ཡ།ད་གཞི་མགྲོན་པོ་ཀུན་ཚོགས་ཤིང་རྟ་རྐང་པ་མཉམ་གཅིག་ཡོད་ས།ཕྱོགས་ཀྱི་མགྲོན་པོ་རྣམ་པ་གྲལ་ལ་འཚོགས་ན།གཏམ་མ་ཎི་འདྲ་བོ་ཡར་ལ་བརྩེངས་(བསྒྲེངས)ན།འདིའི་ནང་ལ་མ་འདུས་སྤྱད་གི་ཅང་མེད་གི་ར།འདི་ཆོས་ཀྱི་ཕྱོགས་ཀྱི་བསྙེན་བཀུར།འདི་འཇིག་རྟེན་སྒོ་ཡི་བསྙེན་བཀུར།འདི་ཁ་བརྡ་ཡར་བཤད་མར་བཤད་ཅིག་བྱེད་དགོས་ནོ།འདི་འཇིག་རྟེན་མགོན་པོའི་རྟེན་འབྲེལ་བཟང་པོ་རེད་ཟེར་རྒྱུ།ཡ།ད་ཡང་བོད་ཆུ་ཕོ་རྟ་ཡི་གནམ་ལོ་གསར་ཚེས་ཀྱི་བཀྲ་ཤིས་པའི་ཉི་མ་འདི་ལ།ཕྱོགས་ཡོངས་ཀྱི་སྐུ་མགྲོན་རྣམ་པ་པཎ་ཆེན་རིན་པོ་ཆེའི་འཁྲུངས་ཡུལ་དུ་ལྷན་འཛོམས་བྱུང་ནས་ཡུམ་ཆེན་བསོད་ནམས་སྒྲོལ་མ་ལ་གནམ་ལོ་གསར་བའི་དགའ་སྟོན་རྟེན་འབྲེལ་ཞུ་བ་དང་བཀྲ་ཤིས་བདེ་ལེགས་ཞུ་བ་ལགས།      ཡ།ད་རང་རེའི་རྫོང་གི་ཡུལ་ལྗོངས་མཛེས་སྡུག་ལྷ་ཡུལ་ལ་འགྲན་པ་འདི་ན།རི་རྩེ་གངས་རི་དང་རྫ་རི་རྩེ་མོ་དགུང་ལ་བསྙེགས་འདྲ།རི་སྐེད་སྤང་རི་སེར་བོ་གསེར་གྱི་གཞོང་བ་མར་ཁུས་བཀང་འདྲ།ནགས་ཀླུང་ཕྱུག་མོ་ལྷ་ཤིང་དང་ཐང་ཤིང་གིས་བརྒྱན་པ།རྫ་ཆུ་བསིལ་མ་ལྷ་ཡུལ་གྱི་བདུད་རྩི་ས་ལ་བབས་འདྲ།གཤོང་ན་ཆུ་མའི་ཞིང་ས་འབྲུ་རིགས་སྣ་ལྔའི་བང་མཛོད་གླེགས་ཤིང་ཐང་ལ་བསྒྲིགས་འདྲ་འདི་ནི་རང་རེའི་འདི་ཚོགས་སྤུན་ཟླ་རྣམ་པའི་བདེ་སྐྱིད་ཀྱི་ཕ་ཡུལ་རེད་ལ་ཟེར་རྒྱུ།       ཡ།ད་རང་རེའི་ཡུལ་གྲུ་འདི་ལ་མཚོན་ན།ཤར་ཕྱོགས་ན་དཀར་ཕྱོགས་སྐྱོང་བའི་ཡུལ་ལྷ་གཞི་བདག་གི་གནས་རི།སྟོང་རི་དར་རྒྱལ་གུང་ཡེ།ལྷོ་ཕྱོགས་ན་ཁྲབ་ཆེན་དང་ཡང་ལེ་ཙག་རྡེའུ།ནུབ་བང་ན་དྲི་རབ་དང་ཤ་བོ་གནམ་བྱུང་སོགས