མེས་དབོན་རྣམ་གསུམ་འདས་པའི་ལོ་རྒྱུས་གྱུར།།

བདེ་བའི་ཞིང་ཁམས་འབྱུང་འགྱུར་ཕུགས་བསམ་ཙམ།།

གནད་དང་མདོ་རྩ་ད་ལྟའི་གནས་བབ་རེད།།

མགོ་བོ་དགྱེ་ནས་ཕྱོགས་བཞིར་ལྟོས་ཤིག་བུ།།

གནའ་ནས་ད་བར་ལྷ་གསོ་ཀླུ་མཆོད་བྱས།།

ལས་དབང་ཡོངས་རྫོགས་གོང་མ་ལྷ་ལ་བཅོལ།།

གལ་ལ་ཐུག་དུས་ཕན་ཐོགས་རི་བོང་རྭ།།

རིགས་པས་དཔྱད་ན་སྙིང་པོ་གང་ཡང་མེད།།

སྟེང་གི་ལྷ་ཡིས་སྐྱོབ་པར་བསང་མཆོད་བྱེད།།

འོག་གི་འདྲེ་ལ་སྐྲག་ཅིང་གླུད་གཏོར་བརྫངས།།

བར་གྱི་བཙན་གྱིས་གནོད་དོགས་རིམ་གྲོ་སྒྲུབ།།

རྨོངས་པའི་རྒྱ་རུ་མ་ཚུད་དུས་ཤིག་མེད།།

ནད་པ་ཚབས་ཆེན་མོ་པའི་གཏམ་གྱིས་ཕུང་།།

རྣམ་ཤེས་གསོན་པོ་རྩིས་པའི་ལག་ཏུ་བཞག།

ཉམ་ཆུང་ནུས་མེད་ལྔ་པའི་ལམ་དུ་མངགས།།

རང་སྡེའི་མི་འདིར་དཔྱད་ན་སྙིང་པོ་ཅི།།

སྔོན་གྱི་བླ་མ་བཞུགས་ས་དབེན་གནས་རེད།།

ད་ལྟའི་བླ་མ་བཞུགས་ས་རྒྱ་གྲོང་དཀྱིལ།།

གྲྭ་པ་ཕལ་ཆེར་འདུ་འཛིར་མགོ་བོ་གཡེང་།།

ལུང་རྟོགས་བསྟན་པ་འཛིན་སྐྱོང་འདི་ལྟར་རམ།།

དབང་ཆ་ཡོད་དུས་རང་གི་རིགས་ལ་སྡང་།།

དབང་ཆ་ཤོར་དུས་ལ་རྒྱས་ཁ་ཕོ་སྒྲོག།

དབང་མེད་བོད་ཀྱི་ཝ་སྐྱེས་སྡར་མའི་ཁྱུ།།

དབང་དང་གོ་སས་རང་རིགས་སྐྱོང་དུས་མེད།།

ཁ་དུ་བཅད་ནས་སྣ་དུ་འཐེན་པ་གཅིག།

སྲོག་གཅོད་སྤངས་ནས་ཤ་ཁྲག་རོལ་བ་གཉིས།།

ཨ་རག་བཅད་ནས་ལྦུ་ཆང་འཐུང་བ་གསུམ།།

དོར་མ་ཕུད་ནས་འོག་རླུང་གཏོང་དང་མཚུངས།།

ཕ་བཟང་བུ་སྤུན་གཉིས་ལ་ཆུང་མ་གཅིག།

ཕ་ཤུལ་བུ་འཛིན་ཁྱིམ་གཞིས་སྐྱོང་བ་ལ།།

ཕ་གཉིས་ངེས་མེད་བུ་གཅིག་སྐྱེས་གྱུར་ཀྱང་།།

ཕ་རོལ་གཞན་གྱིས་འཕྱ་དམོད་བྱ་ཡུལ་གྱུར།།

ལང་ཤོར་ཆུང་མས་ཁྱོ་བོའི་མགོ་རྣ་རྫོད།།

མདོ་མེད་ཁྱོ་བོས་ཤོ་དང་མཱ་ཅང་རྩེ།།

བུ་དང་བུ་མོས་སྤྱོད་ངན་ཁྱིམ་ནས་ལོབས།།

བླང་དོར་ལོག་པའི་ཁྱིམ་ལ་དར་དུས་མེད།།

འབྲོག་པས་སྒོ་ཟོག་བཙོང་ནས་རྒྱ་གྲོང་ཉུལ།།

ཞིང་པས་ཚེར་མ་བཏབ་ནས་ཕ་ཞིང་བསྐྱུར།།

གཞན་གྱི་ཕོར་པའི་ཁ་ལ་ལག་པ་གཟེད།།

ཕ་གཞིས་གཙང་མ་ཤོར་བ་རང་གིས་ལན།།

ཁ་ནས་བཤད་པ་དོན་གྱི་ལག་ལེན་གཉིས།།

རང་གི་ཁེ་ཕན་ཐུག་དུས་མི་མཐུན་པས།།

གཟིག་ལྤགས་བཀལ་བའི་བོང་བུའི་དཔེ་མཚོན་བཞིན།།

རྫུན་མགོ་བསྐོར་བའི་གྲོགས་ལ་ཡིད་རྟོན་ཅི།།

གཞན་རྩོམ་ཉོས་ནས་རང་གི་ཡིན་ཁུལ་བྱེད།།

རྩོམ་པ་པོ་ཡི་ཆོ་ལོ་རྫུན་མ་འཁྱེར།།

མཁས་པའི་མདུན་སར་ལྐུགས་པའི་རང་མདོག་སྟོན།།

མ་ཡིན་ཡིན་མདོག་བྱེད་པའི་ཤེས་ཡོན་པ།།

གྲོགས་པོ་རྙིང་པ་སེམས་ཀྱི་དགྲ་རུ་འཛིན།།

བདེན་པའི་སྐད་ཆ་སྙིང་གི་ཚེར་མར་གྱུར།།

ཕྱུག་པོས་མི་ཕན་སྤྲང་པོས་གནོད་སྣང་ཤར།།

བསམ་བློ་མི་གཏོང་ཁ་ཡག་གཏམ་ལ་དགའ།།

དྲུག་ཅུ་རྒད་པོའི་སྐྲ་དཀར་ནག་རྩིས་བསྒྱུར།།

བཅོ་བརྒྱད་བུ་མོའི་མཆུ་སྒྲོས་དམར་རྩི་བྱུགས།།

རྒྱ་མ་བོད་ཀྱི་འདྲེས་སྐད་ངག་ལ་བྱང་།།

ཡ་རབས་ལུགས་སྲོལ་ཡག་དང་མཛའ་ཡིས་བརྫད།།

འཇིག་རྟེན་མི་ཆོས་སྐྱོང་བའི་ཐབས་ལམ་མཆོག།

དངོས་ཡོད་འཚོ་བ་གདོང་ལེན་བྱེད་ཕོད་དང་།།

ད་ཡོད་ཚན་རིག་ལག་རྩལ་སློབ་པ་ལས།།

ཉིན་མོའི་རྨི་ལམ་སྐྱིད་པོའི་ཕན་མི་ཐོགས།།

གཞན་ཕན་ཁུར་དུ་འཁྱེར་བའི་བླ་སྤྲུལ་གཅིག།

གཞན་ལ་འཚེ་མེད་ཞི་དུལ་བཙུན་པ་གཉིས།།

གཞན་དོན་ཐུགས་ལ་མངའ་བའི་སྡེ་དཔོན་གསུམ།།

གཞན་འོག་ཉམ་ཐག་འགྲོ་བའི་མགོན་གྱུར་ཅིག།

ལེགས་ལྡན་བྱམས་བརྩེ་ཅན་གྱི་ཕ་མ་གཅིག།

ལེགས་རྒུའི་མཐུན་རྐྱེན་འཛོམས་པའི་སློབ་གྲྭ་གཉིས།།

ལེགས་ཉེས་བླང་དོར་སྟོན་མཛད་དགེ་བའི་བཤེས།།

ལེགས་མཛེས་གཞོན་ནུ་དག་ལ་འཕྲད་པར་ཤོག། 

ཁ་ལག་མི་མཚུངས་ཁམས་པའི་མི་འཁྱམས་ངས།།

ཁ་ཡི་ལ་རྒྱའི་ངར་སྐད་མ་ཡིན་པ།།

ཁ་ཞེ་སྙིང་མེད་བདག་དང་བདག་འདྲ་ལ།།

ཁ་མིན་དོན་གྱི་གནས་ལུགས་ཚིག་གསུམ་ཡིན།།