ཉི་མ་སུམ་བརྒྱ་དྲུག་ཅུ། །
　　དེ་རིང་ཡོངས་སུ་ཚང་ཐལ། །
　　རིང་རྒྱུ་ཐུང་རྒྱུ་མེད་པའི། །
　　མི་ལོ་གཅིག་ནི་ཚར་སོང་། །
　　ཡུན་ཐུང་མི་ཚེ་སྐལ་བ། །
　　སྐྱིད་ལ་སྡུག་པའི་ངང་ནས། །
　　ཐོབ་ཤོར་འདྲེས་མའི་ཁྲོད་ན། །
　　རྒས་པའི་ལམ་དུ་སྙེག་སོང་། །
　　སྐྱེ་རྒ་ན་འཆི་གོ་རིམ། །
　　མི་བུ་ཞིག་གི་བརྒྱུད་ལམ། །
　　ལད་ཟློས་ལོ་ཟླ་རིང་མོ། །
　　མངར་སྐྱུར་ཁྲོད་ནས་ཟད་སོང་། །
　　ཉོན་མོངས་དུག་ལྔས་གྲུབ་པའི། །
　　མི་གཙང་ལུས་གཞི་བེམ་ཤེས། །
　　ཆོས་དང་དངོས་པོར་ཆགས་ཏེ། །
　　ཀུན་རྟོག་སྒྱུ་མའི་འཁྲུལ་སོང་། །
　　བཙལ་ཀྱང་རྙེད་པར་དཀའ་བའི། །
　　འཇིག་རྟེན་འཁོར་བའི་བྱ་བཞག །
　　ཡོད་ཀྱང་འཛད་པར་སླ་བའི། །
　　མི་རྟག་སྒྱུ་མའི་རང་གཤིས། །
　　འབད་པས་བསགས་ཀྱང་ཉུང་བའི། །
　　རང་སྣང་འཕྲུལ་བའི་མྱོང་བ། །
　　ཧམ་སེམས་བདུད་མོས་བཟུང་བས། །
　　འདུལ་དཀའ་རང་སེམས་རྒོད་པོ། །
　　རང་དོན་བདག་འཛིན་ཞེན་ཆགས། །
　　དོར་དཀའ་མི་ཤིགས་རྡོ་རྗེ། །
　　དགེ་བཅུ་ལས་འབྲས་བརྩི་སྲུང་། །
　　ཁ་བཤད་ཝུ་བའི་རྗེས་འགྲོ། །
　　ཡ་མཚན་མི་ལུས་རིན་ཆེན། །
　　བཤད་དཀའ་མི་སེམས་ལྐོག་གྱུར། །
　　བློ་གཏོད་ཡིད་ཆེས་ཆོག་པའི། །
　　གཟུར་གནས་ཡིད་བརྟན་རྙེད་དཀའ། །
　　འཁྲུལ་སྣང་བཅོས་མའི་འཚོ་བ། །
　　ངོ་མཚར་རོ་བརྒྱ་ལྡན་པས། །
　　མིའི་རིགས་བཟི་བར་གྱུར་ཏེ། །
　　འཆི་བ་ཡིད་ནས་བརྗེད་ཡོད། །
　　ཀུན་དགའ་དོན་འགྲུབ་ཆེད་དུ། །
　　མ་ཤི་བར་དུ་གདོང་མཆོང་། །
　　མཚམས་འཇོག་མེད་པར་འདུར་བའི། །
　　འ་ཅག་འཇིག་རྟེན་ཕོ་མོ། །
　　ཟོ་ཆུན་འཁོར་བའི་ཀློང་ནས། །
　　འདུག་དབང་སྡོད་དབང་མེད་པའི། །
　　འཇིག་རྟེན་འཁོར་བའི་ལས་དབང་། །
　　སུས་ཀྱང་ལྡོག་ཐབས་མེད་དོ། །
　　འགྲན་རྩོད་རྦ་རླབས་གཡོ་ཞིང་། །
　　ཕྲག་དོག་ཁྲག་གིས་མྱོས་པའི། །
　　ཨུ་ཚུགས་རྒྱ་སྟག་ངར་མ། །
　　ག་ས་གང་དུ་མང་ངོ་། །
　　རང་གི་ངོ་བོ་དོར་ནས། །
　　ཨ་གསར་ལས་ལ་བྲེལ་བའི། །
　　མཁས་རྟགས་བླུན་རྟགས་སྟོན་པའི། །
　　གདོན་གཟུགས་ས་སྟེང་བཀང་ངོ་། །
　　མ་འོངས་མདུན་ལྗོངས་བསམ་པའི། །
　　མིག་རྒྱང་ཕུགས་རྒྱང་རིང་མཁན། །
　　བློ་སྣ་ཕག་གི་སྣ་ལས། །
　　ཐུང་བའི་ཨ་བུ་མང་དྲགས། །
　　བཀྲ་ཤིས་གནམ་ལོ་གསར་ཚེས། །
　　མི་འགྱང་ས་སྟེང་འདི་རུ། །
　　རྟེན་འབྲེལ་ཁ་གཡང་ཁྲོད་ནས། །
　　སླེབས་ནས་སྐྱིད་ལ་རོལ་དགོས། །
　　ནམ་ཡང་དྲ་སྟེང་འཁྱམ་པའི། །
　　སོས་དལ་མདོ་མེད་བུ་ངའི། །
　　ཁ་ནས་ཅི་བྱུང་འདི་བྱུང་། །
　　དོན་མེད་ལབ་བརྡོལ་འབྱིན་ནོ། །
　　མ་འོངས་གངས་ལྗོངས་ཡུལ་ལ། །
　　ཆབ་དཔལ་རིག་གསུམ་དར་ཞིང་། །
　　ཕ་སྐད་ཆུ་རྒྱུན་རིང་མོ། །
　　འཛད་མེད་རྒྱུན་ལས་རིང་ཤོག །
　　ཏང་སྲིད་ཉི་འོད་གཞོན་ནུ། །
　　བོད་ཁམས་ཡོངས་ལ་འཕྲོས་ཏེ། །
　　འབངས་རྣམས་བདེ་ཞིང་སྐྱིད་པའི། །
　　འཚོ་བ་ཡར་རྒྱས་གོང་འཕེལ། །
　　བཀྲ་ཤིས་གནམ་ལོ་གསར་བ། །
　　རྟེན་འབྲེལ་གླུ་སྐད་ཁྲོད་ནས། །
　　སྒོ་འཕར་ཡངས་པོར་ཕྱེས་ཏེ། །
　　ཁ་བའི་ཡུལ་ལ་སླེབས་བྱུང་། །
　　དགའ་སྤྲོ་འཛོམས་པའི་ཉིན་ལ། །
　　ནང་མི་ལྷན་འཛོམས་བྱུང་སྟེ། །
　　དགའ་སྤྲོའི་དགོད་སྒྲའི་ཁྲོད་ནས། །
　　འཚོ་བ་སྐྱིད་ལ་སྐུར་སོང་། །