སྔོན་བྲག་སྐྱ་སེང་གེ་ཕུག་ཅེས་པ་ན་སྒོམ་ཆེན་ཞིག་ཡོད།ནམ་སྲོད་ཙམ་ན་སྤྱིལ་བུའི་ནང་དུ་ཚེག་ཆོམ་གྱི་སྒྲ་མང་པོ་གྲགས་པས་ཕྱི་ཉིན་མཆོད་འབྲུ་མཎྜལ་རྩམ་པ་སོགས་སྐྱ་ཐེ་རེ་བཏང་འདུགདེའི་ནུབ་ཕོར་རྙི་ཞིག་བཙུགས་ཏེ་བཞག་པས་སྐབས་ཤིག་ལ་ཁོབ་ཁྲོབ་སྡིག་ཆོམ་ཟེར་བས་སྒོམ་ཆེན་བལྟར་ཕྱིན་པ་ན་རྫ་ར་སེར་སྐྱ་དང་བྱི་བ་སྨུག་ཆུང་གཉིས་མིག་ནག་སེང་ངེ་འདུགསྒོམ་ཆེན་གྱིས་“ང་ཡི་མཆོད་གཏོར་རྐུ་མཁན་སུ”ཞེས་དྲིས་ཚེ།ཁོ་གཉིས་ནས་གྲུ་མོ་སུག་སུག་མགོ་ཆུང་སིག་སིག་བྱེད་བཞིན་“ངེད་གཉིས་རྒྱུ་ནོར་འཛོམས་པའི་ཨ་ཕོ་ཡིན།སྒོམ་ཆེན་ནོར་ལ་འགྲམ་ཆུ་སྐྱེ་དགོས་མེད”ཅེས་པས་སྒོམ་ཆེན་གྱིས་བདེན་ཡང་སྲིད་སྙམ་སྐབས།ཁྱིམ་མཚེས་རྗ་ར་བློ་ལྡན་ན་རེ།“སྒོམ་ཆེན་ལགས།བྱ་བ་ཐམས་ཅད་བརྟགས་ནས་བྱེད།བརྟགས་པའི་བྱ་བར་ཕུགས་མི་འགྱོད”ཅེས་པས་སྒོམ་ཆེན་གྱིས་བདེན་ཟེར་བཞིན་སླར་ཡང་མཆོད་གཏོར་གསར་པ་བཞེངས།ཕོར་རྙི་བཙུགས་ཏེ་བཞག་ཡང་ཐོ་རེངས་སྐབས་ཚེག་ཆོམ་ཙིག་ཙིག་ཟེར་བཞིན་འདུགསྒོམ་ཆེན་གྱིས་རྩིད་སྐུད་དང་སྤུ་གྲི།བཞུས་མར་བཅས་ཁྱེར་ཏེ་བལྟས་པས་སྤགས་ཕོར་གྱི་འོག་ན་སེར་སྐྱ་སྨུག་ཆུང་གཉིས་ངོ་སྤས་ཏེ་མིག་ནག་སེང་ངེ་།ཁ་རྩམ་རལ་ཛ་རེ་འདུགསྒོམ་ཆེན་གྱིས་རྩིད་སྐུད་ཀྱིས་ཡན་ལག་བཀྱིགས།རྣ་བ་དང་མཇུག་མའི་རྩེ་ནས་རྡོག་ཙམ་བཅད།བཞུས་མར་གྱིས་ཁ་སྤུ་དང་སྨིན་མ་བསྲེགས་ཏེ་བཏང་བས་ཙིག་ཙིག་ཟེར་བཞིན་རང་གི་ཁུང་བུ་ལ་འཛུལ་སོང་ངོ་།
      ཕྱི་ཉིན་ཁོ་གཉིས་གྱིས་གྲོས་བྱས་ཏེ་སྒོམ་ཆེན་ལ་དགྲ་ཤ་ལེན་འོངས།སྒོམ་ཆེན་གྱིས་“མཆོད་གཏོར་སུས་བརྐུས་མི་བཤད་ན་རྐང་ལག་འབྲེག་པའང་ཐག་མི་རིང་”ཟེར་ཡང་།ཁོ་གཉིས་སྔར་ལས་དམུ་རྒོད་དུ་གྱུར་ཏེ་“སྒོམ་ཆེན་གྱིས་ངེད་གཉིས་ལ་ཆེ་འདོན་མི་བྱེད་ན།རྫ་ར་དང་བྱི་བའི་དམག་བཀུག་སྟེ་སུ་ཕམ་རྗེས་ནས་ལྟད་མོ་བལྟ་”ཟེར་ཞིང་ལོགས་དེར་བསྡད།དེའི་ཚེ་སེར་སྐྱ་སྨུག་ཆུང་གཉིས