་སྤང་རི་དང་རྫ་རི་སྨུག་པོ་རྩེ་མོ་མཐོ་ཨ་སྔོན་དགུང་ལ་བསྙེགས་འདྲ།རི་རྒྱལ་ལྷུན་པོ་བཞིན་དུ་རྔམ་ཞིང་བརྗིད་པ།དེ་དག་གི་བར་མཚམས་སུ་མཚོ་དང་མཚོའུ་མང་པོ་མ་བབས་ལྷུན་གྱིས་གྲུབ་པ།ལྷག་པར་དུ་གྲགས་ཆེ་བ་དར་རྒྱལ་ལྷ་མཚོ་དཀར་པོ།ལྷ་ལུང་དཔལ་རྡོར་གྱི་སྒྲུབ་གནས་སྟོང་རི་གཡུ་མཚོ་འཁྱིལ་ས་འདི་གཞི་ཆགས་པའི་སྡེ་བ་ཤོག་པ་ཚོ་ཅིག་རེ་བཤད་རྒྱུ་ན།ཞིང་ས་སྨད་ཀྱི་རོང་ན་རྡོ་སྦིས་བསེ་ཆང་བིས་མདོ་དཀྱིལ་འཁོར།ཀ་རིང་དང་ཚོ་ལྔ་རྐེད་བཞི།རྒྱ་ཞུར་དང་མགྲོན་ཐང་ཨ་མ་ཅད་ལ་སོགས་པ་རྐེད་ལུང་པ་དྲུག་དང་།སྟོད་ཕྱོགས་རྩྭ་ཐང་གི་འབྲོག་ན་རྐང་ཚ་ཚོ་བ་བཞི་དང་ཁ་སོ་སོག་པ་བཅས་གཡང་སྡེ་ཆེ་ཆུང་མང་པོ་མར་ཁུའི་མཚོ་མོ་འཁྱིལ་འདྲ་ཡོད་ཟེར་རྒྱུ།       ཡ།ད་ཡུལ་ཕྱོགས་འདི་ལ་མཚོན་ན།སྔོན་བྱོན་མཁས་གྲུབ་གཉིས་འཛོམས་ཀྱི་བླ་སྤྲུལ་དང་དགེ་བཤེས།ཡུལ་ཕྱོགས་དབང་དུ་སྡུད་པའི་མི་རྗེ་དཔོན་པོ་འཁྲུངས་ནོ་ཅིག་བཤད་རྒྱུ་ན།བསྟན་པ་ཕྱི་དར་གྱི་དབུ་བཪྙེས་པ་ལ་བཀའ་དྲིན་མཚུངས་མེད་བླ་ཆེན་པོ་དགོངས་པ་རབ་གསལ་འཁྲུངས་ཟིགབླ་མ་བཀའ་བཞི་བ་ཤེས་རབ་རྒྱལ་མཚན་གྱིས་ལོ་བརྒྱད་བརྒྱའི་ཡར་སྔོན་དུ་དཔལ་ས་སྐྱ་པའི་གྲུབ་མཐའ་སྤེལ་ཟིགཀུན་གཟིགས་ཡེ་ཤེས་ཀྱི་ཉི་མ་པཎ་ཆེན་སྐུ་ཕྲེང་བཅུ་པ་འཁྲུངས་ཟིགཡོངས་ཀྱི་དགེ་བའི་བཤེས་གཉེན་ཆེན་པོ་རྗེ་བཙུན་ཤེས་རབ་རྒྱ་མཚོ་འཁྲུངས་ཟིགངེས་པ་དོན་གྱི་པཎྚི་བིས་པ་མི་ཕམ་ཟླ་བ་འཁྲུངས་ཟིགཔཎ་ཆེན་ཐམས་ཅད་མཁྱེན་པ་སྐུ་ཕྲེང་གཉིས་ཀྱི་ཡོངས་འཛིན་བླ་ཁོ་རིན་པོ་ཆེ་འཇིགས་མེད་འཕྲིན་ལས་རྒྱ་མཚོ་འཁྲུངས་ཟིགའཇམ་དབྱངས་བཞད་པ་སྐུ་ཕྲེང་བཞི་བའི་ཡོངས་འཛིན་ལྷ་རམས་པ་བསྟན་འཛིན་རྒྱ་མཚོ་འཁྲུངས་ཟིགསྐུ་ཕྱོགས་འཇིགས་མེད་དམ་ཆོས་རྒྱ་མཚོ་ཚང་གིས་ཆོས་གསུང་འབུམ་པོ་ཏི་བཅོ་ལྔ་བརྩམས་ཟིགམདོ་སྔགས་རིག་གནས་དང་བཅས་པ་ལ་མཁས་པའི་མཆོག་གྱུར་ཚེ་ཏན་ཞབས་དྲུང་འཇིགས་མེད་རིགས་པའི་བློ་གྲོས་འཁྲུངས་ཟིགམཁས་བཙུན་གཉིས་འཛོམས་ཀྱི་གཡེར་གཤོང་འཇམ་དབངས་དགེ་འདུན་རྒྱ་མཚོ་འཁྲུངས་ཟིགཐུའུ་བཀྭན་རིན་པོ་ཆེའི་ཡང་སྤྲུལ་འཇམ་དབྱངས་བློ་བཟང་བསྟན་པའི་ཆོས་ཀྱི་ཉི་མ་འཁྲུངས་ཟིགསྔ་འགྱུར་གསང་སྔགས་ཪྙིང་མའི་གཏེར་སྟོན་བདུད་འཇོམས་རྡོ་རྗེ་རོལ་པ་འཁྲུངས་ཟིགགཞན་ཡང་བཀའ་བཞི་བ་དང་དཀའ་བཅུ་བ།ལྷ་རམས་པ་དང་སྔགས་རམས་པ་རྡོ་རམས་པ་སོགས་དགེ་བཤེས་དང་སྐྱེ་རྒྱུན་ནང་ཁག་ཅན་མང་པོ་སོགས་ཆུ་བོའི་རྒྱུན་བཞིན་བར་མ་ཆད་པར་རང་རེའི་ཡུལ་ཕྱོགས་འདིར་བྱོན་ཟིག་ཟེར་རྒྱུ།        ཡ།ད་རང་རེའི་ཡུལ་ཕྱོགས་འདི་ལ་མཚོན་ན་གོང་ས་པཎ་ཆེན་རིན་པོ་ཆེས་ཐུགས་རྗེའི་བཀའ་དྲིན་ལས་བོད་ཡིག་སློབ་འབྲིང་བཙུགས་ཟིགབུ་བུ་མོ་མང་པོས་སློབ་གྲྭ་ནས་ཤེས་རིག་དང་ཚན་རིག་སྦྱོངས་ཟིགདེའི་ཐོག་སྔར་གྱི་ཡོན་ཏན་སྦྱོངས་པའི་སྲོལ་རྒྱུན་བཟང་པོའི་དྲིན་གྱིས་ད་ལྟ་རང་རེའི་ཡུལ་ཕྱོགས་འདི་རིག་གནས་དང་སློབ་གསོ་ཕྱོགས་ཀྱི་ཡར་རྒྱས་དང་གོང་འཕེལ་ཆེན་པོ་བྱུང་ཡོད་ཟེར་རྒྱུ།       