ཟེར་བའི་ཀྱག་ཀྱོག་དེར། །
མི་ཚེའི་སྐྱིད་སྡུག་ཟེར་བའི་སྒང་གཤོང་མང་། །
སྐྱིད་སྡུག་ཁྲོད་ནས་དགའ་སྐྱོ་མཉམ་མྱོང་བའི། །
གྲོགས་ཀྱི་མཆོག་ནི་སེམས་ཀྱི་བརྟེན་སའོ། །
མི་ལུས་ཟེར་བ་རིན་ཆེན་གསེར་ལས་ལྷག །
མི་སེམས་ཟེར་བ་དུག་ཅན་ཧ་ལོ་འདྲ། །
ཚེ་གང་བློ་སེམས་བདག་ལ་དཀར་བ་ཡི། །
གྲོགས་ཀྱི་མཆོག་ནི་སེམས་ཀྱི་བརྟེན་སའོ། །
དལ་འབྱོར་ཟེར་བ་མིང་གི་འབོད་ཚུལ་ཙམ། །
བྲེལ་ཟིང་ཆེ་བ་དོན་དངོས་དམར་རྗེན་རེད། །
བྲེལ་ཟིང་ཁྲོད་ནས་མ་བརྗེད་སྙིང་བཅངས་ཀྱི། །
གྲོགས་ཀྱི་མཆོག་ནི་སེམས་ཀྱི་བརྟེན་སའོ། །
ཤོད་པའི་ཁ་ཆེན་གང་ས་གང་ཀུན་རེད། །
ཉན་པའི་རྣ་བ་བུ་ག་ཇེ་ཆུང་རེད། །
ཤོད་མཁན་མང་ཡང་རྣ་བ་ང་ལ་གཏད། །
གྲོགས་ཀྱི་མཆོག་ནི་སེམས་ཀྱི་བརྟེན་སའོ། །
མི་འགའ་མཐོ་ན་སྤོབས་པ་རི་ལས་མཐོ། །
མི་འགའ་དམའ་ན་སྡང་སེམས་ཀུན་ལས་ཆེ། །
དུས་གསུམ་དབྱེར་མེད་ང་ལ་ཕན་བསམ་པ། །
གྲོགས་ཀྱི་མཆོག་ནི་སེམས་ཀྱི་བརྟེན་སའོ། །
སྙན་པོའི་མཚན་དང་མཐོན་པོའི་གོ་ས་ཡིས། །
དྭངས་པའི་རང་གཤིས་བཟང་པོ་མ་འགྱུར་ཅིང་། །
གང་ཅིར་རོགས་རམ་གང་གཟབ་གནང་བ་ཡིས། །
གྲོགས་ཀྱི་མཆོག་ནི་སེམས་ཀྱི་བརྟེན་སའོ། །
མཛེས་པའི་དཔལ་དང་ནོར་གྱིས་ཕོངས་ན་ཡང་། །
ཡ་རབས་གཤིས་དང་གྲོགས་ཀྱི་ལ་རྒྱས་ཕྱུག །
ཕན་པའི་ཚེ་ན་སྲོག་ཀྱང་གཏོང་ནུས་པའི། །
གྲོགས་ཀྱི་མཆོག་ནི་སེམས་ཀྱི་བརྟེན་སའོ། །
མ་འདོད་འཁོར་བའི་ལམ་དུ་འགྲོ་བ་ལ། །
འདོད་པ་གང་ཀུན་སེམས་སུ་མ་འབབ་ཀྱང་། །
ལས་ཀྱིས་བསྐོས་པའི་གྲོགས་པོ་དམ་པ་རྣམས། །
འདི་ཕྱི་གཉིས་ལ་གང་དགའ་གང་སྐྱིད་ཤོག །
རྩོམ་གསར། 10