་ཀྱིས་ཚང་ལ་གནོད་པ་བཟོས་པའི་སྲེག་པ་མ་བུ་གཉིས་འདུག་པས་བུ་དེས་མ་ལ་“ཨ་མ་རྫ་ཙིག་གཅིག་གི་མཇུག་མ་བཅད་འདུག”ཅེས་པས་ཁོ་གཉིས་སེར་སྐྱ་སྨུག་ཆུང་གི་མདུན་དུ་འོངས།རྫ་ཙིག་གཉིས་ལ་ངོ་མཚང་བྲུས་རྗེས་འཕུར་སོང་།ཡང་དེའི་ཚེ་ཤིང་སྤེན་མ་ཞིག་གི་གསེབ་ནས་བྱེའུ་མཆུ་རིང་ཏིང་ཏིང་གཉིས་ཡོད་པས་ཁོ་གཉིས་ཀྱིས་རྫ་ཙིག་གིས་སྒོམ་ཆེན་ལ་དྲིན་ལན་ལོག་འཇལ་བྱས་པའི་གཏམ་ལབ་པ་དང་།ཁོ་གཉིས་སྒོམ་ཆེན་གྱི་དྲུང་དུ་ཕྱིན་ཏེ་སྒོམ་ཆེན་ལ་སེམས་གསོ་ཞུས་སོ།།ཡང་སྤང་ཁ་ཞིག་ན་རྫ་ཙིག་བཀྲ་ཤིས་དང་དོན་གྲུབ་ཟེར་བ་གཉིས་འདུག་པས་ཁོ་གཉིས་ཀྱིས་མེ་ཆུང་དུས་ནས་བསད་ན་བཟང་བ་ལྟར་འདི་ལྟར་གྱོད་གཞི་ཇེ་ཆེར་གྱུར་ན་ཡུལ་ཁམས་མི་བདེ་བར་འགྱུར་བས་རང་རེས་སྡུམ་བྱས་ན་དྲག་ཟེར་བ་བཞིན་རྫ་ཙིག་གཉིས་ལ་འདུམ་བྱེད་དུ་སོང་ཡང་ཁོ་གཉིས་ཀྱིས་ཕྱིར་ངོ་མཚང་དེ་འདྲ་བྲུས་པས་ཁོ་གཉིས་ཕྱིར་མི་ལོག་ཀ་མེད་བྱུང་།       སྐབས་དེར་སྒོམ་ཆེན་ཐུགས་སྐྱོ་བ་ཞིག་བྱུང་།ནམ་མཁར་བལྟས་པས་ནམ་མཁའ་ན་རྒོད་པོ་ཞིག་འཕུར་འགྲོ་བ་མཐོང་སྟེ་ཁོ་གཉིས་གཏམ་འཕྲོས་མཛད་པ་དང་།རྒོད་པོས་སྒོམ་ཆེན་ལ་སེམས་གསོ་ཡང་ཡང་མཛད་རྗེས་གཞན་ཞིག་ཏུ་འཕུར་སོང་ངོ་།།ཡང་སྤྱིལ་བུའི་ལྟག་རྒྱབ་ཏུ་སྡོད་པའི་གོང་མོ་གཉིས་ཀྱིས་མ་བཟོད་པར་ཕུང་དཀྲུག་སྡེ་བཤིགས་གི་ལས་འདི་སྤངས་ན་བཟང་བའི་བསླབ་བྱ་རྫ་ཙིག་གཉིས་ལ་བྱས་ཀྱང་ཁོ་གཉིས་ནས་མུ་མཐུད་དུ་ལྟ་བ་མཁྲེགས་འཛིན་བྱས་པས་གནས་དེར་འདུག་པའི་བྱེའུ་ཅོ་ཀ་གཉིས་ཀྱིས་གོང་མོ་གཉིས་ལ་བསླབ་བྱ་གནང་སྟེ།“མི་ཉན་པ་ལ་ཁ་ཏ་བྱེད་པ་ནི།གྱོང་པོའི་ཤིང་ལ་མདུད་པ་རྒྱག་པ་འདྲ”ཟེར་ཞིང་འཕུར་སོང་།       