ཨ་མ། 

བྱམས་དང་བརྩེ་བས་སྐྱོང་མཁས་དྲིན་ཅན་མ།། 

ལོ་ལོའི་སྙིང་གི་གང་བུ་དྲིན་ཅན་མ།། 

དཀའ་སྤྱད་ཐེག་བཟོད་ཆེ་བའི་དྲིན་ཅན་མ།། 

སྒྲོལ་མ་དཀར་མོའི་རྣམ་སྤྲུལ་དྲིན་ཅན་མ།། 

མཛའ་མོ། 

སྡུག་དུས་སེམས་གསོ་གཏོང་མཁས་མཛའ་ན་མོ།།

སྐྱིད་དུས་སྐྱིད་གླུ་ལེན་མཁས་མཛའ་ན་མོ།། 

སྐྱིད་སྡུག་མཉམ་དུ་མྱོང་མཁས་མཛའ་ན་མོ།། 

སེམས་དང་སེམས་པ་བརྟེན་ས་མཛའ་ན་མོ།། 

གྲོགས་མོ། 

ཨ་གསར་གསར་འགྲོགས་མི་ཆེ་རིགས་མཐུན་མ།། 

མི་འགྱུར་མཉེས་གཤིས་ཆེ་བའི་འདང་ཅན་མ།། 

སྡུག་དུས་མ་སྦྲན་རོགས་ཟླ་རིགས་བཟང་མ།། 

མཛའ་གཅུགས་ཕྱི་ཐག་རིང་བའི་བཞིན་བཟང་མ།། 

མནའ་མ། 

རྒན་ལ་བཀུར་བསྟི་མཁས་པའི་ཡ་རབས་མ།། 

ལས་བསྐོས་ཁྱོ་བོར་དུངས་བའི་བཞིན་བཟང་མ།།

སྙིང་གི་བུ་ལ་བྱམས་པའི་རིགས་སྐྱོང་མ།། 

གྲོང་པ་ཁྱིམ་མཚེས་བསྟུན་མཁས་རིགས་བཟང་མ།།

    འབྲོག་མོ། 

དགོ་དགོ་བཞོ་དབྱངས་ཁྲོད་ཀྱི་འཇོ་སྒེག་མ།། 

སྦྲ་འདབས་ཁུག་སོར་རྩེན་པའི་དམན་ཆུང་མ།། 

འུར་རྡོ་ཀླད་ལ་བསྐོར་མཁས་ལུག་རྫི་མ།། 

མཛའ་གཞས་ལ་གཞས་མཁས་པའི་ལུས་ཕྲ་མ།། 

ཞིང་པ་བུད་མེད། 

རྣང་ཞིང་གྲུ་བཞིའི་དཀྱིལ་གྱི་ཡིད་འོང་མ།། 

རྨོན་མཛོའི་རྐང་རྗེས་འདེད་མཁས་ལུས་ཕྲ་མ།། 

ཚར་མའི་ཕོན་ལྕོག་རྩིག་མཁས་སྐེད་མེད་མ།། 

ཆང་གཞས་བྲོ་གར་མཁས་པའི་གར་མཁན་མ།། 

དགེ་རྒན་བུད་མེད། 

གདུལ་བྱ་བུ་བཞིན་སྐྱོང་བའི་ངག་འཇམ་མ།། 

བློ་རྨོངས་མུན་པ་སེལ་བའི་ཟླ་གཞོན་མ།། 

འོད་ཀྱི་ལམ་བུ་བསུ་བའི་སྐྱ་རེངས་མ།། 

རྣམ་དཀར་བྱང་སེམས་ལྡན་པའི་ཏ་རེ་མ།།