༼གཡུ་སྦལ་བཟོ་སྦར་མོ་གང།༽
     གཙང་སྟོད་གཅུང་རི་བོ་ཆེ་དགོན་པའི་རྩེ་ཆེན་ལྷ་ཁང་གི་གྲྭ་པ་ཚོར་ལྟོ་ཆུ་ལེན་ས་སྟབས་བདེ་མོ་་མིན་རྐྱེན་ཉིན་ལྟར་དགོན་གཤམ་གྱི་ཡར་ཀླུང་གཙང་པོ་ནས་ལྟོ་ཆུ་ལེན་པར་འགྲོ་དགོས་པ་རེད།
     ཐང་སྟོང་རྒྱལ་པོའི་ཐུགས་ལ་གྲྭ་པ་ཚོས་ཉིན་ལྟར་དེ་ལྟ་བུའི་དཀའ་ངལ་སྤྱད་དགོས་པ་སྙིང་རེ་རྗེ་དགོངས་ནས་རྩེ་ཆེན་ལྷ་ཁང་གི་རྡོ་གཅལ་ཕྱི་མའི་ཨར་ཀ་གཏིང་པའི་སྒོ་རའི་ནང་ཆུ་་མིག་ཅིག་སྐྱེ་པ་བྱ་རྒྱུའི་དགོངས་པ་བཞེས།
     ཉིན་ཞིག་ལ་ཐང་སྟོང་རྒྱལ་པོས་ཉེ་གནས་བོས་ཏེ་གཡུ་སྦལ་བཟོ་སྦར་མོ་གནས་སྟེ་ཁྱོད་ཀྱིས་འདི་རྡོ་གཅལ་ཕྱི་མའི་ཨར་ཀའི་འོག་ལ་སྦ་དགོས་ཞེས་བཀའ་མངགས་གནང་།ཉེ་གནས་ནི་ནོར་ལ་བརྐམ་ཆགས་ཆེ་བ་ཞིག་ཡིན་པས་གཡུ་སྦལ་བཟོ་སྦར་མོ་གང་དེ་ཁྱེར་ནས་རྡོ་གཅལ་ཕྱི་མ་ལ་སླེབས་མཚམས་དེ་རང་གི་ཨམ་ཕྲག་ནང་དུ་བཅུག་སྟེ་ཐང་སྟོང་རྒྱལ་པོའི་སྐུ་མདུན་ལ་ཕྱིན་ནས་རྒྱལ་པོས་མཁྱེན།ཁྱེད་ཀྱིས་བཀའ་མངགས་གནང་བ་ལྟར་གཡུ་ཨར་ཀའི་འོག་ཏུ་སྦས་ཡོད་ཅེས་རྫུན་བཤད།ཐང་སྟོང་རྒྱལ་པོས་ཉེ་གནས་ཀྱིས་གཡུ་དེ་སྦས་མེད་པ་མཁྱེན་ཏེ་ན་རེ།ཡག་པོ་བྱུང་།ད་ཁྱོད་ཀྱིས་ཕྱུ་པའི་སྐེ་རགས་ཁྲོལ་དང་གསུངས་པས་ཉེ་གནས་ངོ་མདོག་དམར་པོར་གྱུར་ནས་སྐེད་རགས་མ་བཀྲོལ་རང་བཀྲོལ་བྱུང་བས་སྐེད་རགས་བཀྲོལ་མ་ཉིད་ནས་ཉེ་གནས་ཀྱི་ཨམ་ཕྲག་ནང་གི་གཡུ་སྦལ་བཟོ་སྦར་མོ་གང་པོ་དེ་སྦལ་པ་གསོན་པོ་གཅིག་ལ་གྱུར་ནས་ས་སྟེང་དུ་ལྷུང་ངོ།གལ་ཏེ་ཉེ་གནས་ཀྱིས་གཡུ་དེ་ཨར་ཀའི་འོག་ལ་སྦས་པ་ཡིན་ན་དེ་ནས་ཆུ་ཐོན་ཐུབ་ཅེས་དམངས་ཁྲོད་དུ་ཤོད་སྲོལ་ཡོད་དོ།།
           ༼ཤིང་བཙུགས་པའི་ཤོད་སྲོལ།༽