སྐབས་དེར་ཡང་རྫ་ཙིག་གཉིས་ཀྱིས་གྲོས་བྱས་པ་ལ།ད་རེབ་ཀྱི་བྱ་བ་འདི་རྒྱུ་ཆུང་ལ་རྐྱེན་ཆེ་བས་རང་རེས་གྲོགས་པོ་དཀར་ཆུང་དང་བསམ་གཏན་གཉིས་ལ་གྲོས་བྱས་ན་ཨ་ཅང་དྲག་ཟེར་བཞིན་དཀར་ཆུང་དང་བསམ་གཏན་གཉིས་འབྲིད་ཐབས་བྱས་ཀྱང་དེ་གཉིས་ཀྱིས་མ་ཉན་པར་ལ་ཆུང་ཞིག་བརྒལ་ཏེ་སོང་།ཡང་སྨུག་ཆུང་གི་བསམ་པ་ལ།ཞང་པོ་སྤོ་ཐང་དཔུང་དུ་བཅོལ་དྲག་སྙམ་སྟེ་རྫ་གསེབ་ཅིག་ན་སྤོ་ཐང་ཟེར་བའི་ཙི་གུ་རྒད་པོ་ཞིག་ཡོད་པ་དེ་ལ་དཔུང་རོགས་བྱེད་དགོས་པར་བཅོལ་ཡང་སྤོ་ཐང་གིས་མ་ཉན།སྐབས་དེར་རྡོ་གསེར་ཅིག་ན་སྲེ་མོང་ཞིག་འདུག་པ་དེ་ཁོང་ཁྲོ་ལངས་ཏེ་“སྒོམ་ཆེན་ལ་བརྙས་དམོད་བྱེད་མི་ཆོག”ཅེ་མཇུག་མ་གཟེང་གཟེང་བྱས་པ་ན།ཁོ་གཉིས་ཅུང་འཇིགས་ཏེ་སྲེ་མོང་གི་བཀའ་ལ་གྱེན་ལྡོག་མི་བྱེད་ཀྱང་།ལྐོག་ཏུ་གྲོས་བྱས་ཏེ་ཕུ་ཞིག་ན་ཙི་གུ་སྲེག་ཤོར་ཟེར་བ།མེ་ལས་དབལ་ཚ་བ།ཆུ་ལས་རྦ་དྲག་པ་ཞིག་འདུག་པ་དེའི་སྐྱེས་སུ་གྲོ་མའི་ཐུམ་གཅིགཟན་དང་འབྲུ་སྣ་འདྲེས་མའི་ཐུམ་གཅིགཇ་མར་འདྲེས་པའི་ཐུམ་མཐེ་བོང་ཙམ།རང་དར་གྱི་ཚན་གྲངས་བཅས་ཕུལ་ཏེ།པུས་མོ་ས་ལ་བཙུགས།ཐལ་མ་ཀྲོང་ཀྲོང་བྱས་ནས་དཔུང་རོགས་ཞུས་པ་ན།ཙི་གུ་སྲེག་ཤོར་དེ་ཧ་ལས་པ་ལྟར་བྱས་ཏེ་རྐང་པས་ས་བུན་བུན་དུ་གཏོར།ཁ་སྤུ་དང་སྨིན་མ་གྱེན་ལ་གཟེངས།འདུར་འདུར་རྒྱུག་སྟེ་སྒོམ་ཆེན་གྱི་མདུན་དུ་སླེབས་པའི་ཚེ།བྲག་གི་ལོགས་སུ་ཨོག་དཀར་འཇིགས་སུ་རུང་བ་ཞིག་བབས་ཏེ་སྡེར་བཞི་ས་ལ་བགྲད།མཆེ་བ་གཙིགས་ཤིང་ཁྲོ་གཉེར་བསྡུས་ཏེ་སྒོམ་ཆེན་རྒྱབ་རྩ་མནན་པ་ན་སྲེག་ཤོར་སྐྲག་སྟེ་རྡོ་གསེབ་ཅིག་ལ་བྲོས་ཤིང་།འདར་ཁུལ་ཁུམ།བྲུན་འཛར་འཛར་དུ་བསྡད།དེའི་ཚེ་བྲག་འོག་ཅིག་ན་ཕུག་རོན་དགེ་བརྙེན་ཟེར་བ་ཞིག་འདུག་པ་དེས་སྲེག་ཤོར་བྲོས་པ་ལ་ངོ་མཚང་བྲུས་ན།རྫ་ཙིག་གཉིས་སྐྲག་སྟེ་སྒོམ་ཆེན་ལ་ཕྱག་བྱས།རྐུན་མ་བྱས་པ་ངོས་ལེན་བྱས།ཕྱིན་ཆད་མི་བརྐུ་བའི་དམ་བཅའ་བཞག་ཅིང་།སྒོམ་ཆེན་གྱིས་རྫ་ཙིག་རྣམས་བསྡུས་ཏེ་ཆོས་ཀྱི་གླེང་མོ་བྱས་པ་དེ་ནས་བཟུང་རྫ་ཙིག་གིས་སྒོམ་ཆེན་ལ་གནོད་པ་མེད་ཅིང་དགེ་སྦྱོར་འཕེལ་ཅིང་།ཐམས་ཅད་མཛའ་ཞིང་མཐུན་པའི་བསྐལ་བ་བཟང་པོ་ཞིག་ཤར་རོ།།ཞེས་པའོ།   །