སྟག་རིག་འབྲུག་ཐར། 2018-03-05
རྨ་ཡུལ་རྨ་ཆུའི་འགྲམ་ནས།།
ལས་དང་ལམ་གྱིས་འཕྲད་པའི། །
བུ་མོ་ཚེ་རིང་སྒྲོལ་དཀར། །
སྙིང་ཀི་ཕྱེད་ཀར་གྱུར་སོང་། །
མཐུན་པའི་ཡིད་ཀྱི་སྙིང་གཏམ།།
རྨ་ཆུའི་རླབས་བཞིན་བརྡོལ་བས། །
དུང་བརྩེ་གསེར་མིག་ཉ་མོ། །
བུ་ངའི་གཙང་བོར་འཁྱུད་སོང་། །
ཕན་ཚུན་དགའ་བའི་རྟེན་ལ། །
ལྷད་མེད་གསེར་གྱི་གདུ་བུ། །
བརྩེ་བ་ཕྱི་ཐག་རིང་བའི། །
མི་འགྱུར་སྐྱེས་སུ་བསྟབས་སོང་། །
ང་དང་སྙིང་སྡུག་མཐུན་པའི། །
དུང་བརྩེ་འགྱུར་མེད་རང་མདངས། །
དལ་མེད་ལྷོད་དུ་རྒྱུ་བའི། །
རྒྱུན་རིང་རྨ་ཆུ་ལི་མ། །
ལག་ཟུང་དམ་དུ་འཁྱུད་ཅིང་། །
གོམ་གསུམ་སྤོས་པའི་ཡུན་ལ། །
སྐར་མས་བཟོད་གླགས་བྲལ་བས། །
ཉི་འོད་གསེང་ནས་འཐོར་བྱུང་། །
ཚེ་གཅིག་གཏན་གྱི་སྐྱ་ཡ། །
མི་བཤིག་བྲག་རི་ལྷུན་པོ། །
གཡར་དམ་མནའ་ཚིག་བོར་བས། ། །
བདེ་སྐྱིད་རུས་ལ་བབས་བྱུང་། །
སོ་སོའི་བྱ་བའི་དབང་གིས། །
རེ་ཞིག་བྲལ་བའི་ཆོས་ཉིད། །
སྨེང་གཞས་ཁྲོད་ནས་ལུད་པ། །
མི་ལྡོག་གནམ་གྱི་བསྐོས་ཐང་། །
ང་རང་ཕ་མ་བྲལ་ནས།།
ལོ་ཟླའི་ཕྲེང་བ་བརྩེགས་ཀྱང་།།
མཇལ་འདོད་སེམས་ཀྱི་བརྩེ་བ།།
རྨི་ལམ་ཞིང་དུ་མ་ཤར།།
ཟླ་གཅིག་འགོར་བའི་ཡུན་ལ།།
མ་མཇལ་མཛའ་མོའི་ཞལ་རས།།
དྲན་པའི་མེ་ལོང་ངོས་སུ།།
རླབས་ཀྱི་ཝུ་བ་བརྩེགས་འདྲ།།
སེམས་པའི་ཤོག་དཀར་ངོས་ལ།།
བརྩེ་བའི་ཡིག་ཆུང་བྲིས་པ།།
སྤྲིན་པ་རྒྱང་བཞུད་ཅིག་གིས། །
མཛའ་མོའི་གུད་དུ་བསྣམས་རོགས། །
ང་དང་ཁེར་བགྲོད་ཟླ་བ།།
གནམ་ས་གཉིས་ཀྱི་གཞུང་ན།།
གྲོགས་མེད་གཅིག་པུར་རྒྱུ་ཡང་།།
འཁྲེང་ས་སྐར་ཆེན་ཁྱོད་ཡིན། །
ཆུ་ལྷའི་ཕྲག་གཞུང་བར་ནས།།
དུང་ཟླས་ཕྱིར་མིག་འཕེན་དུས།།
སེམས་ཀྱི་ཐོ་རེངས་སྐར་ཆེན།།
བསྐྱུར་འདོད་གཏན་ནས་མེད་སོང་། །
ལོ་ཟླའི་འཁོར་བགྲོད་སྐྱེན་པོ། །
མི་རྟག་ནམ་མཁའི་གློག་ཞགས། །
མཛའ་མོར་འཕྲད་པའི་དུས་ཆད། །
སླེབས་ཀྱང་གྲིབ་རིས་མ་མཐོང་། །
གཞོན་པའི་སེམས་ཀྱི་འགྱུར་ལྡོག།
དབྱར་གཞུང་སྤྲིན་པའི་འགྱུ་རྩལ།།
ཚིག་གསུམ་གཏམ་གྱི་སྙིང་བོ།།
གོམ་གསུམ་བར་ནས་བརྗེད་ཐལ།།
མཐོང་ཡང་ཟིན་ཐབས་དབེན་པ།།
བྱེ་མའི་ཀློང་གི་སྨུག་རྒྱུ།།
མྱོང་ཡང་སྙིང་བོ་བྲལ་བ།།
འཇིག་རྟེན་འཁོར་བའི་བརྩེ་དུང་།།
རྩོམ་གསར། 10