ཡ།ད་ཏང་གི་སྲིད་ཇུས་བཟང་པོའི་བཀའ་དྲིན་གྱིས་རང་རེའི་ཡུལ་ཕྱོགས་འདི་ཕྱི་སྐོར་ཁ་འཆམ་པ།ནང་སྐོར་གྲོས་ཡོང་བ།བདེ་སྐྱིད་ཕུན་སུམ་ཚོགས་པའི་བཀྲ་ཤིས་སེ།གཡང་འཁྱིལ་ལེ།ཕ་ཨ་ཁུ་འཛོམས་པ།བུ་བུས་ཕྲུག་རྒྱས་པ།ལོ་ལོན་རྣམས་སྐྱིད་པའི་ངོ་མདངས་འཛུམ་ནས།ན་གཞོན་རྣམས་དབར་གྱི་རྩྭ་རྩི་སྐྱེ་སྐྱེས།སྟག་ཕྲུག་གཟིག་ཕྲུག་རྒྱས་རྒྱས།གླུ་ལེན་གར་རྩེད་ལ་དགའ་བ།ཚན་རིག་ལག་རྩལ་ལ་མཁས་པ།གོང་རྒན་པ་ལ་བརྩི་བཀུར་ཆེ་བ།འོག་གཞོན་པ་ལ་བྱམས་བརྩེས་སྐྱོང་བ།ཕྱོགས་ཕྱོགས་སུ་ལོ་ཡག་སྙེ་མ་གོམ་མཚམས་མེད་པར་སྐྱེས་ནས།འདི་རྟ་ནོར་ལུག་གསུམ་གྱིས་རི་ལུང་བཀང་ནས།འདི་ཁྲ་གྱིག་གེའདི་བརྗིད་ཅིག་སེ།འདི་བདེ་སྐྱིད་བཀྲ་ཤིས་དཔལ་དང་ལྡན་གི་ཟེར་རྒྱུ།     ཡ།ད་དེ་རིང་གནམ་ལོ་གསར་བའི་དགའ་སྟོན་རྟེན་འབྲེལ་འདི་ལོངས་སྤྱོད་རྨད་དུ་བྱུང་བས་བཅུད་ཆགས་ཤིང་བག་བྲོ་བའི་གླུ་ལེན་དང་གར་རྩེད།ཇ་འདྲེན་དང་ཆང་འདྲེན་ལ་སོགས་པའི་སྟོན་མོ་རྒྱ་ཆེན་པོ་བཤམས་ནས།འདི་ཟ་བ་རི་རབ་ཙམ་ཞིག་བརྩིགས་ཡོད་ནོ་བ་རྒོད་པོ་མིན་གི་དཀྱིལ་མི་དཔོགས་ནོ།འདི་འཐུང་བ་རྒྱ་མཚོ་འདྲ་ཟིག་བསྐྱིལ་ཡོད་ནོ་ཉ་གསེར་མིག་མིན་གི་མཐའ་མི་ཕུད་ནོ།ད་རྒོད་པོ་ལྡིང་མི་ཐུབ་ནོ།ད་ཉ་མོ་རྐྱལ་མི་ཐུབ་ནོ།ད་གཞན་དང་མི་འདྲ་གི་ཟེར་རྒྱུ།      ཡ།ད་བན་རྒན་ཆོས་ལ་ཆོས་མཚམས།ད་སྲིད་པའི་གཏམ་ལ་བཤད་མཚམས་ཀྱི་དཔེ་བཞིན་དུ་བཀྲ་ཤིས་ཚིག་གསུམ་ཞིག་བརྗོད་ན།འདི་ཚོགས་ཐམས་ཅད་ཀྱི་གཡང་ཚང་མ་ཡུལ་ཕྱོགས་འདི་ལ་བསྐྱལ་ནས།ད་ས་འོག་ཐམས་ཅད་གཏེར་གྱིས་བཀང་བ།ད་ས་ཁ་ཐམས་ཅད་འབྲུ་ཡིས་བཀང་བ།ད་རི་ལུང་ཐམས་ཅད་རྒྱུ་ཡིས་བཀང་ནས་མྱི་བོ་རྒས་ཁ་སྐྱིད་རེ།ཉི་མ་འཇའ་ཁད་དྲོ་ནས།ཟས་ཤུལ་ལ་མར་ཁུ་འཁྱིལ་ནས།བསྡད་ཤུལ་ལ་མེ་ཏོག་བཞད་དེ།ད་ལོ་གསར་ལ་བཀྲ་ཤིས་བདེ་ལེགས་ཤོག་ཟེར་རྒྱུ།  །