     ཐེངས་ཤིག་ལ་ཐང་སྟོང་རྒྱལ་པོས་རྒྱལ་པོ་ཉིད་ཀྱི་དབུ་སྐྲ་ནས་ཆུན་པོ་གཅིག་ཉེ་གནས་ལ་གནང་སྟེ་ཁྱོད་ཀྱིས་ངའི་སྐྲ་དེ་ཁྱེར་ནས་ང་ཚོའི་དགོན་གཤམ་གྱི་གཙང་པོའི་གཡས་གཡོན་ལ་སྐྲ་རྐང་རེ་རེ་བཙུགས་ནས་ཤིང་སྡོང་ལེགས་པ་ཤོག་ཅེས་སྨོན་ལམ་རྒྱོབ་ཅེས་བཀའ་མངགས་གནང་བས་ཉེ་གནས་ཀྱིས་ཐང་སྟོང་རྒྱལ་པོའི་དབུ་སྐྲ་དེ་རྣམས་ཁྱེར་ནས་དགོན་པའི་གཤམ་གྱི་གཙང་པོའི་གཡས་གཡོན་ལ་ཐང་སྟོང་རྒྱལ་པོའི་དབུ་སྐྲ་རེ་རེ་བཙུགས་ནས་ཤིང་སྡོང་ལེགས་པ་ཤོག་ཅེས་སྨོན་ལམ་བཏབ་པས་གཙང་པོའི་གཡས་གཡོན་གཉིས་ལ་ཤིང་སྡོང་མང་པོ་སྐྱེས་པ་ད་ལྟའང་ཅུང་རི་བོ་ཆེའི་ཉེ་འགྲམ་གྱི་གཙང་པོའི་གཡས་གཡོན་ལ་ཤིང་སྡོང་རྐང་དགུ་ཙམ་མཐོང་རྒྱུ་ཡོད་པས་དེ་ཚོ་རེད་ཅེས་ཤོད་སྲོལ་ཡོད་དོ།།
༼ བྱེ་མ་རྒྱབ་གཅིག་གི་ཤོད་སྲོལ། ༽

     མཆོད་རྟེན་བཀྲ་ཤིས་སྒོ་མང་ཐོག་མར་བཞེངས་སྐབས་མཆོད་རྟེན་ལ་གསེར་ཚགས་སྒྲོན་བྱེད་ཐང་སྟོང་རྒྱལ་པོས་ཟངས་ཟངས་ལྷ་བྲག་ནས་བྱེ་མ་རྒྱབ་གཅིག་ཁྱི་མོ་ཞིག་ལ་བཀལ་ཏེ་ཉེ་གནས་ལ་ཁྱོད་ཀྱིས་བྱེ་མ་དེ་མཆོད་རྟེན་བཀྲ་ཤིས་སྒོ་མང་ལ་བསྐྱལ་དགོས།ལམ་ཐོག་ཏུ་སྒྱེ་མོ་དེའི་ཁ་རྩ་བ་ནས་ཕྱེ་མི་ཉན་ཞེས་བཀའ་མངགས་གནང་།ཉེ་གནས་ཀྱི་སེམས་ལ་རྒྱལ་པོས་བྱེ་མ་བསྐུར་གནང་བའི་རྒྱུ་མཚན་གང་ཡིན་སྙམ་ནས་ཁ་ཕྱེས་ནས་ལྟ་ཙམ་བྱས་པས་བྱེ་མ་རྒྱབ་དེ་ནས་ཡ་གཅིག་གསེར་ལ་གྱུར་ཡོད་པ་དང་ཡ་གཅིག་ད་དུང་བྱེ་མ་རང་ལ་བསྡད་ཡོད།གལ་ཏེ་ཉེ་གནས་ཀྱིས་བྱེ་མ་དེ་ཁ་མ་ཕྱེས་ན་རྒྱབ་གཅིག་པོ་དེའང་གསེར་ལ་འགྱུར་གྱི་རེད་ཅེས་ཤོད་སྲོལ་ཡོད་པ་དང་།ཟངས་ཟངས་དཔེ་ལ་ཞེས་པའི་ལུང་པ་དེའི་མིང་ཡང་།དཔེ་ལ་ཟེར་དགོས་པའི་དོན་ནི་ཉེ་གནས་ཀྱིས་བྱེ་མ་རྒྱབ་དེ་ལུང་པ་དེར་ཁ་ཕྱེས་བས་དཔེ་ལ་ཞེས་བཏགས་པ་རེད་ཅེས་ཤོད་སྲོལ་ཡོད་དོ།།